QR Tuńǵysh Prezıdenti - Elbasy qory janyndaǵy Álemdik ekonomıka jáne saıasat ınstıtýtynyń sarapshysy Jumabek Sarabekov QR Prezıdenti Nursultan Nazarbaevtyń BUU QK otyrysynda sóılegen sózine qatysty pikir bildirdi, dep habarlaıdy Qamshy.kz aqparat agenttigi Baq.kz-ke silteme berip.
«QR Prezıdenti Nursultan Nazarbaevtyń BUU Qaýipsizdik Keńesiniń otyrysynda jasaǵan málimdemesin halyqaralyq qaýymdastyqqa degen mańyzdy úndeý retinde qarastyrǵan jón. Qazirgi tańda halyqaralyq qaýipsizdik deńgeıi tómen ekenin baıqaýǵa bolady. Álemde ıadrolyq qarýdy paıdalaný qaýpi órship tur. Sodan soń aımaqtyq jáne jalpy jahandyq deńgeıde qarýly qaqtyǵystardyń geografıasy keńeıýde. Soltústik Koreıa tóńiregindegi daǵdarys pen Taıaý Shyǵystaǵy jalǵasyp jatqan qaqtyǵystar － munyń bári halyqaralyq qaýipsizdik jaǵdaıynyń nashar ekeninen habar beredi. Sondyqtan qazaqstandyq tarap osy jaǵdaıda álemdik qaýymdastyq músheleriniń, ásirese alpaýyt memleketter arasyndaǵy senim sharalaryn kúsheıtý kerektigi týraly aıtylýda. Sebebi olaı jasamasaq álemde qaıtadan qarý-jaraq jarysy bastalyp ketýi múmkin», - dedi ol.
Sarapshy ıadrolyq qaqtyǵysqa jol bermeý kerektigin de atap ótti.
«Odan bólek ıadrolyq qarýdan azat etý áreketterin jalǵastyrýymyz kerek. Qarý-jaraq aımaǵynyń, jalpy qarý-jaraqtyń kólemine shekteý qoımasaq jappaı qyryp-joıý qarýy lańkesterdiń qolyna túsý qaýpi bar. Sol úshin BUU-nyń 100 jyldyq mereıtoıyna deıin ıadrolyq qarýdan bas tartý boıynsha naqty qadamdar jasaý qajet. Iadrolyq qarýy bar memleketterdiń álemdik qaýymdastyǵy jaýapkershiligin sezinýge shaqyryp, ıadrolyq qaqtyǵysqa eshqashan jol bermeý kerek», - dedi Jumabek Sarabekov.
