Almaty oblystyq ishki saıasat basqarmasy men óńirlik komýnıkasıalar qyzmetiniń uıymdastyrýymen «Smart Zhetysu» jobasy aıasynda qoǵam qaıratkeri, saıasatker, jýrnalıs Ámirjan Qosanov, belgili saıasattanýshy Aıdos Sarym, jýrnalıs-sarapshy Nurlan Nurǵazınmen kezdesý ótti. Alǵashqy sózdiń tizginin alǵan Ámirjan Saǵıdrahmanuly elimizde atqarylyp jatqan memlekettik mańyzy bar oqıǵalarǵa toqtaldy.

«Men ózim spıchraıtermyn, tekstologpyn. Osy turǵydan alǵanda, Elbasynyń bıylǵy Joldaýy eń álsiz joldaý boldy dep aıta alamyn. Onyń túrli sebepteri bar». Taldyqorǵanda stýdent jastarmen kezdesken belgili saıasattanýshy Aıdos Sarym bıylǵy joldaý týraly stýdent saýalyna osylaı dep jaýap berdi.

«Elbasy Joldaýy týraly san túrli pikirler aıtylyp jatyr. Jaqtaýshylar da, dattaýshylar da bar. Sizdiń pikirińiz qandaı?» degen saýaldy İ.Jansúgirov atyndaǵy Jetisý memlekettik ýnıversıtetiniń stýdenti Aqmaral Mámet qoıdy.

«Árıne, túsinem jyl saıyn tań qaldyratyn Joldaý jasaý qıyn. Aldymen alǵashqy Joldaýlarda qoıylǵan maqsattarǵa jetip alýymyz kerek. Sonan keıin ǵana kelesi kezektegi mindetterdi oryndaýymyz shart» deıdi saıasattanýshy. Aıtýynsha, mundaı mańyzdy qujattar jyldyń basynda emes, sońynda jasalǵany durys. «Bundaı mańyzdy strategıalardy oryndaý úshin atqarýshy bılikke tıisti deńgeıde daıyndyq kerek. Iaǵnı, jyl basyna kemi 2-3 aı qalǵan ýaqytta Joldaý jasalsa, kelesi jyly soǵan sáıkes jospar daıyndalady. Sonda jumys nátıjelirek bolady» dep atap ótti spıker.

– «Rýhanı jańǵyrý» baǵdarlamasyn halyq qoldaǵanymen, oryndalý barysynda keıbir kemshilikter bar. Ony ashyq aıtýǵa tıispiz. Oǵan ulttyq, tarıhı, qoǵamı jaýapkershilik turǵysynan qaraýymyz kerek. Baǵdarlamada ulttyq ustanym, ustyn, qazaqtyń bolmysyna ǵana tán nárseler ashyq aıtylǵan. Bul úlken geosaıası jaǵdaıdaǵy batyl qadam jáne memlekettik qurylymdarǵa baǵdar, – dep naýqanshylyq bolmaýyn, keıbir jazýshylar 60, 70 jyldyq mereıtoıdy «Rýhanı jańǵyrý» aıasynda ótkizip jatqandyǵyn aıtty. – Men oǵan qarsymyn. Kózqaras meıilinshe salmaqty, sarabdal jáne jaýapkershilikti bolýy qajet. Biz qazaq qoǵamymyz, bizdiń keleshegimiz qazaq halqynyń erteńgi kúni. Osy baǵytta urpaq tárbıeleý barshamyzǵa artylǵan mindet, – dep oıyn túıindedi. Aıdos Ámirollauly bolsa, qoǵamda kóńiline jaqpaıtyn jaman úrdistiń, nemquraılylyqtyń baryn tilge tıek etti.

Kezdesý barysynda ártúrli suraq qoıylyp, soǵan saı tushshymdy jaýap berildi. «Rýhanı jańǵyrý» baǵdarlamasyn buqara halyqqa uǵyndyrý joldary baıandalyp, osy turǵyda óskeleń urpaqty tárbıeleý tetikteri mysalǵa keltirildi.

– «Rýhanı jańǵyrýǵa» óte bir jeńil kózqaraspen qarap kele jatqan sıaqtymyz. Modernızasıany keıbir azamattar «eýroremont» dep túsinedi. Eshbir el, qoǵam modernızasıany jaqsylaqtan jasamaıdy. Ol túńilýdiń, rýhanı daǵdarystyń nátıjesinde dúnıege keledi. Jaqsy damyǵymyz kelse, búgingi bolmysymyzdaǵy, turmysymdaǵy biraz nárseden bas tartýǵa májbúrmiz. Osyny istemesek, onda kóptegen jumysymyz nátıjesiz qalady. Modernızasıa – ómir men ólimniń tańdaýy. Súreńsiz ómir ol da ólim. Baqytsyz ǵumyr keshý – ólýdiń uzaq merzimdi túri. Ómirge degen qulshynys, paıym artqanda ǵana jetistikke jetemiz. Sondyqtan rýhanı kúızelisterdi durys qabyldap, túsinýimiz kerek, – dep elge uǵyndyrý joldary, jastardyń sanasyna serpilis jasaý turǵysynda pikir bildirdi. Elbasynyń maqalasynda aıtylǵan ulttyq qundylyqqa qatysty tustardy tereńinen túsindergen Nurlan Nurǵazın táýelsizdik alǵaly beri qazaq tiliniń áli de damymaı jatqandyǵyn jetkizdi. Ol úshin aldymen el aǵalary osy máselege mán berý kerektigin alǵa tartty, - dep túıindedi belgili saıasattanýshy Aıdos Sarym.