Imanǵalı Tasmaǵambetov eýropalyq bıznesmenderdi eýrazıalyq transport dáliziniń múmkindigin paıdalanýǵa shaqyrdy, dep habarlaıdy Qamshy.kz aqparat agenttigi. 

Qazaqstan Respýblıkasynyń Tótenshe jáne Ókiletti Elshisi Imanǵalı Tasmaǵambetov Reseı elindegi Germanıa Federatıvti Respýblıkasynyń uıymdastyrýymen ekonomıkalyq baǵytta órbigen "Eýropalyq keńes – Eýrazıalyq Ekonomıkalyq Odaq" atty pikir talas alańyna qatysty.

Osy jıynda sóz sóılegen Elshi myrza, Eýrazıalyq Ekonomıkalyq Odaqtyń negizi qalanyp, onyń ári qarqyn alýy eń aldymen Qazaqstan Prezıdenti Nursultan Nazarbaevtyń arqasynda bolǵanyn erekshe atap ótti.

"Eýropalyq Odaq qalyptasqan úrdis boıynsha Eýrazıalyq ekonomıkalyq odaqtyń saýda-sattyq salasy boıynsha negizgi seriktesine aınalǵan. EEO elderi Eýropalyq odaqtyń syrtqy saýda kólemi boıynsha 50 %-dan joǵary úlesin ıelenýde",-dedi Imanǵalı Tasmaǵambetov.

Tehnologıalardyń beleń alyp, taýarlardyń naryqqa túspeı jatyp kóneretin zamanynda qalyptasqan júıe boıynsha jumys túzý múmkin emes. Sol sebepti taýarlardy jetkizý kezinde onyń ózindik qunyna qaraǵanda tasymalyna ketetin ýaqyt shyǵynyn esepteý áldeqaıda mańyzdy.

Osy rette, Eýropa men Azıany qosatyn, shóldi dalamen ótetin transeýrazıalyq joldyń sý qatynasynan artyq ekenin Elshi qadap aıtty.

"Qazaqstan buǵan tolyǵymen ázir. Elimizde memlekettik baǵdarlama túgelimen júzege asyp otyr. 26 jyldyń aralyǵynda 10 myń shaqyrym jol jańartylyp, jóndeldi. Jýyrda 8000 shaqyrym avtojol qoldanysqa beriledi. Munymen qatar, 2,5 myń shaqyrym temir jol iske qosyldy",-dedi Imanǵalı Tasmaǵambetov.

Pikir talas alańynda Eýrazıalyq ekonomıkalyq odaq – saýda sattyq saıasatynyń ustanymy" atty saraptamalyq jumys kópshilik nazaryna usynyldy. Onda kóptegen qajetti aqparat men málimetter jıyntyǵy berilgen.