Osy bir oılar sana túkpirinde júrgeli kóp boldy. Byltyr Qul-Kerim aǵanyń úıinde súıinip otyryp áńgimelep edik osy taqyryp tóńireginde. Bul ımamdar jaıly sóz bolatyn. «Ultqa qyzmetti osylardaı-aq jasaıyq!» -deıdi Kerim aǵa!

Ary qaraı kezektesip, túıdektelip kete berdi áńgime. Uzyn yrǵasy bylaı. Olardy memleket pálen aqsha tógip «Bolashaq» baǵdarlamasymen oqytqan joq, bireýi taıyn, bireýi taıynshasyn satyp ózderi oqyp keldi. Jáne qaı aýyldyń meshitine jiberseń de bas tartyp, kergimeıdi.

«Dıplommen aýylǵa» baǵdarlamasy da olardy aınalyp ótedi. Mereke saıyn merekelik jáne pensıa qoryna aqsha quıylyp turatyn biz sekildi búdjetten arnaıy aılyq almaıdy. (Qatelespesem, ótken jyldan beri ǵana Bas ımam men naıb ımamǵa berilip júr-aý). Sóıte tura qazaqtyqtyń da abyroıyn kóteretin osy meshit, ımamdar eken. Qarańyz, qazaqy taqıa men shapandy osylar kıedi. Sonymen birge ony sahnaǵa shyqqanda ǵana jylt etkizetin ártis-mazaq sekildi emes, anaý memlekettik jınalystarda, mártebeli minberlerde osy shapannyń shyn baǵasyn, ornyn áıgilep kıip júrgen ımamdardan basqa kimdi kórdińiz? Qarap otyrsańyz, táýelsizdik tarıhynda mıllıondaǵan adamǵa júz paıyz qazaqsha jınalys júrgizetin oryn — meshit qana eken. Jumaǵa jınalǵan jamaǵattan úlken jınalys bolǵan emes, bolsa qazaqsha ótkizilgen emes. (Osyndaıda ultty dinnen bóle qarap "ultshyl" atanǵysy keletin keıbir baýyrlarǵa "átteń-aı.." deısiń) Alaıda, memlekettik tilge bólinetin mıllıondardyń, mıllıondarǵa qazaqsha sóıleıtin meshitke bir tıyny bólinbeıdi!

Jemqorlardyń jemsaýynda ketedi. Ol qyzmetine aqsha suraǵan meshit joq. Oıyna da kirip shyqpaıdy. Alla dinin eshkimge muqtaj etpeıtini osydan-aq kórinip tur emes pe?! Qyzmetkerler meshitke sadaqaǵa túsken qarjydan bala-shaǵasynyń nápaqasyn aıyrady. Ol da eshkimniń úgit-zorlyǵynsyz dinge nıeti durys jamaǵattan túsken qarjy árıne. Sóıtip otyryp kedeı-kepshik, jetim-jesir, ǵaryp, qartta úıi, balalar úıi degenniń barlyǵy Allanyń úıi - meshitti jaǵalaıdy. Basqa bir mekemege tegin kómek (aqsha) surap barǵan adam balasyn kórdińiz be? Joq! Ósimdi qaryz berip, neshe ese qylyp jelkeńnen syǵyp alady.

Bul kúnde biz (kóbimiz) urpaǵymyzǵa ulaǵattylyq taratyp, ımandylyq jolyna úgitteıtin azamattardan góri, ánshi-bıshi, shoýshy, jyrtyńbaılardy kóp qolpashtaımyz. Týysymyzǵa qımaıtyn aqshany aıamaı tógip, toıǵa solardy shaqyramyz. Áıtpese, ómirińniń búkil mańyzdy kezeńinde qasyńnan tabylatyn din adamdarynyń, ımamdardyń orny bólek edi. Imam dep aıta bereıin, jalpy din tutqasyndaǵy adamdar ǵoı.

Balań týylǵanda qulaǵyna azan shaqyratyn kim? Imam. Ulyńdy súndetke otyrǵyzatyn kim? Imam. Úılengende bárinen mańyzdy bolǵan aq nekeni oqıtyn kim? Imam. Ómirden ótkende janazańdy oqıtyn kim? Taǵy da ımam. Onda da qazyqtaı qaqıyp shette turmaı, qaıǵydan qabyrǵasy sógilip otyrǵan týys-týmalarǵa basý aıtyp, kóńilderin jubatyp báıek bolatyn da sol ımam. Tipti keıbir jaqyn degen týystary máıitti jýýǵa kirmeı qoıǵanda, bilek sybanyp kiretin de ımam eken. Bul barlyǵymyzdyń basymyzda bolatyn jalpy jaǵdaıǵa baılanysty aıtyp otyrǵanymyz, jekelegen problemalarǵa baılanysty qınalǵanda keńes suraıtynymyz taǵy da sol kisiler.

Joǵaryda aıtqandaı ánshilerdi toıǵa shaqyramyz, pálen aqsha beremiz. Eń jáýtik degen ánshińe bes júz dollar bermeı toıyńa keltire almaısyń. Daıyn ánin kompúterge salyp aıtady da júre beredi. Rızalyqpen, japyryla sýretke túsip, súıip, sıpap shyǵaryp salamyz. Aqsha berdik dep esh ókinbeımiz de, sókpeımiz. Al, joǵarydaǵy búkil qyzmetti atqaratyn ımamdarǵa kelgende, paketke salǵan bir jambasty sóz qylatyndar bar... 

Biz bul jerde ımam ataýlyny sútten aq, sýdan taza dep otyrǵan joqpyz. Olaı bolmaıtynyn barlyǵyńyz bilesizder. Bári de salystyrmaly ǵoı. Olardyń ár qaısysynyń ıman, bilim deńgeıi ár túrli degendeı. Qurannyń Baqara súresinde «Jáne aıattarymdy az ǵana baǵaǵa aıyrbastamańdar (dúnıelik úshin burmalamańdar) da Menen ǵana qorqyńdar. (41)», — deıdi eken. Jańaǵy jambasty, keıbir konvertti bireýi aıat oqyǵanyna aqy retinde alsa, bireýi basqa nıetpen alatyn shyǵar. Tipti bireýleri almaıtyn da bolýy kerek. Ol jaǵyna bizdiń tisimiz batpaıdy, bilimimiz jetpeıdi. Sondyqtan o dep, bu dep aıta almaımyz jáne oǵan pátýá aıtý bizdiń sharýa emes. 

Sonymen, Allaǵa shúkir! Dinimizge memlekettiń qylyp jatqan qamqorlyǵy da az emes, ózgesin bylaı qoıǵanda salynyp jatqan meshitterdi aıtsaq ta jetip jatyr. Keıbir tyıymdar (mekemelerde namaz oqymaý degen sekildi) jan-jaqtaǵy túrli jaǵdaılarǵa baılanysty qoıylyp jatady. Ol da bizdiń qaýipsizdigimiz, elimizdiń tynyshtyǵy úshin dep bilemiz. Tynyshtyq bolmasa, qazaqylyǵyń da, tiliń de, toı da, ánshiń de ádirem qalmaı ma?! Meshit te, ımam da qaı jaǵdaımen kimge qyzmet qylmaq?
Bul jazǵanymyzda kemshilik te, qaıshylyq ta jetedi. Óıtkeni dinı taqyrypty qamtyp adam jazyp otyr ǵoı. Eldiń bári aqshasyn ánshige shashyp jatqan joq, (ánshiniń de ánshisi bar, biz elirme, zıankes, tákapparlaryn aıtyp otyrmyz) joǵaryda aıtyp otyrǵanymyz da jalpylyq jaǵdaı.

Allaǵa shúkir, el ishinde salıhaly sóz aıtar azamattardy tórge ozdyryp, nasıhatyn tyńdaıtyn aǵaıyndarymyz kóbeıip keledi. Óıtkeni, olar ózderin emes, Allanyń sózin, Allanyń aqıqatyn nasıhattaýshy. 

Qasıetti Ramazan aıynda elimizdiń ár óńirinde jamaǵatqa jatpaı-turmaı nasıhat aıtyp, izgilik jolyna shaqyryp, talmaı-talyqpaı taraýyq namazyn ótkizip jatqan ımam, qarılarymyzǵa shyn kóńilden rızashylyǵymyzdy bildirsek degen nıetpen osy joldardy jazdyq. Artyq-kemi úshin aıypqa buıyrmassyzdar! Alla olardyń isterine bereke bersin! Olardyń isteriniń berekeli bolǵandyǵynyń bir kórinisi - eldiń (bizdiń) ıman, biliminiń artqany. Alla bárimizdi eki dúnıeniń jaqsylyǵyna bólep, jeńildikterin násip etkeı! Bárimizge qos dúnıelik maqsattaǵy ıgi istermen aınalysýdy jazǵaı!

Ularbek Nurǵalymuly

Rýstem Ashetaevtyń feısbýk paraqshasynan alynǵan