Maqtaral aýdanynda sybaılas jemqorlyqty boldyrmaý jáne aldyn alý maqsatynda alqaly májilis ótti.  Jıynǵa OQO ákimi aparatynyń personaldy basqarý qyzmeti bóliminiń bas ınspektory M. Qydyrbekov,   aýdan ákimi J.Beısenbaev, aýdan prokýrory N. Asqanbekov, maslıhat hatshysy M. Jaılymshıev, aýdandyq "Nur Otan"   partıasy tóraǵasynyń orynbasary Á. Baıdýllaev jáne  quqyq qorǵaý organdarynyń, qala, kent aýyldyq okrýg ákimderi, mektep dırektorlary qatysty.

Elbasymyzdyń "Qazaqstan-2050" strategıasynda, "100 naqty qadam" ult josparynda belgilengen sybaılas jemqorlyqpen kúresý is-sharalarynyń Maqtaral aýdanynda júzege asýy týraly jıyndy aýdan ákimi J. Beısenbaev júrgizip otyrdy.

Eń aldymen OQO ákimi apparatynyń personaldy qyzmet bóliminiń bas ınspektory Ahmet Saqabaevqa sóz kezegi berildi. Ol qoǵamnyń dertine aınalǵan sybaılas jemqorlyqtyń aldyn alý boıynsha oblysymyzda atqarylyp jatqan jumystar týraly baıandama jasady. Sondaı-aq, Sybaılas jemqorlyqqa qarsy is-qımyl Ulttyq búrosy OQO boıynsha departamentiniń Maqtaral aımaǵy aýdanaralyq basqarmasynyń asa mańyzdy ister jónindegi ofıseri Marat Orazov sóz sóıledi.

Jıyn barysynda sybaılas jemqorlyqpen ustalǵan memlekettik qyzmetkerler týraly daıyndalǵan arnaıy vıdeorolıkter kórsetilip, qoǵamnyń jegi qurty sanalǵan qylmystyń elimizge keltiretin zıany týraly aıtyldy. Sondaı-aq, uzaq jyldan beri memlekettik qyzmette júrgen aýyldyq okrýgtiń ákimderi, mektep dırektorlary óz tájirıbelerimen bólisip, bul dertpen kúresýdiń tıimdi tásilderin qoǵamnyń nazaryna usyndy.   

Májilisti qorytyndylaǵan aýdan basshysy J.Beısenbaev sybaılas jemqorlyqqa qarsy kúresti kúsheıtý maqsatynda arnaıy 5 negizgi ustanymdy usyndy.

"Birinshiden, qoǵamnyń dertine aınalǵan sybaılas jemqorlyqqa qarsy kúresti árbir memlekettik qyzmetker birinshi ózinen bastaýy kerek. Ekinshiden, sybaılas jemqorlyqpen kúresý barlyq Qazaqstan Respýblıkasy azamattarynyń azamattyq boryshy dep bilý kerek. Úshinshiden, el bolam deseń, besigindi túze degendeı, biz sybaılas jemqorlyqpen kúresti besikte jatqan baladan, bala tárbıesinen, balabaqshadan bastap, mektep qabyrǵasynan, joǵary oqý oryndarynan árbir jetkinshektiń, árbir  búldirshinniń, árbir oqýshynyń, shákirttiń, sanasyna sińire bilýge tıispiz. Tórtinshiden, árbir memlekettik qyzmetker sońǵy zamanaýı tehnologıalardy jetik meńgerýi tıis. Keleshekte barlyq memlekettik qyzmet túrleri 100 paıyz elektrondy túrde kórsetiletin bolady. Besinshiden, árbir memlekettik qyzmetker Ádep kodeksinde kórsetilgen tártipterdi qatań saqtap, el men halyqpen sóıleskende asa uqyptylyqpen, erekshe yqylaspen, ádeptilikpen sóılese bilýi kerek" - dedi Jamantaı Qanaıuly.