Tólebı aýdanyndaǵy B.Bıbolatuly atyndaǵy jalpy orta mekteptiń oqýshylary Esimhan ordasy tóbeshiginde «Esimhan tusyndaǵy qazaq handyǵy» taqyrybynda ashyq sabaqqa qatysty.

Elbasynyń baǵdarlamalyq maqalasynda patrıotızm týǵan jerdiń tarıhyn tanyp, bilýden bastalatyny aıtylǵan. Osyǵan oraı, «Rýhanı jańǵyrý» oblystyq jobalyq keńsesiniń qoldaýymen mektep oqýshylaryna Qazaqstan tarıhy pánin kıeli jerlerde oqytý arqyly ólkeniń tarıhyn, ondaǵy bolǵan oqıǵalardyń erekshelikterimen tanystyra otyryp, kıeli oryndardy zertteý arqyly tanymyn qalyptastyrý, ulttyq qundylyqtardy qadirleýge úıretý is-sharasy qolǵa alyndy.

Ólketanýshy Ómir Shynybekulynyń aıtýynsha, arheolog -ǵalymdar Keńesaryq aýylyndaǵy Tórtkúltóbeni tarıhı oryn ekendigin budan buryn da aıtyp, zańdy túrde dáleldep qoıǵan. Derekterge súıensek, Esim han jaýgershilik zamanda óz ordalarynyń birin dál osy Tórtkúltóbeniń mańynan tikken eken. Al tarıhı nysannyń hronologıalyq sheńberine kóz júgirtsek, sonaý Túrkesh qaǵanatymen astasyp jatqanyń baıqaýǵa bolady. Mońǵol-tatar shapqynshylyǵy kezinde bul tóbe mańyndaǵy mádenıet jermen-jeksen bolǵan eken. Mundaǵy tabylyp jatqan qumyralardy arheolog mamandar shamamen eki myń jyl buryn jasalǵan degen boljam aıtýda. Al, jalpy, mundaı jádigerlerdiń Keńesaryq turǵyndary arasynda birazy kezdesedi, ishine adam syıyp ketetin qumyranyń tabylǵanyn bilemiz.

- «Esimhan tusyndaǵy qazaq handyǵy» taqyrybynda ótken ashyq sabaq maǵan unady. Buǵan deıin mundaı sabaq ótkizilmegen. Synyptan góri kıeli, tarıhı orynda ótken sabaqtan alǵan áserimiz mol. Muǵalim bizge qasıetti jerdiń tarıhyn, onyń shyǵý sebebi turaly tolyq maǵlumat berdi- dedi mektep oqýshysy Jaqsylyq Dastan.