SHQO Qoǵamdyq keńesi oblys ortalyǵynyń quramyna Radýjnyı kentiniń qosylýy týraly usynysty qoldady.
Bul týraly oblystyq ákimdikte ótken Qoǵamdyq keńestiń otyrysynda belgili boldy. Ózge suraqtarmen qatar Óskemenniń ákimshilik-aýmaqtyq shekarasyn ózgertý týraly másele de qaraldy.
-Radýjnyı kenti 1991 jyldan beri Óskemenniń ákimshilik baǵynyshynda tur. Biraq osy kúnge deıin oblys ortalyǵynyń quramyna qosylmaǵan. Kent turǵyndary san ret qalaǵa qosylý týraly usynystarymen kelgen. Barlyq qajetti qujattar daıyn, — dedi qala ákimi apparatynyń basshysy Erjan Shýrmanov.
Ol Qoǵamdyq keńesten osy usynysty qoldaýdy surap otyr. Keńes músheleri Radýjnyı kentiniń qala aýmaǵyna qosylýyn daýysqa salyp, biraýyzdan qoldady.
-Qoǵamdyq keńestiń sheshimi sońǵy qujat bolyp tabylady, — dedi Shýrmanov myrza.-Endi Ulttyq ekonomıka mınıstrligi kent boıynsha qaýlynyń jobasyn QR Úkimetine qaraý jáne qol qoıýǵa engizedi.
Atalmysh kenttiń aýmaǵy 94 gektardan asady. Qazirgi ýaqytta onda 1917 adam turyp jatyr.
