Oblys ákimi Altaı Kólginov jumys saparymen oblystyń birneshe qalasynda boldy, dep jazady Qamshy.kz aqparat agenttigi. Aldymen ákim Jańaqala aýdanynda boldy.
Búgin oblys ákimi Altaı Kólginov óńir aýdandaryndaǵy jumystardyń júrgizilý barysymen tanysý úshin Jańaqala aýdanyna bardy.
Óńir basshysy aldymen aýdan ortalyǵynda salynyp jatqan kóp qabatty turǵyn úı qurylysy alańyna kelip, eńbek ardagerleri, aýyl turǵyndarymen kezdesti. Halyq aldynda aýdanda júrgizilip jatqan qurylys jumysynyń barysymen tanysty. Bıylǵy jyly da aýdan boıynsha qurylys kólemi aýqymdy.
Sonyń biri - halyq suranysy boıynsha Jańaqala toptyq sý qubyry qurylysy. 2017 jyly tamyz aıynda bastalǵan qurylys bıyl jyl sońynda paıdalanýǵa beriledi. qazirgi tańda qurylys qarqyndy júrýde. Jobalyq quny 2,522 mlrd.teńge bolatyn qurylystyń kelisimshart quny 1,831 mlrd.teńge. Uzyndyǵy 145,69 kılometrdi quraıtyn sý qubyryn iske qosý arqyly aýdannyń segiz eldi mekeni, onda turatyn 16789 adamdy taza aýyzsýmen qamtylady. qurylystyń búgingi jaı-kúıimen tanysqan oblys basshysy merdigerlerge jumys sapasyn kemitpeýdi tapsyrdy.
Sondaı-aq oblys ákimi A.Kólginov turǵyndarmen birge aýdandaǵy júrgizilip jatqan ınjenerlik ınfraqurylym, turǵyn úı qurylystary, joldar men sport alańdary, sýarmaly kóltabandardyń aryqtary men sý qaqpalaryn jóndeý jumystary týraly mamandardyń habarlamalaryn tyńdady. Sodan keıin kezdesýge jınalǵan turǵyndarmen aýdannyń áleýmettik-ekonomıkalyq damýy jaıynda pikir alysty.
-Eń ózekti másele – halyqty taza aýyz sýmen qamtý. Taza aýyz sý adamdardyń densaýlyǵyn saqtaý úshin kerek. Elbasy tapsyrmasy boıynsha oblysta bul jumys josparly júrip jatyr. Maqsatymyz – adamdardyń áleýmettik-turmystyq jaǵdaıyn jaqsartý, - degen óńir basshysy aýdan ákimine únemdelgen qarjydan jol jóndeıtin qýatty tehnıka alýdy tapsyryp, turǵyndardan mal basyn kóbeıtýdi surady.
Mal ónimderin ótkizýdegi qıyndyqtardy aıtqan ardagerler suraǵyna oraı oblys ákimi bul baǵytta aımaqta júrgizilip jatqan jumystardy aıtty.
-Kásipkerlikti damyta túsińizder. İsteımin degen adamǵa eshkim kedergi jasamaıdy. Bizdiń mindetimiz – isteımin degen adamǵa jaǵdaı jasaý, - dedi oblys basshysy.
Sapar barysynda oblys ákimi aýdan ortalyǵynda salynyp jatqan jobalyq quny 220458,58 myń teńge úsh qabatty 24 páterlik jaldamaly turǵyn úı qurylysymen tanysty. óz qolymen qabyrǵasyna kirpish qalap, qurylystyń el ıgiligine aınalýyna tilek bildirdi.
Qurylys alańynan keıin óńir basshysy aýdan turǵyny Batyrbek Berdiǵalıevtiń jeke kásipkerlik nysanyna atbasyn tirep, munda aýdan kásipkerlerimen, jastar ókilderimen kezdesti.
Kásipkerlermen áńgime ústinde oblys ákimi:
-Elbasynyń bes áleýmettik bastamasynyń bireýi - shaǵyn jáne orta kásipkerlikti damytý úshin qaıtarymsyz demeý qarjyny kóbeıtý. Oblys boıynsha sýbsıdıa ótken jylǵydan bıyl eki ese kóbeıip, bul tapsyrma júzege asyp jatyr, - dep kásipkerlikke qamqorlyq jaıyn sóz etti.
Jastarmen kezdesýde «Jasyl el» baǵdarlamasynyń aýdandaǵy barysyn tyńdap, belsendi jastar isine rızashylyq bildirdi. Jastarǵa jasalyp jatqan qamqorlyq jumystaryna toqtaldy.
-Bireý úshin emes, ózimiz úshin isteımiz, - degen A.Kólginov salynyp jatqan qurylys nysany ishine uıa salǵan qarlyǵashtardy da nazarynan tys qaldyrmaı, jaqsylyq belgisine balady.
Júrgizilip jatqan jumystar barysymen tanysqan óńir basshysy tıisti jaýapty tulǵalarǵa naqty tapsyrmalar berdi.
***
Oblys ákimi Altaı Kólginov Bókeı ordasy aýdanynda boldy.
Óńir basshysy Memleket basshysynyń oblysymyzǵa bıylǵy sapary óńirimizdiń damýyna tyń serpin bergenine toqtaldy. Sonymen qatar Bókeı ordasynyń tarıhyna, Jáńgir hannyń Naryn qumdy ný ormanǵa aınaldyrý baǵytyndaǵy ıgi isterine qysqasha sholý jasady.
Oblys basshysyna aýdan ákimi Nurlan Rahymjanov aýdanda atqarylǵan jumystar jáne 2018jyldyń josparymen, sonyń ishinde eldi mekenderge aýyz sý, gaz qubyrlaryn jetkizý máselelerimen tanystyrdy.
Sapar barysynda "Nurly jer" baǵdarlamasy aıasynda salynǵan 2-páterlik 5 turǵyn úıdiń jaǵdaıymen tanysty. qurylysymen a.j. mamyr aıynda aıaqtalyp, endi az qamtylǵan jáne jas otbasylar beriletin boldy. Sondaı-aq, oblys ákimi jergilikti kásipkerlermen óńirdegi shaǵyn jáne orta bıznestiń damý jaǵdaıy týraly áńgime qurdy.
Prezıdenttiń bilim alýdyń qoljetimdiligi men sapasyn arttyrý, jaǵdaı jasaý tapsyrmasynyń oryndalýyn tekserý maqsatynda Saıqynda salynyp jatqan jańa tıptegi ınternat qurylysyn kórdi. Ótken jyldyń qyrkúıek aıynda bastalǵan 70 oryndyq ınternat qurylysy bıylǵy jańa oqý jyly qarsańynda paıdalanylýǵa beriledi. Oblys ákimi bul nysanda bolyp, merdiger men qurylysshylarǵa merzimmen qosa sapaǵa kóp kóńil bólý kerektigin tapsyrdy.
Oblys ákimi sapar barysynda
aýdandaǵy asyl tuqymdy mal sharýashylyǵynyń damý deńgeıin kórý úshin "Talap" sharýa qojalyǵyna bardy.
Sondaı-aq, jol qurylysyn tıisti materıaldarmen qamtamasyz etý maqsatynda "Jamantaý" ken orny jaǵdaıymen tanysty. Taý qoınaýynda shaǵyrtas, qıyrshyq tas, teńiz qumy sıaqty materıaldardyń úlken qory bar. qazirgi tańda osy materıaldardy Jánibek, Kaztalov pen Bókeı ordasy aýdandarynyń jol qurylysyna paıdalaný týraly ázirlik jumystary júrgizilýde. Sapar sońynda oblys basshysy jaýapty tulǵalarǵa naqty tapsyrmalar berdi.
***
Oblys ákiminiń jumys sapary Jánibek aýdanynda jalǵasty.
Oblys ákimi Altaı Kólginovtiń Jánibek aýdanyna jumys sapary Aqoba aýyldyq okrýginiń aýmaǵynda ornalasqan Ábdilman jáne Sorkól jaıylmalarynyń jumysymen tanysýdan bastaldy.
Jobalyq quny 393853 myń teńge quraǵan bul nysandardy ótken jyly «ÝralskStroıInvest» JSHS talapqa saı jóndedi. Qurylys jumystarynyń barysynda atalmysh jaıylmalardyń jaǵalaýlary keńeıtilip, plıtalar tóselip, dambalar jasaldy. Sondaı-aq kanaldar tazartylyp, sý aǵyzý qurylǵylary qondyryldy. Qazirgi ýaqytta gıdroqurylymdardy qalpyna keltirý jumystary arqasynda bıylǵy túsken qardyń sýy mol jınaldy.
Jaıylmaly sýarý Aqoba aýyldyq okrýgi boıynsha 1370, Borsy aýyldyq okrýgi boıynsha 500, barlyǵy 1870 gektar jerdi qurap otyr. Tórt sý jiberý qurylǵysynyń bireýi Ábdiramanda, úsheýi Sorkólde ornatylǵan.
– Jaıylmaly sýarýdyń jalpy kólemi 1870 gektardy quraıdy. Bıylǵy jınalǵan sý kólemi jetkilikti. Aldaǵy ýaqytta qar mol túsip, jaýyn-shashyn bolyp tursa, munda 2-6 mln tekshe metrge deıin sý jınalatyn bolady, - dedi qurylysty júrgizgen «ÝralskStroıInvest» JSHS-nyń dırektory Alekseı Bezánov.
«Álem» sharýa qojalyǵynyń jetekshisi, oblystyq máslıhattyń depýtaty Eskendir Elemesovtiń aıtýynsha, jaıylmaly sýarý Aqoba, Borsy, kórshiles Qaztalov aýdanynyń Qoshankól, Qaraoba aýyldarynyń aýmaqtaryn qamtýǵa múmkindik beredi. Óńir basshysy bul jumysqa bastamashy bolǵan Eskendir Qaparuly ekendigin aıtyp, oǵan bolashaqta osy mańnan baý-baqsha salý múmkindigin qarastyrý jónindegi usynysyn jetkizdi.
Aýdanǵa sapar barysynda oblys ákimi «Álem» sharýa qojalyǵynyń «Berkáli» qystaǵynda bolyp, maldy qoldan uryqtandyrý pýnktiniń jumysymen tanysty.
Sonymen qatar, oblys ákimi Aqoba aýylynda aýdan, aýyl aqsaqaldarymen kezdesti. Aýyldyń turǵyny Murat Muhambetqalıev aýylda aýyz sý qubyrynyń qurylysy júrip jatqanyn, uıaly baılanys júıesiniń iske qosylǵanyn, sportzal salynǵanyn aıtyp, aýyl halqynyń áleýmettik-turmystyq jaǵdaılarynyń birtindep sheshimin taýyp jatqanyn zor rızashylyqpen jetkizdi.
–Elbasynyń bergen tapsyrmasyna oraı keler jyldan bastap, Qaztalov, Jánibek, Bókeı Ordasy baǵytyndaǵy kúre jolǵa asfált tóseý jumystary bastalatyn bolady. Elbasynyń bes áleýmettik bastamasyna baılanysty kásipkerlikti qarjylandyrý eki ese ósip, tórt mlrd.teńgeni qurady. Osyǵan oraı óz kásibin ashamyn degen adamǵa barlyq jaǵdaı jasalýda. Sondyqtan osy múmkindikti paıdalanyp, tek erinbeı eńbek etý kerek. Mal sharýashylyǵyn odan ári damytyp, iri qarany bir mıllıon basqa jetkizýimiz qajet. Atqarylyp jatqan jumystardyń barlyǵy táýelsizdigimizdiń, eldegi tynyshtyqtyń arqasy,-dedi oblys ákimi.
Osy arada aýdan ákimi Azamat Safımalıev aýdanǵa tartylǵan ınvestısıa, mal sharýashylyǵy, eldi mekenderdi gazdandyrý, sondaı-aq, basqa da ózekti máseleler jóninde oblys basshysyn habardar etti.
Jumys sapary aıasynda óńir basshysy aýyz sý qubyry qurylysynyń jumys barysymen tanysyp, qurylysy byltyr paıdalanýǵa berilgen H.Halıýllın atyndaǵy mektep janyndaǵy sport zalda, kúrdeli jóndeý jumysy júrip jatqan feldsherlik-akýsherlik pýnktte bolyp, jumystyń jaı-kúıin bildi.
Ústimizdegi jyly Jánibek aýdanynyń ortalyǵynda 80 turǵyn úı salynyp, paıdalanýǵa berilmek. Osy oraıda oblys basshysy aýdan ortalyǵynda 40 turǵyn úı qurylysymen tanysty. Munda oblys ákimine merdiger, «Qazqurylysservıs» JSHS dırektory Aıdarbek Seıitmuratov qurylys nysanda 50 shaqty arnaıy tehnıka jáne 100-den astam adam jumys isteıtinin, sonyń ishinde úı qurylysyna jergilikti jerden de adamdar tartylǵanyn jetkizdi.
–Bir páterdiń aýdany 71 sharshy metr bolsa, bir úıdiń aýdany 190 sharshy metr, qurylys quny 301 mıllıon teńge. Turǵyn úılerdiń qurylysyn Astananyń 20 jyldyq merekesinde, ıaǵnı, 6 shilde kúni bitiremiz dep tyrysyp jatyrmyz,-dedi seriktestik dırektory.
-Úıdiń aınalasyna qorshaý turǵyzyńyzdar. Osynda qonystanatyn turǵyndar tal-terek otyrǵyzsa, janǵa jaıly kóleńkeli saıa bolyp, ózderine qolaıly jaǵdaı jasaıdy, -degen oblys ákimi qurylysshylarǵa úılerdi sapaly aıaqtaýdy nyqtap tapsyrdy.
Aýdan ortalyǵyndaǵy qurylysy bitýge taıaý qalǵan temirjoldyń arǵy betindegi 40 úıdiń qurylysy bıyl shildede aıaqtalady. Jańadan salynyp, paıdalanýǵa beriletin turǵyn úıdi qarap shyqqan oblys basshysy úılerdi sapaly bitirý, aınalasyn qorshaý men tal egý máselesin qadap aıtyp, qurylysshylardyń jumysyna sáttilik tiledi.
Sodan keıin oblys ákimi kórshiles Reseıge baratyn Jánibektegi shekaralyq ótkizý pýnktine bardy. Shekaralyq beketke kelgesin shekara basshylarymen sóılesip, olardan ótkizý pýnktinen kúnine 40-50 túrli júk tasymaldaýshy, 200-250 jeńil avtokólikter ótetinin, al qatqyl jol tóselgen jaǵdaıda onyń sany budan da kóbeıe túsetinin anyqtap bildi.
Óńir basshysy shekara basshylaryna aldaǵy ýaqytta Reseıdiń ótkizý pýnktine deıin qatqyl tabandy jol salynatynyn aıtyp, 8 jolaqty kólik aǵynyn retteýish qurylǵylar ornatqan jaǵdaıda shekara pýnktiniń aınalasyn keńeıtý jaıyndaǵy usynysyn bildirdi.
