Olar alys elderge arman qýyp ketken. Olar shet memleketterde jumys istep, qazaqty álemge áıgilep júr. Olardyń qyzmeti syrt kózge eleýsiz bolsa da, shyn mánindegi eren eńbek solardiki. Ǵylym tereńine boılaǵan qazaqtar órkenıet kóshinen qalyspaı, halyqaralyq iri mekemelerde úlken laýazymdarǵa jetken. Qamshy.kz aqparat agenttigi AQSH pen Eýropada turatyn ǵalymdardyń bir parasyn nazarlaryńyzǵa usynbaq.
Erlan Ysqaqov
Semeı óńiriniń týmasy Erlan Ysqaqov 26 jasynda Sankt-Peterbýrgtegi Aımaqaralyq ekonomıka jáne quqyq ınstıtýtynyń basshysy bolyp, Reseıdegi eń jas rektor atanǵan. Erlan Ysqaqov 2007 jyldan beri Alferov qorynyń atqarýshy dırektory qyzmetin qosa atqaryp júr.
Azamat Sársembaev
Shetelde jumys isteıtin qazaq ǵalymdarynyń biri – Azamat Sársembaev. Oqýshy kezinde matematıka páninen halyqaralyq olımpıada júldegeri atanǵan, keıin Ulybrıtanıadaǵy London ekonomıkalyq mektebine túsken, AQSH-taǵy Mıchıgan ýnıversıtetinde bilim alǵan. Azamat Sársembaev oqýyn bitirgen soń Qazaqstanǵa oraldy. Biraq elde kóp turaqtamady. Qazir AQSH-tyń San-Fransısko qalasynda turady.
Murat Saparbaev
Murat Saparbaev – ál-Farabı atyndaǵy Qazaq Ulttyq Ýnıversıtetiniń túlegi. Fransıadaǵy Gýstav Rozı ınstıtýtynyń profesory. Indýstrıaldy zalaldandyrǵyshtardyń áserinen DNK buzylýdyń molekýlalyq mehazımderin zertteý salasynda zor tabysqa jetken.
Gúljan Moldajanova
Gúljan Moldajanova – Reseıdegi «Bazovyı holdıng» mekemesiniń bas dırektory. 1989 jyly Qazaq memlekettik ýnıversıtetin qyzyl dıplommen bitirgen. Keıin Máskeýge aspırantýrany oqyp, 27 jasynda ǵylym kandıdaty atandy. «Forbes» jýrnalynyń dereginshe, álemdegi eń bedeldi 100 áıel tiziminde Gúljan Moldajanova 37-orynda tur.
Nurshat Nurajyuly
Nurshat Nurajyuly QHR İle Qazaq avtonomıaly oblysy Shapshal aýdanynda dúnıege kelgen. Bastaýysh mektepte oqý úlgerimi úzdik bolyp, 3-synypty attap ótken. 15 jasynda Shyńjań ýnıversıtetine Hımıa mamandyǵy boıynsha oqýǵa qabyldanady. Keıin Nú-Iork qalalyq ýnıversıtetinde hımıa doktorlyǵy boıynsha bilim alǵan.
Tehas tehnologıalyq ýnıversıtetinde profesorlardyń qalaýymen jasaqtalyp, jabdyqtalǵan «Nurshat Nurajy atyndaǵy ǵylymı-zertteý tájirıbehanasy» bar.
Dostaı Ramanqulov
Dostaı Ramanqulov 1960 jyly qasıetti Túrkistan topyraǵynda dúnıege kelgen. Q. Sátbaev atyndaǵy Qazaq Ulttyq polıtehnıkalyq ýnıversıtetin bitirgen. Máskeýdiń joǵary oqý oryndarynda bilimin shyńdaǵan. 1998 jyldan beri Atom energıasy boıynsha halyqaralyq agenttik uıymynda jumys isteıdi. Osy uıymda istep júrip, adamzat úshin asa mańyzdy delingen ıadrolyq qaýipsizdikti saqtaý jolynda bilek sybanyp eńbek qyldy. 2005 jyly MAGATE atynan marapatqa laıyq dep tabylǵan 11 adamnyń ishinde Dostaı Ramanqulov ta bolǵan. Nobel syılyǵynyń qazaqtan shyqqan tuńǵysh ıegeri qazir Venada turady.
Qýat Esenov
Qýat Esenov – Pavlodar qalasyndaǵy daryndy balalarǵa arnalǵan №8 mektep-lıseıdiń túlegi. Birneshe jyl buryn álemdi tańdaı qaqtyryp, Gınnestiń rekordtar kitabyna engen. Oqýshy kezinde eki ret matematıka páninen dúnıejúzilik olımpıadada altyn medal alǵan. Bilimdi jigit nebir kúrdeli matematıkalyq teńdeýlerdiń sheshimin ońaı taýyp, AQSH oqymystylaryn aýzyna qaratqan. 2004 jyly AQSH-taǵy Massachýsets tehnologıalyq ýnıversıtetine qabyldanyp, PhD akademıalyq dárejesimen oqýyn támamdaǵan. Qýat Esenov qazir sol ýnıversıtette ǵylymı qyzmet atqarady.
Erkin Kitapbaev
Erkin Kitapbaev - Boston ýnıversıtetiniń profesory. Qazir magıstranttarǵa qarjy kýrsynan sabaq beredi. Sonymen qatar matematıkalyq qarjy salasynda zertteýler jasap, halyqaralyq jýrnaldarǵa maqalalaryn jarıalap turady.
Darhan Túıenbaev
Darhan Túıenbaev LIGO kollaborasıasynda 2014 jyldan beri jumys istep keledi. 2006 jyly QazUlttyq Tehnıkalyq Ýnıversıtetin «Avtomattandyrý jáne basqarý» mamandyǵy boıynsha bitirgen. 2011 jyly AQSH-qa baryp, San-Antonıo Tehas ýnıversıtetiniń PhD doktory dárejesin ıelengen. Darhan Túıenbaev halyqaralyq LIGO tobynyń quramynda Eınshteınniń gravıtasıa tolqyndary týraly boljamyn dáleldeýge qatysty.
