«Qyran - 2018» respýblıkalyq búrkitshi týrnıriniń jas jeńimpazy atanǵan Almaty oblysynyń turǵyny óziniń sheberlik qupıalarymen bólisti.
Qazaqtardyń ómirinde ańshy qustar - búrkittermen ańǵa shyǵý erekshe mańyzǵa ıe. Halyq sportynyń osy bir erekshe túri kóp qoldanylmasa da, bul dástúr áli saqtalyp keledi jáne tarıh qoınaýyna enip ketken joq.
Munyń barlyǵy ata-babasynan ańshylyq dástúrdi saqtap kele jatqan búrkitshilerdiń arqasy. Baýyrjan Seıitjan otbasy - osynyń aıqyn dáleli.
Baýyrjannyń Aıan, Almas, Bekasyl jáne Beksultan atty tórt uly bar. Taıaýda úıdiń úshinshi uly Bekasyl - Qazaqstannyń túpkir-túpkirinen jınalǵan búrkitshi-sheberlerdiń basyn qosqan «Qyran - 2018» týrnırinde jeńimpaz atandy.
«Bul men úshin úlken jetistigim. Osy dástúrge baýlyp, batasyn bergen atama rahmet. Bizdiń otbasymyzda barlyǵy ańshylyqpen aınalysady. Árkimniń óz qusy bar. Meniń búrkitimniń aty Hantáńir. İnim Beksultan áli kishkentaı, sondyqtan ol qarshyǵa Kókjendetpen ańǵa shyǵady», - dedi jas chempıon.
Qazir Bekasyl 13 jasta. Ol Almaty oblysy Eńbekshiqazaq aýdany Sóget aýylyndaǵy O.Jandosov atyndaǵy orta mekteptiń 7-synyp oqýshysy. Ol súıikti kásibimen segiz jasynan aınalysa bastaǵan.
«Bul iste únemi sheberlikti qaırap, óziń úshin jańa nárse úırenip otyrý mańyzdy. Eń bastysy - óz qyranyńa mahabbatpen qarap, ony aıalaı bilý, ony durys tamaqtandyryp, ısharany úıretý kerek. Sebebi, ıen dalada onymen birge jalǵyz qalasyń», - dep qupıasymen bólisti jas búrkitshi.
Aıta keteıik, Bekasyl bul áýestikten bólek eki jyldan beri qazaqsha kúreske qatysady. Mektepte de sabaqty jaqsy oqıtynymen kózge túsken. Alaıda, ázirge bolashaq mamandyǵyn tańdap úlgermegen.
«Árıne, tek quspen ómir súre almaısyń. Sondyqtan bolashaqta suranysqa ıe mamandyqty ıgerý qajet. Quspen ańshylyq jasaýǵa keler bolsaq - bul bizdiń halyqtyń ulttyq dástúri. Biz ony saqtap qalýymyz kerek. Qazir bizdiń elimizde qazaq halqynyń mádenı-rýhanı murasyn jańǵyrtýǵa kóp kóńil bólinetini qýantady», - dedi chempıonnyń ákesi Baýyrjan Seıitjan.
Eske sala ketsek, 8 jasynan qolyna qyran qondyryp, búrkit baptaǵan Almaty oblysy Eńbekshiqazaq aýdanynyń turǵyny, 13 jastaǵy Beksultan Seıitjan týrnırdiń bas júldesin jeńip alǵandyǵy týraly habarlaǵan bolatynbyz.
