Kempirine shal aıtypty bir kúni:
«Kempir, kempir, is isteıik kúlkili.
Qandaı ǵajap, aspan aıly, kesh jaryq,
Qaıtaıyq bir jastyq shaqty eske alyp.
Bozbala bop men kúteıin kósheden,
Boıjetken bop klýbka tart tótemen.
«Maqul, – depti kempiri sál oılanyp, 
–– Bul qyzyqty qalaı taptyń, oı, ǵarip?»
«Taptym!» depti shaly kúlip qýlana,
Kóshege de shyǵa kepti shýlaǵan.
Jas jigitteı asyqtyrǵan aq arman,
Pále shalyń gúl izdepti bazardan.
Bir azdan soń qyp-qyzyl gúl qushaqtap,
Júdeý óńdi «jigit» turdy túsi appaq...
Kınosyna jatyr, mine, el kirip,
«Kelemin» dep ǵashyǵy aıtqan sendirip.
Saǵat jarym ýaqyt boldy, joq «ǵashyq»,
Shal «jigit» tur ón boıynan ot qashyp.
«Qalǵan neme qaıda júr – dep – tot basyp»,
Qoıady ishteı kempir «qyzben» boqtasyp.
Qaıtsa shalyń jaýrap-tońyp kósheden.
Kempir otyr shaıdy tartyp keseden.
«Oı ońbaǵan nege munsha tostyrdyń, –
Depti shaly – qanshama ýaqyt bos júrdim».
Sonda kempir: «Boldy – depti – tap qyrsyq,
Kınoǵa apam jibermedi qatty ursyp».
Sonda shalyń óle jazdap kúlkiden,
Kári emendeı basyn daýyl silkigen,
«Boldy qyzyq, boldy qyzyq! – deı berdi, 
Elestettiń qyz kezdegi beıneńdi!»

Eı, jigitter, qyzyq shyqpaı qalsa eger,
Ol da qyzyq, renjimeı tarta ber!

Ábýbákir QAIRAN