Jumys sapary barysynda Almaty ákimi Baýyrjan Baıbek úsh jańa kólik jolaıryqtarynyń qurylysyn tekserdi jáne Abaı men Nazarbaev dańǵyldaryn odan ári úńgileý jumystarymen tanysty.

Megapolıs basshysy qala ınfraqurylymyn damytýda keshendi ádistiń mańyzdy ekenin atap ótti. Eger ortalyqta kósheler júrginshiler qalaýyna saı qaıta jańarsa, al qala aınalasynda kólik qozǵalysynyń legi úshin qajetti jaǵdaıdy jasaǵan jón.

Nazarbaev dańǵylyn Jansúgirov kóshesine deıin úńgileý «Soltústik - Ońtústik» baǵytynda Seıfýllın dańǵyly boıynsha kólik júktemesin edáýir azaıtady. Qazirgi kezde munda estakada qabyrǵalaryn montajdaý jáne nysannyń tirekterin jasaý jumystary júrýde. Osy ýchaskede kólik qozǵalysyn belgilengen merzimnen eki aı buryn, ıaǵnı qazan aıynda ashý josparlanǵan.

Óz kezeginde Seıfýllın dańǵyly men Jansúgirov kóshesi boıyna jolaıryǵyn salý kólik qozǵalysy legin 20%-ǵa arttyrady. Qurylysty aıaqtaý 2019 jyldyń tórtinshi toqsanyna josparlanǵan.

Rysqulov dańǵyly men Qulja traktisiniń qıylysynda da jańa jolaıryǵy salynýda, bul soltústik-shyǵys baǵyttaǵy kishi kólik aınalymynyń kólik ótkizý qabiletin arttyrady. Qazirgi kezde munda estakada tireýiniń astyna óndiris qondyrǵylary ornatylýda jáne ınjenerlik jeliler qaıta aýystyrylýda. Rysqulov dańǵyly men Emsov kóshesi boıyna da jańa jolaıryǵy boı kóterýde.

Naýryzbaı aýdanyn ortalyqpen qosý úshin Shalápın jáne Jandosov kóshelerine basymdylyq berilýde, Abaı dańǵylyn Momyshuly kóshesinen qala shekrasyna deıin úńgileý jalǵasýda.

Aıta keterligi, bıylǵy jyly megapolıste buryn qaıta jasalǵan Panfılov, Jibek Joly, Gogol, Qabanbaı batyr, Baıseıitova,Tólebaev kósheleri men «Astana» alańynan ózge megapolıstiń birqatar negizgi dańǵyldary jańarady. Qalanyń barlyq aýdandarynda 150-den astam kóshe jóndelip, 600 aýla qaıta jańarady.