Naýryz meıramyna arnalǵan baǵdarlama aıasynda elorda turǵyndary men qonaqtary EKSPO kórme kesheniniń aýmaǵynda biregeı etnoaýyl men taqyryptyq kıiz úı-mýzeılerdi, «Qazaq eli» monýmenti aldyndaǵy alańda «Dala qazyǵy» tarıhı ortaǵasyrlyq jekpe-jekter týrnırin, sondaı-aq qazaqstandyq estrada juldyzdary men jetekshi shyǵarmashylyq ujymdardyń qatysýymen teatrlandyrylǵan qoıylymdar men konsertter tamashalaı alady, dep habarlaıdy Qamshy.kz aqparat agenttigi mádenıet jáne sport basqarmasyna silteme jasap.  

EKSPO aýmaǵyndaǵy alań

Bıyl Naýryzǵa oraılastyrylǵan basty sharalar EKSPO kórme kesheniniń aýmaǵyndaǵy alańda ótedi. Munda 21 naýryzda saǵat 13:00-de merekelik baǵdarlama bastalady. Kórme aýmaǵynda qala turǵyndary men qonaqtary úshin etnoaýyl ashylady. Kelýshilerdi  qazaq halyq ertegileriniń keıipkerleri qushaq jaıa qarsy alady: Aldar Kóse, Qojanasyr, Tazsha bala jáne basqalary. Elordalyq teatrlardyń artıseri kórermenderdi ulttyq salt-dástúrlermen jáne ádet-ǵuryptarmen tanystyrady. Qyshshylar, zergerler, kıiz basý men sándik-qoldanbaly óner sheberleri qoldan jasalǵan buıymdaryn kópshilik naaryna usynady.

Etnoaýyl qonaqtarynyń arasynda qazaq kúresi, asyq atý, arqan tartý, armrestlıng jáne gir kóterýden saıystar ótkiziledi. Budan basqa, nıet bildirgen jandar «Qoı kóterý» syndy ulttyq oıynda kúsh synasady, altybaqan tebedi.

Kıiz úı qalashyǵynyń aýmaǵynda syıymdylyǵy 1000 lıtrlik taıqazan ornatylady, onyń janynda teatrlandyrylǵan qoıylym kórsetiledi. Sonymen qatar, jınalǵan qaýymnyń nazaryna jetekshi otandyq artıserdiń qatysýymen merekelik konsert usynylady. Etnoaýylǵa kelýshiler qazaq halqy ejelden ósirip kele jatqan tazy men tóbetter kórmesin tamashalaı alady.

Arnaıy uıymdastyrylǵan fýdkort aımaǵynda shyǵys aspazdyǵynan ystyq taǵamdar satylady. Etnoaýyl aýmaǵynda ornalasqan tórt kıiz úıden turatyn mýzeı kesheni kelýshilerdiń erekshe yqylasyna bólenbek.

Birinshi kıiz úı ejelgi túrki jazbasyna jáne mádenıetine arnalady. Munda ejelgi túrki jazbalary jazylǵan tas stellalardyń rekonstrýksıasy usynylǵan, ekskýrsıa júrgizýshiler adamdarǵa bul tarıh eskertkishteriniń paıda bolýy týraly aıtyp beredi.

Ekinshi kıiz úı «Ulttyq mýzykalyq aspaptar mýzeıi» dep atalady. Munda qonaqtar dombyra, narqobyz, daýylpaz, jetigen, syrnaı jáne basqa da eski aspaptardyń rekonstrýksıasymen tanysa alady, sondaı-aq atalǵan aspaptardy jasaý tarıhy men damýy týraly áńgimeler tyńdaıdy.

Úshinshi kıiz úı – «Ulttyq etnografıa jáne zergerlik buıymdar mýzeıi». Kelýshiler nazaryna qazaq halqynyń turmysyndaǵy eski zattar usynylady, atap aıtqanda, adalbaqan, jaǵlan, kebeje, júkaıaq jáne basqalary, sonymen qatar batysqazaqstandyq sheberlerdiń eski zergerlik buıymdary – sáýkele, óńirjıek, óńirtal, qudaǵı júzik, beldik, asataıaq jáne t.b. áshekeıler. 

Tórtinshi kıiz úı – «Ulttyq kilem ónimderi mýzeıi». Qonaqtar eski túkti jáne túksiz kilemderdi, sondaı-aq kıiz ben jibekten jasalǵan kilemderdi tamashalaıdy, al gıd olardy atalǵan buıymdardy jasaýdyń ejelgi tehnologıasymen tanystyrady.

Budan basqa, etnoaýylda 1775 jylǵy qazan ornatylady, 243 jyldyq oqıǵasy bar bul relıkvıem 1997 jyly qaıta qalpyna keltirilgen bolatyn.

EKSPO kórmesiniń aýmaǵyndaǵy merekelik baǵdarlama 22 naýryzda jalǵasyn tabady.

 «Qazaq eli» monýmentiniń aldyndaǵy alań

Naýryz meıramyna arnalǵan sharalar uıymdastyrylatyn taǵy da bir úlken alań – «Qazaq eli» monýmentiniń aldyndaǵy aýmaq bolmaq. Munda merekelik baǵdarlama 21-22 naýryzda saǵat 10:00-den 16:00-ge deıin ótkiziledi.

Kórermender qazaqstandyq estrada juldyzdarynyń, bı jáne aspapty ujymdardyń qatysýymen ótetin konsert pen teatrlandyrylǵan qoıylymdy tamashalaı alady.

Monýmenttiń aldyndaǵy alańda kıiz úı qalashyǵy ashylyp, altybaqandar, ulttyq sport túrlerinen jarystar ótkizýge arnalǵan sporttyq arenalar, sonymen qatar saýda palatkalary ornatylady.

21-22 naýryzda merekelik baǵdarlama aıasynda «Dala qazyǵy» tarıhı ortaǵasyrlyq jekpe-jekter boıynsha halyqaralyq týrnır uıymdastyrylady. Oǵan Qazahstan, Reseı, Ýkraına, Qyrǵyzstan jáne Ózbekstan memleketterinen 80-nen artyq rekonstrýktor qatysady dep kútilýde. Jarystyń birinshi kúni qalqan-semser, semser-bakler, bir jarymdyq semser, alebarda formatyndaǵy jeke saıystar, al ekinshi kúni komandalyq saıys ótkizilmek.

Qalalyq alań, «Stýdenttik» saıabaq, «Jastar» teatry jáne turǵyn alaptary

Munymen qosa, 21 jáne 22 naýryzda dástúrli halyqtyq serýender elordalyq ákimdik aldyndaǵy qalalyq alańda, «Stýdenttik» saıabaqta ótedi.

Qalalyq alańda jáne «Stýdenttik» saıabaqta kıiz úıler, altybaqandar ornatylyp, konsert bolady, ulttyq salt-dástúrler men ádet-ǵuryptar kórsetiledi. Merekelik konsertter men teatrlandyrylǵan qoıylymdar 22 naýryzda «Jastar» teatrynyń aldyndaǵy alańda da uıymdastyrylady.

Naýryzǵa oraılastyrylǵan sharalar elordanyń turǵyn alaptarynda 17 naýryzda bastaldy. Búginde Jeleznodorojnyı, Internasıonalnyı, Mıchýrıno jáne Promyshlennyı turǵyn alaptarynda Naýryz meıramy atalyp ótti. 21 naýryzda halyqtyq serýender Prıgorodnyı jáne Úrker, 22 naýryzda Kóktal-1 jáne Óndiris, 23 naýryzda Saraıshyq shaǵyn aýdanynda jalǵasyn tabady.

Ashyq aspan astynda ótetin aýqymdy sharalardan basqa Astana qalasynyń barlyq mádenı mekemelerinde Naýryzǵa oraılastyrylǵan sharalar da uıymdastyrylady.