Ózbekstan Prezıdenti Shavkat Mırzıaev Aqordaǵa keldi, dep jazady Qamshy.kz aqparat agenttigi.

Búgin Astanada ótetin Ortalyq Azıa basshylarynyń kezdesýine qatysýǵa kelgen Ózbekstan Prezıdenti Shavkat Mırzıaevty Elbasy qabyldady.

QR Elbasy Ózbekstan basshysyn ystyq yqylaspen kútip aldy.

«Shavkat Myrza, qosh keldińiz Qazaqstanǵa, qatty kútemiz, saǵyndyq, kezdespegenimizge biraz boldy. Saǵyndyq. Kóp sharýalar jasap jatyrsyz. Kórshilerdiń bárine baryp qaıttyńyz. Barlyǵyn túzep jatyrsyz. Eki elimizdiń arasyndaǵy aınalym siz aıtqan 2 mıllıard dollarǵa jetti. Osy jyly kóptegen jumystardy atqardyq, kórshilerimizben dostyq qatynas ornattyq. Ondaǵan jyldar boıy sheshilmeı kele jatqan saýda-sattyq máselesin jáne basqa da máselelerdiń sheshimin taptyq. Ortalyq Azıa basshylarynyń kezdesýi jaıly pikirdi de siz aıtyp edińiz, búgin bes eldiń basshylary kezdesip otyrmyz. Biz barlyǵymyz baýyrlas eldermiz, saıası máseleler týyndaǵan emes. Osy jerde kóptegen máselelerdi – ekonomıka, ózara qarym-qatynas, saýda-sattyq, baılanys, transport máselelerin talqylaıtyn bolamyz», - dedi Nursultan Nazarbaev.

«Qurmetti Nursultan Ábishuly, men jáne bir márte sizdi kórgenime bek qýanyshtymyn. Álbette sizben kezdeskenimizden bergi bir jarym jyl ishinde eki dos halyq arasyndaǵy qarym-qatynas múlde basqa arnaǵa aýysty. Biz kútpegen nátıjelerge qol jetkizdik. Sizben kezdeskennen beri qaraı barlyq alańda ilgerileýshilik bar, ekonomıkalyq aınalymnyń bir jyldyń ishinde 2 mıllıard dollar bolǵany úlken nátıje. Basqa barlyq úmitterimiz ben senimderimizdiń oryndalǵany adamdardyń júzderinen aq kórinedi. Shekaralardy ashqanymyz, trazıtter men tarıfterdiń ózgergeni, tek temirjoldyń ózinde taýaraınalymy 44 paıyz paıyzǵa deıin ósý – úlken nátıje. Aldaǵy ýaqytta da birge kóptegen máselelrdi sheshetin bolamyz», - dedi Ózbekstan basshysy Shavkat Mırzıaev.

Aıta ketetin bolsaq, Ortalyq Azıa elderi, sonyń ishinde Qazaqstan Respýblıkasy, Qyrǵyz Respýblıkasy, Tájikstan Respýblıkasy, Túrikmenstan jáne Ózbekstan Respýblıkasy basshylarynyń jumys (konsýltatıvtik) kezdesýi 5 memlekettiń ishindegi jaǵdaılardy, ekonomıka, saýda-sattyq, ınfraqurylym, logıstıka, syndy barlyq máselelerdi sheshýge baǵyttalǵan.