Búgin Almaty oblysy ákiminiń birinshi orynbasary L. Turlashovtyń tóraǵalyǵymen oblystaǵy sý tasqyny qaýpi men aldyn alý sharalary týraly másele talqylandy. Bul taqyryp jóninde aldymen oblystyq tótenshe jaǵdaılar jónindegi departamenttiń basshysy Darynbek Baısarıev aıtyp berdi, dep jazady Qamshy.kz aqparat agenttigi Almaty oblysy ákimdiginiń baspasóz qyzmetine silteme jasaı otyryp.

Departament basshysynyń sózine súıensek, 23-25 aqpan aralyǵynda oblys aýmaǵynda erigen qar sýy turǵyn úı aýlalaryna kirý faktileri Eńbekshiqazaq, Jambyl, İle, Qarasaı, Talǵar aýdandary men Taldyqorǵan qalasynda tirkeldi. Qar sýynyń aýlaǵa kirýiniń eń birinishi sebebi aryq júıeleriniń bolmaýynan, burynnan bar ırrıgasıalyq kanaldardyń buzylýy nemese ústine basqa qurylystardyń júrgizilýi bolyp otyr.

«Bul óz kezeginde aýdan, qala ákimderiniń ózderine júktelgen mindetterdi jaýaptylyqpen atqarmaǵanynan týyndap otyr. Turǵyndar arasynda aryqtardy tazalaý, qardy úı mańy aýmaǵynan shyǵaryp tastaý týraly túsindirý jumystaryn júrgizý kerek. Sol sıaqty aryq-kanaldardy, sý jiberý qubyrlaryn tazalaý isi de óz deńgeıinde emes. Ásirese, Raıymbek, Kerbulaq, Jambyl aýdandary bul baǵytta ózderin qamshylaýy tıis», - dedi D. Baısarıev. Sonymen qatar Kazgıdromettiń boljaýynsha, aldaǵy kúnderde +15 gradýsqa deıin kóterilip, eki kún qatarynan jaýyn-shashyn bolatynyn da eskertti.

Barlyq aýdan, qala ákimderine sóz berilip, olar óz aýmaqtaryndaǵy ózen-kólder sýlarynyń deńgeıi turaqty baqylanyp, táýlik boıy kezekshilik uıymdastyrylyp otyrǵanyn, aryqtardy, kanaldardy tazalaý jumystary júrgizilip jatqanyn, jedel áreket etý otrádtary qurylyp, quramy, tehnıkasy ázir ekenin baıanadady.

Talǵar, İle, Qarasaı, Jambyl aýdandary da sý kirgen aýlalardan sý shyǵarý jumystarynyń jedel uıymdastyrylǵanyn, adam kúshi men arnaıy tehnıka jumyldyrylǵanyn aıtty.

Jıyn sońynda L. Turlashov:

- Kóktemgi sý tasqynynyń aldyn alý sharalary - jyl saıyn jasalatyn jumys, aýdan, qala ákimderi úshin jańadan bastap jatqan sharýa emes. Sondyqtan ár ákim óz óńirlerindegi ózen-kólderdiń, aryq, kanaldardyń jaǵdaıyn, qaýip qaı tustan kelýi múmkin, qaı jerlerdi bekitý kerek degen sıaqty jaǵdaıdy ábden meńgerip alýy kerek. Otrádtardaǵy adam kúshi, tehnıkalar men quraldar – barlyq resýrstaryńyz daıyn bolsyn. Barlyq sý qoımalarynyń jaǵdaıyn baǵamdap, qorytyndy daıyndańdar. Óńirdegi gıdrotehnıkalyq ǵımarattardyń sý jınaý kólemin aıqyn bilip otyryńyzdar. Aryqtar men kanaldardy qardan, qoqystan tazalaý úshin jer-jerde arnaıy senbilikter uıymdastyrý kerek. Aldaǵy kúnderde kúnniń jylynatyny, jaýyn-shashyn bolatyny boljanyp otyr. Sondyqtan sý tasqyny qaýpiniń aldyn alý jumystary kún tártibinen túspeıdi. Qaıta bul sharalardy barynsha kúsheıtýimiz kerek, - dedi qorytyndy sózinde.