Elbasynyń Joldaýynda aıtylǵan syndy bárimiz úshin sońǵy eskertý dep bilý kerek. QR Premer-Mınıstri Baqytjan Saǵyntaev QR Prezıdentiniń ózin-ózi jumyspen qamtyǵandar máselesin qarastyrý jóninde Joldaýda aıtylǵan synyna qatysty osylaı dedi, dep habarlaıdy QazAqparat-qa silteme berip Qamshy.kz aqparat agenttigi. Eske sala ketsek, 10 qańtarda Memleket basshysynyń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» Joldaýy jarıalanǵan bolatyn. Qujatta belgilengen 7-mindette (Adamı kapıtal - jańǵyrý negizi) Eńbek jáne halyqty áleýmettik qorǵaý mınıstrliginiń jumysy kemshin túsip jatqany aıtylǵan edi. «Men ózin-ózi jumyspen qamtyǵandar máselesin qarastyrý jóninde birneshe ret talap qoıǵanmyn. Eńbek jáne halyqty áleýmettik qorǵaý mınıstrligi bul iske jaýapsyzdyq tanytyp, atústi qarap otyrdy. Adamdardy nátıjeli jumysqa tartý úshin kóbirek múmkindik berip, olardyń jeke kásip bastaýyna nemese jańa mamandyq alyp, jumysqa ornalasýyna jaǵdaı jasaý kerek», - delingen Joldaýda.

Búgin ótken Úkimet otyrysynda QR Premer-Mınıstri Baqytjan Saǵyntaev osy máselege basa nazar aýdarýdyń qajettigin qadap aıtty. «Elbasynyń Joldaýynda aıtylǵan syndy bárimiz úshin sońǵy eskertý dep bilýimiz kerek. QR Eńbek jáne halyqty áleýmettik qorǵaý mınıstrligi ǵana jumysty sońyna deıin atqarmaı jatyr demeı, óńirler de bul jumysqa atsalysýy kerek. Bul, barlyǵymyz - Úkimet te, óńirler de, ákimdikter de atqaratyn keshendi jumys. Sondyqtan, mınıstr Tamara Qasymqyzy, aıtqan usynystardyń barlyǵyn jeke qarastyrýǵa tıispiz. Tamara Qasymqyzy, kerek bolsa aı saıyn meniń jumysymnyń deńgeıinde bul sharýany júrgizetin bolaıyq. Mınıstrlikpen birge, jeke blokta óńirlerdiń de esebin tyńdaıtyn bolamyz», - dep atap ótti Úkimet basshysy.

Premer-Mınıstr sonymen birge, bul jumysty 2018 jyldyń sońyna deıin jetkizý kerektigine toqtaldy. «Memleket basshysy maǵan: «Eger sıfrlandyrý salasynda jumystyń bir bóligin merziminen buryn aıaqtasańyzdar, mindetti áleýmettik-medısınalyq saqtandyrý (MÁMS) júıesin engizýdi 2020 jylǵa deıin kútpeı-aq qoıýǵa bolady. Ýaqytynan buryn bastaı berýge bolady» degen bolatyn. Demek, bizdiń bul baǵyttaǵy jumysymyzdyń aıaqtalýyn MÁMS kútip otyr. Negizgi jumys boıynsha kómektesýge tıispiz. Barlyq kúshti salyp, bıyl ózin-ózi jumyspen qamtyǵandardyń ózekti máselelerin sheshýge kúsh salýymyz kerek», - dep túıdi Saǵyntaev.