Taldyqorǵanda Almaty oblystyq Din isteri basqarmasynyń uıymdastyrýymen «Ǵıbratty qazyna» atty rýhanı kesh ótti. Tanymal dintanýshy mamandar men óreli óner ıeleriniń basyn qosqan ıgi shara bir-birinen bóle qaraýǵa bolmaıtyn din men dástúr sabaqtastyǵyn jan-jaqty dáripteý arqyly halyqtyń dinı saýatyn arttyrýǵa baǵyttalǵan.
Eki aıda bir kórsetiletin baǵdarlama jergilikti «Jetisý» telearnasynan beriledi. Dinı baǵdarlamaǵa teolog mamandary jáne qyzýǵyshylyq tanytqan adamdar qatysa alady. Onda barlyq Almaty oblysynyń turǵyndary kókeıinde júrgen suraqtaryna jaýap ala alady.
Basqosýda aldymen belgili dintanýshy Aıbek Nábı ıslam dininiń kirshiksizdigi, qazaq halqynyń tarıhı ustanymy jaıynda jan-jaqty túsindirip berdi. Osydan soń belgili aqyn, tintanýshy Kámnur Tálim: «Ultymyzdyń ǵasyrlar boıy sana-sezimderine sińip, salt-dástúri bolyp qalyptasqan dinı ustanymdarynyń orny erekshe. Sebebi, bul qazaqtyń uly ǵulama, aqyn-jazýshylarynyń danalyq sózderi, jyr-dastandary arqyly, jurt júreginen tereń oryn alǵan. Oǵan keshegi qıyn qystaý zamandarda qarsy qoıylǵan nebir qıturqy áreketter de esh bóget bola almaǵan. Qaıta, urpaqtan urpaqqa tarap, tól mádenıetimizben ádep-ǵurpymyzdyń altyn arqaýyna aınaldy. Búgingi jastar ata-babalarymyz ustanǵan sol baǵyttan taımasa esh adaspaıdy» – dedi.
Sonymen qatar, oblys turǵyndarynyń dinı saýatyn arttyrýmen qatar, dástúrli emes dinı baǵyttarǵa qarsy ımýnıtet qalyptastyrý maqsatynda túrli formatta is-sharalar ótkiziledi.
Ótken jyly oblys boıynsha din máselesin túsindirýde jalpy 3274 is-shara ótkizilip, oǵan 247 907 adam qatysty. Ol aldynǵy jylǵy salystyrmaly sharalar sanymen 77-ge artyp otyr.
Shara barysynda ónerpazdar din men dástúr sabaqtastyǵyn ultymyzdyń ot aýyzdy, oraq tildi sheshenderiniń terme-tolǵaýlarymen jetkizse, kesh júrgizýshisi Jumahmet Jaılaýbaev danalar sózi men túıindedi. Keshti qorytyndylaǵan oblystyq Din isteri basqarmasynyń basshysy Rahmet Esdáýletov bul shara jastardyń din týraly túsinigin aıqyndap, dinı ekstremızm men terorızmniń aldyn alýǵa tıgizer paıdasy zor dep atap kórsetti.
«Din máseleleri jónindegi aqparattyq-túsindirý toptary elimizdegi úılesimdi konfesıaaralyq qarym-qatynasty qalyptastyrýǵa, nyǵaıtýǵa, halyqtyń dinı saýatyn arttyrýǵa, dinı ekstremızm men terorızmniń aldyn
alýǵa baǵyttalǵan aqparattyq-nasıhat túsindirý jumystaryn iske asyrý úshin qurylǵan. Osymen birge, oblysta ártúrli ult ókilderiniń kóptigine baılanysty mısıonerlik qyzmetpen kelgen din ókilderi men qurylǵan dinı birlestikter jumys atqarýda», - dedi R.Esdáýletov.
Aıta ketý kerek, oblystyq din isteri basqarmasynyń taǵy bir tyń jańalyǵy «Rýhanı kerýen» atty kitaptyń shyǵýy boldy.
