Turan dalasyn meken etken qazaq pen ózbektiń mádenı hám diniı baılanysy ejelden etene jaqyn. Memlekettik deńgeıdegi baýyrlastyq Mırzeevtyń prezıdenttik kezeńinen keıin odan ári jandana tústi. Bıyl Qazaqstanda Ózbekstan jyly bolyp jarıalanǵany aǵaıyndy qazaq-ózbek halyqtarynyń arasyndaǵy yntymaqtastyq jańa deńgeıge kótere túsetini daýsyz.

Búgin Qazaqstan Respýblıkasynyń Din isteri jáne azamattyq qoǵam mınıstri Darhan Káletaev Ózbekstannyń Qazaqstan Respýblıkasyndaǵy Elshisi Saıdıkram Nıazhodjaevpen kezdesý ótkizdi, dep habarlaıdy Qamshy.kz aqparat agenttigi QR Din isteri jáne azamattyq qoǵam mınıstrliginiń baspasóz qyzmetine silteme jasap.

Kezdesý barysynda eki jaqty yntymaqtastyqty odan ári damytý máseleleri talqylandy. Darhan Káletaev eki el arasynda dostyq jáne baýyrlastyq qarym-qatynas qalyptasqanyn atap ótti.

Mınıstrdiń aıtýynsha, 2018 jyly Qazaqstandaǵy Ózbekstan jylynyń aıasynda baýyrlas elder arasyndaǵy dostyqty odan ári nyǵaıtýǵa yqpal etetin túrli is-sharalar ótkiziletin bolady.  

Kezdesýde 2017 jylǵy 10 naýryzda Qazaqstan men Ózbekstannyń Qaýipsizdik keńesteri arasyndaǵy konsýltasıalar sheńberinde qol jetkizilgen ýaǵdalastyqtardy iske asyrý aıasynda dinı qyzmetti retteıtin ýákiletti memlekettik organdar arasynda memorandýmǵa qol qoıý máselesi talqylandy.  

D. Káletaev jaqyn arada yntymaqtastyqtyń basym baǵyttaryn kórsetetin atalǵan Kelisimge qol qoıylatynyna senim bildirdi.

Ózbekstannyń Qazaqstandaǵy Elshisi Saıdıkram Nıazhodjaev eki el jastarynyń forýmyn ótkizý, dinı týrızmdi damytý boıynsha birlesken jumysty uıymdastyrýdy usyndy.

Kezdesý sońynda taraptar din, azamattyq qoǵam jáne jastar saıasaty salasyndaǵy yntymaqtastyqty odan ári tereńdetýge nıet bildirdi.

Aıta ketetin bolsaq, naýryz aıynda ǵana QMDB bas múftıi Serikbaı Qajy oraz Ózbekstanǵa jasaǵan resmı sapary barysynda eki eldiń múftıleri din salasyndaǵy uzaqmerzimdi yntymaqtastyqty ornatýǵa arnalǵan qujatqa qol qoıǵan bolatyn.