Elimizdiń bas merekesi – Táýelsizdik kúni Qazaqstan Respýblıkasy Ulttyq ulanynyń Almaty qalasyndaǵy «Ońtústik» óńirlik qolbasshylyǵynyń basqarmasynda aıshyqty merekege arnalǵan birqatar saltanatty sharalar ótti, dep habarlaıdy Qamshy.kz aqparat agenttigi.
Atap aıtqanda, osy shara barysynda jaýyngerlik qyzmette erik, jigerimen, tabandylyǵy jáne eńbeksúıgishtigimen daralanǵan áskerı qyzmetshilerge elimizdiń İshki ister mınıstri, Ulttyq ulan Bas qolbasshysy atynan berilgen memlekettik marapattardy «Ońtústik» óńirlik qolbasshylyqtyń qolbasshysy general-maıor Qaırat Aqtanov tabystap, marapat ıelerine syı-qurmet kórsetti.
Sonymen qatar saltanatty jıyn barysynda «Elbasy sabaqtary» dep atalatyn aqparattyq-nasıhat shara ótkizilip, onda óńirlik qolbasshylyq qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Sabyrjan Súleımenov Elbasy N.Á.Nazarbaevtyń salıqaly saıasatynyń arqasynda táýelsizdik jyldary elimizdiń jetken barsha jetistikteri jaıly keń turǵyda túsindirip, baıandama jasady.
Jáne de osy shara barysynda sanaly ǵumyrlaryn Otan qorǵaý qyzmetine arnap, qyzmette bolýdyń shekti jasynan jetken 6 birdeı joǵary shendi áskerı qyzmetshini qurmetti eńbek demalysyna shyǵaryp salýǵa arnalǵan ulyqtaý sharasy da ótti. Atap aıtsaq, óńirlik qolbasshylyqtyń medısına qyzmetin uzaq jyldar boıy basqarǵan medısına qyzmetiniń polkovnıgi Qalybek Buralhıev: «Áskerı qyzmet bolǵanyma jalpy alǵanda barlyǵy 30 jyldan asa ýaqyt ótipti. Árıne, biz qyzmetke kezde ótken ǵasyrdyń 80-shi jyldary edi. Keıin táý eter Táýelsizdik te basymyzǵa baqyt qusy bolyp qonyp, egemendik aldyq. Sol tustaǵy qıynshylyq jyldar áli esimizde. Kadr tapshylyǵy, tehnıkalyq bazanyń álsizdigi, tipti tize bersek kóp, bir kún áskerı bólimderimizderde elektr jaryǵy bolyp, bir kún bolmaǵan tustardy bastan ótkizdik. Árıne, naryq jyldary óte qyspaqqa toly boldy. Biraq, sonyn barlyǵyn elimiz eńserdi. Elbasymyzdyń salıqaly saıasatynyń arqasynda eńserdik. Qazir sol tustardy eske alsam kórgen tústeı bolady da turady. Endi mine, búgin qurmetti zeınetkerlik demalysqa shyǵyp otyrmyn. Osy sáttiń ózi Táýelsizdigimizdiń 26 jyldyq merekesimen tuspa-tus kelip, osy kúni shyǵyp otyrǵanym da men úshin zor qýanysh dep bilemin», - dep atap ótti.
Sondaı-aq, óńirlik qolbasshylyq basshylyǵy tarapynan elimizdiń bas meıramy - Táýelsizdik kúnine oraı arnaıy konserttik tartý jasaý týraly sheshim qabyldanǵan bolatyn. Osyǵan sáıkes atalǵan sharanyń sońy óńirlik qolbasshylyqqa qarasty 5571 áskerı bóliminiń Áskerı án-bı orkestriniń merekelik konsertine ulasty. Bul án shashýǵa arnaıy baǵdarlama da daıyndaldy. Onda elimizge tanymal patrıottyq áýender shyrqalyp, Áskerı orkestr ujymynan bólek basqa da elge tanymal ónerpaz men ujymdar óner kórsetti. Merekege arnalǵan úlken konsertke Almaty qalasy ákimshiliginiń, qaladaǵy kúsh-qýat organdarynyń, «Nur Otan» partıasynyń, jáne basqa da ózara yqpaldastyq mekemeleriniń ókilderi, ardagerler, áskerı qyzmetshiler men olardyń otbasy músheleri men orta bilim berý oryndarynyń oqýshylary qatysty.
