Memlekettik týymyz ár azamatttyń qadir tutar qymbat qundylyqtarynyń biri. Týǵa degen kózqaras – patrıottyq jáne azamattyq deńgeıimizdiń, ishki rýhanı qýat-kúshimizdiń ólshemi. Qudaıǵa shúkir, elge, otanǵa degen kirshiksiz mahabbaty, tunyq sezimi bar, memlekettik rámizderdiń mán-maǵynasyn tereń túsinetin jas urpaq qaýlap ósip keledi. Solardyń biri – Rızagúl Meıramqyzy.
Rızagúl Malaızıanyń astanasy Kýala-Lýmpýrdegi INTI halyqaralyq brıtan-malaı birlesken ýnıversıtetinde halyqaralyq bıznes mamandyǵyn oqıtyn birinshi kýrs stýdenti. Ýnıversıtettiń bir ereksheligi ózderinde qaı eldiń stýdenti bar bolsa, sol eldiń týyn ilip qoıatyn. Solardyń qatarynda bizdiń kókbaıraǵymyz da tur. Sebebi, oqý ornynda Qazaqstannan 17 stýdent bilim alady.
Aıtaıyn dep otyrǵanymyz osydan birer aı buryn bolǵan oqıǵa. Igiliktiń erte-keshi joq. Bundaı ónegeli, úlgili isterdi ár ýaqyt sanada jańǵyrtyp, jabyla jarıalap otyrý urpaq úshin paıdasyn bermese, zıanyn tıgizbeıtini anyq. Sonymen…
Bir kúni sabaqqa kele jatqan Rızagúl ózi kúnde qarap ótetin kóktýymyzdyń tóńkerilip, teris ilinip turǵanyn kóredi. Qaz-qatar qoıylǵan elý shaqty eldiń baıraǵynyń arasynda jalaýymyz tómen qarap qalǵan. Týdy jańalaǵandar, ne áldebir sebeppen qaıta ilgender qatelesip ketse kerek. Kókbaıraqtyń mundaı kúıin kórgen ol dereý sýretke túsirip, ákesine jiberedi jáne ne isteýge bolady dep jón suraıdy. Qyzynyń jibergen fotosyn kórip, jaǵdaıdy ańǵarǵan ákesi Meıram aǵa «sen óz elińniń týy mynadaı kúıde turǵanda oǵan bir sekýnd ta beıjaı qarap turmaýyń kerek, tez baryp ýnıversıtettiń ákimshilgine, muǵalimderińe eskert, týdy durystap ildir» deıdi.
Aıtqandaı, Rızagúl týdyń teris ilingegin ustazdaryna eskertedi. Alaıda, bul oqıǵaǵa salǵyrt qaraǵan muǵalimder asa mán bermegen sekildi. Ekinshi kúni tý sol qalpy tur eken. Buny kórgen Rızagúl rektordyń kabınetine týra tartady. Biraq, kúzetshiler jibermeı qoıǵan soń, namys pen ashý qysqan qaryndasymyzdyń daýysy qatty shyǵyp, jan ushyrǵan úni rektordyń kabınetine estiledi. Sol arada rektor kómekshilerimen shyǵyp, oqıǵanyń mán-jaıyn túsingen soń, tez arada Qazaqstannyń kóktýyn durystap qaıta ildiredi. Sonymen qatar, rektordyń ózi de jibergen aǵattyq úshin qazaq qyzynan ǵapý ótinip, el namysy, otan abyroıy dep shyr-pyr bolǵan stýdentine rızalyǵyn bildiredi.
Bir qaraǵanda bul qarapaıym is sıaqty kórinýi múmkin. Alaıda Rızagúldiń áreketi óz elin shyn súıgen qazaq jastarynyń jarqyn obrazy, búgingi sáýleli bet-beınesi desek qatelespeımiz. Patrıottyqty aıqaılap júrip istegennen góri, únsiz ana jasaǵan súıkimdi bolmaq. Sondaı súıkimdi is atqarǵan Rızagúl qaryndasymyz qazaq jastarynyń patrıot bolatynyn Malaızıa oqý ornynyń basshylyǵy men muǵalimderine, stýdentterge tanyta bildi.
Shyny kerek, keı sátteri jastarymyzdyń arasynda ózge eldiń jalt-jult ádet-saltyna elikteıtin minez kezigip qalady. Rızagúldiń isi kerisinshe, ózge eldiń jastaryn qazaq jastarynyń elin súıer patrıottyǵyna elikteýge shaqyratyn mereıli is boldy. Qaryndasymyzǵa oqýyn sátti aıaqtap, el ekonomıkasy úshin qyzmet etetin myqty maman bolýyn tileımiz. Jáne osyndaı ónegeli urpaq tárbıelegen ata-anasyna da rahmet aıtamyz.
Murat Almasbekuly
