Halyqaralyq mýzeı kúninde Semeıdegi Abaıdyń «Jıdebaı-Bórili» memlekettik qoryq-murajaıynda úsh jańa ekspozısıanyń ashylýy bolyp ótti. Sý jańa jádigerlerdi óńirimizge belgili ǵalymdar Arap Espenbetov, Zeınolla Toqaev jáne Aqmaral Smaǵulova tanystyrdy.
Bul mýzeı isin júrgizýdegi tyń PR marketıń bolsa kerek. Osylaısha murajaı ujymy, tanymal tulǵalardy tartý arqyly, óńirlik týrızmdi órkendetýdi kózdepti. Jańa taqyryptyq ekspozısıa «Úsh qaınar» dep atalady. Atap aıtqanda, «Abaı shyǵarmashylyǵy», «Abaı joly – álem ádebıetiniń jaýhary» jáne «Qaıym Muhamedhanov — abaıtanýshy» atty zaldarynyń resmı tanystyrylymy boldy. Uly hakimge arnalǵan alǵashqy zalǵa, danyshpan aqyn nár alǵan – qazaqtyń halyq aýyz ádebıeti, shyǵys halyqtarynyń poezıasy, orys jáne batys ádebıetiniń ozyq týyndylary qoıylǵan. Al ekinshi ekspozısıada, kemeńger jazýshy Muhtar Áýezovtyń «Abaı joly» roman-epopeıasy jelisi negizinde, ǵulamanyń abaıtanýdaǵy tuńǵysh ǵylymı-zertteýleri, maqalalary jáne álem halyqtary tilderine aýdarylǵan eńbekteri usynylyp otyr. Sonymen qatar Qaıym Muhamedhanovqa arnalǵan zalda talǵampaz kelýshilerdi beıjaı qaldyrmaıtyny anyq. Munda ǵalymnyń ómirbaıanynan bólek, onyń ádebı-ǵylymı jumystary shoǵyrlanǵan. Bul kórme zalynan, sol sekildi belgili zertteýshiler Tóken Ibragımov, Kámen Orazalın jáne Muzdybaı Beısenbaevtyń eńbekterinede oryn berilgen eken. Mýzeı qyzmetkerleri, ásirese Qaıym Muhamedhanov pen Tóken Ibragımovtyń jeke ómirine qatysty derekter jáne qoljazbalary kórermen qaýymnyń qyzyǵýshylyǵyn týydarytynyna senimdi.
-Úsh zalǵa toqtalsaq, Abaı shyǵarmashylyǵyn tolyqtyryp otyrmyz. Sonymen qatar, buryn-sondy bolmaǵan «Abaı joly» roman-epopeıasyna arnalǵan ekspozısıa jasaqtaldy. Abaıdyń murasyn zertteýde Qaıym Muhamedhanovtyń orny erek. Sondyqtan da ol kisiniń shyǵarmashylyǵyna qatysty arnaıy oryn berýdi jón dep sanadyq. Taǵy sol sıaqty mýzeıimizdi 30 jyldan asa basqarǵan Tóken Ibragımov pen osy kıeli orynnyń qyzmetkeri bolǵan Muzdybaı Beısenbaevqa arnalǵan ekspozısıalyq kórme ashyldy. Kelýshiler Abaıǵa qatysty tyń derekterge qanyǵa alady. Jáne de munda «Abaı joly» shyǵarmasynyń álem tilderine aýdarylǵan nusqalary qoıylyp otyr. Onyń arasynda Muhtar Áýezovtyń qoly qoıylǵan nusqasy asa qundy jádigerler sanatyna jatady. Al Qaıym Muhamedhanov 1951 jyly tutqyndalǵan edi. Sol kezde onyń kóptegen kitaptary men qoljazbalaryn tárkilegen bolatyn. Osy baǵaly qoljazbalardyń biri jańa eskpozısıada usynylmaq. Tutastaı aıtqanda, shamamen 200-den asa jádiger qoıyldy, — dep atap ótti Abaıdyń «Jıdebaı-Bórili» memlekettik qoryq-mýzeıi dırektorynyń ǵylymı isi jónindegi orynbasary Meıramgúl Qaırambaeva.
Budan basqa, halyqaralyq mýzeı kúnine baılanysty uly aqyn atyndaǵy qara shańyraqtyń ujymy qymyzmuryndyq dástúrin uıymdastyrdy. Osy dataǵa oraı Mýzeıdiń jumysy saǵat keshki 22:00-ge deıin jalǵasty. Aıtýly sharaǵa qalanyń zıaly qaýym ókilderi, etnomádenı birlestikterdiń músheleri, sondaı-aq qala jastary jınaldy.
