Erkindigim.
Qasıettim.
Qasterlim.
Óziń barda ózegimde joq sher muń!
Keshe seniń kelbetińdi arman ǵyp,
Bodanyna buǵaýlandyq basqa eldiń.
Babalardyń basyn tigip báıgege,
Analardyń janaryna jas berdiń!

Ýa, Erkindik,
qosh keldiń!Ózegimdi órtke oraǵan qoǵamda,
Óz úıime ózim ógeı bolam ba?!
Alshań basyp júre almasa alty alash
Azattyǵym! Qadiriń de joq onda!
…Saǵan jetý qıyn bolsa qanshalyq,
Saqtap turý qıynyraq odan da!
Alla bergen azattyqtyń ár sáti-
Amanat qoı
Maǵan,
Saǵan
Oǵan da!

Saıasatqa sermeı almaı semserdi,
Ezgi kúnge teri qyldym eńsemdi!
Jeltoqsanda jalyn atyp jastyǵym,
Qursaý bolǵan temir qoǵam teńseldi!
Este dańqy qyrshyndardyń qaldy ma,
Seksen alty erligim be-eı, eń sońǵy!?
Ýa, erkindik,
Qunyń nemen ólsheńdi!?

Ýa, erkindik!
Qunyń nemen ólshendi?!
Seni kóksep
Bozdaqtarym ólse óldi!
Sensiń meniń eń ǵajaıyp óleńim,
Eń shýaqty,
Eń shyraıly,
Eń sherli!
Ár tańyńdy súıinshilep turaıyn-
Qudaı bergen ǵumyrymda ólsheýli!

Qalqaman Sarın