Brıtandyq baǵdarlamalaýshy, DeepMind kompanıasynyń negizin salǵan Demıs Hassabıs jasandy ıntellektige qatysty sheshilmegen máselelerdiń kóp ekenin aıtady. 

Ol alǵashynda Lionhead stýdıasynda qyzmet atqaryp, keıin óziniń táýelsiz stýdıasyn jasap shyǵardy. 2010 jyly ózin ǵylymǵa arnap,  DeepMind kompanıasynyń negizin saldy. Búginde atalmysh kompanıa algorıtmderdi qurý boıynsha aldyńǵy qatarda tur.

Sońǵy eki jylda onyń kompanıasy álemdik jańalyqtardan jıi kórsetilip keledi. Sebebi Hassabıstiń AlphaGo  dep atalatyn jasandy ıntellekti «go» logıkalyq oıynynda Ke Sze kásibı oıynshysyn jeńgen bolatyn.

London ýnıversıtettik kolejinde ótken suraq-jaýap sesıasynda Hassabıs jasandy ıntellektige qatysty áli talaı máselelerdi sheshý kerektigin aıtty.

«Biz jaýap berýge tıis kúrdeli fılosofıalyq suraqtar áli de kóp. Máselen, bul júıelerdi qalaı basqaramyz? Olar bizge ne úshin qajet? Olardy qurastyrý úshin biz qandaı qundylyqtardy qurban etemiz?», - dedi Demıs Hassabıs.

Buǵan qosa, ǵalym jasandy ıntellektiniń adamzat úshin eń mańyzdy tehnologıa bolatynyn aıt otyryp, onyń qaýipti tusynyń baryn da eskertti. «Tek adamdardyń ony qalaı paıdalanatynyna baılanysty. Onyń saldary qandaı bolatyny belgisiz. Jaqsy da, jaman da bolýy múmkin», - dedi Hassabıs.

Aıta keteıik, 2014 jylǵy eleýli jetistikterden keıin DeepMind kompanıasyn Google korporasıasy £400 mıllıonǵa satyp alǵan bolatyn. Qaǵaz júzinde iri konglomerattyń bir bólshegi bolǵanymen, óziniń táýelsizdigin saqtap qaldy.