Medısına qyzmetkerleri kúni qarsańynda Almatyda qalanyń densaýlyq saqtaý salasynyń ókilderi marapttaldy.
Respýblıkalyq konkýrstyń qorytyndysy boıynsha «Úzdik dáriger» nomınasıasynda qalalyq kardıologıalyq ortalyqtyń dárigeri Nursan Surashev, «Úzdik medbıke» nomınasıasynda №5 qalalyq klınıkalyq aýrýhana medbıkesi Nazıra Myrzabaeva, «Densaýlyq saqtaýdaǵy úzdik jas zertteýshi» nomınasıasy boıynsha A. Syzǵanov atyndaǵy Ulttyq ǵylymı ortalyqtyń qyzmetkeri Jasulan Baımahanov jeńipaz atandy. Budan ózge, osy salanyń 30 qyzmetkeri Almaty qalasy ákiminiń Qurmet gramotalaryn ıelendi.
Dárigerlerdi kásibı merekelerimen quttyqtaǵan Almaty ákimi dáriger ataný júrek qalaýy, al medısına ónerdiń shyńy ekenin atap ótti.
«Adamnyń densaýlyǵy men ómirin saqtaý úshin Sizder baýyrmaldyq pen meıirimdilik tanytyp, arasha bolýmen qatar, kóptegen jaıttardy bastan keshiresizder. Sondyqtan qaı kezeńde de dáriger, emshi abyroı men úlken qurmetke ıe. Elbasy qazaqstandyqtardyń densaýlyǵyn saqtaý men nyǵaıtý týraly únemi aıtyp keledi, óıtkeni «deni saý ult- bizdiń bolashaǵymyzdyń negizi», - dedi Almaty ákimi.
Aıta keterligi, Almatynyń 2020 jylǵa deıingi damý Baǵdarlamasynyń basty qaǵıdalarynyń biri - ár adamǵa degen shynaıy qamqorlyq, munda qalanyń densaýlyq saqtaý salasyn damytýdyń keshendi sharalary qarastyrylǵan.
Mysaly, sońǵy 5 jylda qalanyń densaýlyq saqtaý salasynyń búdjeti 60%-ǵa deıin ósip, bıyl 95 mlrd. teńgeni qurady, ómir súrý uzaqtyǵy alǵash ret 76 jastan asty, jalpy ólim 14%-ǵa azaıdy, balalar ólimi 33%-ǵa tómendedi. Týberkýlezden qaıtys bolǵandar sany 38%-ǵa, obyr dertine shaldyqqandar sany 20%-ǵa qysqardy.
Qalada medısınalyq ınfraqurylym damýda. Tek ótken jyldyń ózinde ǵana Almatyda 5 jańa medısınalyq obekt iske qosyldy: Naýryzbaı aýdanynda 2 emhana, Medeý aýdanynda qalalyq klınıkalyq aýrýhana emhanasy jáne quny 4,8 mlrd. teńge bolatyn vaksınalar men ımmýndybıologıalyq preparattardyń zamanýı qoımasy.
Búgin Bostandyq aýdanynda zamanaýı Ortalyqtandyrylǵan zerthana ashyldy, munda molekýlárly-genetıkalyq, ımmýnofermentti jáne ımmýnnohımıalyq,parazıtologıalyq, mıkrobıologıalyq, serologıalyq, bıohımıalyq, jalpyklınıkalyq zertteýler júrgiziledi. Ortalyqtandyrylǵan zerthana eń zamanýı qondyrǵylarmen jabdyqtalǵan, olar mıkroorganızmderdiń bıohımıalyq testiler arqyly antıbıotıkterge sezimtaldyǵyn anyqtaıdy. Jańa obektide jyl ishinde naqtyly 500 myńǵa deıin zerthanalyq zertteýler júrgiziledi.
Bulardan ózge, 2017 jyly jalpy quny 11,3 mlrd. teńge bolatyn taǵy 9 obektiniń qurylysy bastaldy. Olardyń beseýi bıyl paıdalanýǵa beriledi. Qalada medısınalyq týrızm jedel damýda. Mysaly, qala klınıkalarynda jyl basynan beri qaraı jaqyn jáne alys sheteldiń 50 eliniń 2 myńdaı azamaty emdeldi. Megapolıske AQSH-tan Túrkıadan QHR-nan jáne basqa elderden medısınalyq kómek alý úshin keletinder sany artýda.
Osy salany sıfrlandyrý aıasynda qalanyń barlyq medısınalyq uıymdary aqparatty júıeni tıimdi paıdalanýda. 1 maýsymnan bastap 30 forma boıynsha esepti qujattar qaǵazsyz júzege asýda. Bıylǵy jyldyń 1 qyrkúıeginen elektrondy densaýlyqqa tolyq kóship, qalanyń barlyq turǵyndary densaýlyǵynyń elektrondy pasporttary jasalady.
