Aq Jaıyq óńirindegi áleýmettik-ekonomıkalyq damýdaǵy basym baǵyttardyń biri – eldi mekenderdi gazben jabdyqtaý. Oblysty tabıǵı gazben jabdyqtaý negizinen tórt «Ortalyq Azıa – Ortalyq», «Orynbor – Novopskov», «Qarashyǵanaq – Oral», «AGRS Jympıty-Qaratóbe» magıstraldy qubyry arqyly júzege asyrylýda.
Batys Qazaqstan oblystyq energetıka jáne turǵyn úı komýnaldyq sharýashylyǵy basqarmasy basshysynyń orynbasary Qýanysh Sharafýtdınniń aıtýynsha, Batys Qazaqstan oblysyn gazben qamtamasyz etý jumystary 2006-2007 jyldardan bastap qarqyn alǵan.
-Sol jyldary «Batys Qazaqstan oblysynyń eldi mekenderin gazdandyrýdyń 2006-2008 jyldarǵa arnalǵan aımaqtyq baǵdarlamasynyń» ákimshisi oblystyq qurylys basqarmasy boldy. Atalmysh baǵdarlama aıasynda 21 eldi mekenge tabıǵı gaz jetkizilip, sáıkesinshe eldi mekenderdiń gazben jabdyqtalý kórsetkishi 26%-dy nemese 137 aýyldyq eldi mekendi qurady. Sonda aýyl turǵyndaryn tabıǵı gazben qamtamasyz etý úlesi 45%-dy, al oblysqa shaqqanda 68%-dy qurady. 2008 jyldan bastap eldi mekenderdi gazdandyrý jumystaryn BQO-nyń energetıka jáne turǵyn úı komýnaldyq sharýashylyǵy basqarmasy iske asyryp keledi. Qazirgi ýaqytta Oral men Aqsaı qalalary, oblystyń 12 aýdan ortalyqtary tutastaı kógildir otynmen qamtamasyz etilip, jelilik gaz qubyry tartylǵan jáne aımaqtaǵy barlyq eldi mekendi gazdandyrý jumystary odan ári jalǵasýda,- deıdi ol.
2008-2017 jyldary aralyǵynda óńirdegi 153 eldi mekenge tabıǵı gaz jetkizilgen, oǵan 25,4 mlrd. teńge qarjy jumsalǵan. Ótken jyldyń qorytyndysy boıynsha oblys turǵyndarynyń gazben qamtylý úlesi 94%-dy, onyń ishinde aýyl halqynyń sany boıynsha 88%-ǵa jetti.
Bıyl Bókeı ordasy aýdanynyń 11, Aqjaıyq aýdanynyń 11, Jánibek aýdanynyń bir eldi mekeniniń turǵyndary gazdyń raqatyn kóredi dep kútilýde. Sonda oblys turǵyndarynyń tabıǵı gazben qamtylý úlesi 95%-ǵa jetedi. Sonymen qatar QR Energetıka mınıstrligine jáne BQO ekonomıka jáne búdjettik josparlaý basqarmasyna jalpy quny 3,2 mlrd. teńgeni quraıyn búdjettik ótinim joldanǵan. Osy ótinim negizinde búdjettik qarajat bólingen jaǵdaıda, qaralǵan qarjyǵa Zelenov aýdanynyń bir, Qaztalov aýdanynyń 13, Terekti aýdanynyń 13 eldi mekeni gazben qamtylady. Sonda oblys turǵyndarynyń tabıǵı gazben qamtylý úlesi 97%-ǵa, onyń ishinde kógildir otynmen qamtylǵan aýyl halqynyń sany 92%-ǵa jetedi. Jalpy gazdandyrý jumystarynyń arqasynda turǵyndardyń ómir súrý sapasy jaqsara túspek.
