Almatyda «Sport meniń aýlamda» baǵdarlamasy aıasynda 7-17 jas aralyǵyndaǵy balalar men jasóspirimder arasynda chempıondar lıgasynyń fınaly ótti.
Eki kúnge sozylǵan jarys ál-Farabı atyndaǵy Qazaq ulttyq ýnıversıteti sport kesheninde ótip, oǵan Almatynyń ár aýdanynan kelgen 800-ge jýyq adam qatysty. Saıystar ulttyq jáne jyljymaly sport túrlerinen, sonymen qatar birneshe baıqaýlar ótkizildi.
Chempıondar lıgasy aıasynda jetkinshekter asyq atý, shaǵyn fýtbol, buqa tartys, sekirgish, arqan tartý, jeńil atletıka, strıtbol, tymaq urý, qol kúres sport túrleriniń ózara myqtyny anyqtady. Sonymen qatar, otbasylar arasynda «Biz myqtymyz» estafetasy ótti.
– Biz otbasymyzben kelip, balamyzben birge qatysyp kóreıik dep sheshtik. Bizge bári unady. Sporttyń qumaryna kirip, tipti ózim sportpen shuǵyldanǵym kelip ketti. Óte jaqsy baǵdarlama, osyndaı paıdaly bastamalardy únemi qoldap, damytý kerek. Ákimge, uıymdastyrýshylarǵa alǵys bildiremin. Osyndaı jarystarǵa qatyspaǵaly kóp bolypty. Biz ózimiz Alataý aýdanyńda turamyz. Balam ylǵı esik aldynda dostarymen oınaıdy. Aladǵy ýaqytta taǵy da kelemiz degen oıdamyn, – dedi óz otbasymen kelip estafetaǵa qatysqan Tımýr Sadyqov.
Aıta keter jaıt, bul chempıondar lıgasy jarysy osy baǵdarlama aıasynda qarasha aıynda bastalǵan bolatyn. Birneshe kezeńnen turatyn saıystyń fınalyna tek óz aýdandarynyń myqtylary kelip óner kórsetti.
Jarys qorytyndysy boıynsha, jeńimpazdar men júldegerler medaldar jáne dıplomdar, al fýtbolshylar qosymsha kýboktarǵa ıe boldy. Jalpy sany 28 komplekt medaldar tabystaldy. Olardy quttyqtaýǵa osy jobanyń jetekshileri, bapkerleri men úılestirýshileri jáne dzúdodan halyqaralyq dárejedegi sport sheberi, kóptegen jarystardyń júldegeri Evgenıa Bodýnova keldi.
– Men toǵyzqumalaqtan birinshi oryn alyp, óte qýanyp turmyn. Ózim Túrksib aýdanynan keldim. Maǵan osy oıyn qatty unaıdy. Mekteptegi muǵalimim úıretken bolatyn. Qazir 74-shi mektepte 8 synypta oqımyn. Balalarmen ylǵı jınalyp aýlada fýtbol oınaımyz. Olda óte qyzyq. Osyndaı jarystar jıi bolyp tursa jaqsy bolar edi, – dep jeńimpazdardyń biri Ramazan Nazarbaev óz oıymen bólisti.
Aıta keter bolsaq, Almatynyń alty aýdanynda sporttyń birneshe túrlerinen «Sport meniń aýlamda» baǵdarlamasy aıasyndaǵy chempıodndar lıgasy irikteý jarystarynyń úshinshi kezeńi ótkizilgen bolatyn.
Jarystar Alataý, Áýezov, Jetisý, Medeý, Naýryzbaı jáne Túrksib aýdandarynda birdeı uıymdastyryldy. Osy baǵdarlamaǵa qatysyp júrgen balalar men jasóspirimder asyq atý, shaǵyn fýtbol, buqa tartys, sekirý, arqan tartý, jeńil atletıka, strıtbol jáne tymaq urý sport túrlerinen baq synasty.
Joǵaryda atalyp ótken ár aýdanda 100-den asa jetkinshek ózara myqtyny anyqtady. Qatysýshylar atap ótkendeı, olar buqa tartys jáne tymaq urý sıaqty ulttyq sport túrlerin endi tanyp bilýge qumarta bastaǵan.
