Jýyrda bilim jáne ǵylym qyzmetkerleri kásipodaǵy Taldyqorǵan aýmaqtyq uıymy, oblystyq bilim basqarmasy jáne Almaty oblystyq kásipkerler palatasy 2018 - 2020 jyldarǵa arnalǵan áleýmettik áriptestik jónindegi úshjaqty Kelisimge qol qoıdy, dep habarlaıdy Qamshy.kz aqparat agenttigi Almaty oblysy ákimdiginiń baspasóz qyzmetine silteme jasaı otyryp.

Bul kelisimde bilim jáne ǵylym qyzmetkerleriniń áleýmettik jáne eńbek qatynastaryn retteý, áleýmettik turaqtylyq pen qoǵamdyq kelisimdi qamtamasyz etý, jumys berýshi men jumyskerdiń arasynda kelissózder júrgizý, eńbek daýlary týyndaǵan jaǵdaıda olardy der kezinde sheshýge járdemdesý maqsaty kózdelgen.

Qol qoıý rásmine Taldyqorǵan aýmaqtyq kásipodaq uıymynyń tóraǵasy S.Ábdiqadyrov, Almaty oblystyq bilim basqarmasynyń basshysy D.Júnisov, Almaty oblystyq kásipkerler palatasy dırektorynyń orynbasary A.Ońǵarbaeva, aýdandyq qalalyq kásipodaq komıtetteriniń tóraǵalary, aýdandyq jáne qalalyq bilim bólimderiniń, bilim berý mekemeleriniń basshylary qatysty.

Jıynda aýmaqtyq kásipodaq uıymynyń zańgeri Áset Turdyǵulov baıandama jasap, áleýmettik áriptestik jónindegi komısıanyń atqarǵan jumysyna toqtaldy. «Bıylǵy jyldan bastap Qazaqstan Respýblıkasynyń Eńbek Kodeksiniń 147-babyna sáıkes kelisimge jumys berýshilerdiń ýákiletti ókilderi, ıaǵnı úshinshi Tarap retinde Almaty oblystyq kásipkerler palatasy qosylyp otyr. Bul da óz kezeginde bilim berý salasy qyzmetkerleriniń quqyqtary men bostandyqtaryn zań negizinde qorǵaý jumysyna jańa serpin beredi dep oılaımyz», - dedi óz sózinde Á. Turdyǵulov.