Almaty ákimi Baýyrjan Baıbek jyl saıynǵy «Jas túlek-2018» mektep festıvali barysynda túlekterdi orta mektepti bitirgenderi týraly atestatty jáne «Altyn belgini» alýlarymen quttyqtady. Bıylǵy jyly megapolıste orta mektepti 9030 túlek bitirdi, olardyń 518 oqýshysy «Altyn belgini» ıelendi.

«Bul kún sender úshin erekshe este qalatyn sát jáne úlken ómirge degen oń qadam! Esterińde bolsyn, eger bilimge degen qushtarlyq, alǵa degen umtylys jigerlerińdi janysa, izgi maqsattarǵa jetesińder. Búkil ǵumyrlaryńnyń altyn qazyǵyna aınalatyn mamandyqty tańdaýlaryńa tilektespin. Qazaqstannyń patrıoty bolyńdar! Qoljetkenge toqmeıilsimeńder. Elbasy aıtqandaı, «Senderdiń jeke jetistikteriń ata - analaryńnyń, týǵandaryń men jaqyndaryńnyń, otandastaryńnyń, Otanymyzdyń jetistigi», - dedi tulekterge arnaǵan sózinde Baýyrjan Baıbek.

Megapolıs basshysy bıylǵy jyly qalanyń barlyq mektepteriniń fızıka, hımıa, bıologıa kabınetterimen jáne lıngafondy-mýltımedıalyq jabdyqtarmen qamtamasyz etilgein atap ótti. Mektepter keń jolaqty ınternetke 100% qosylǵan. Qazirgi kezde qalanyń barlyq mektepteriniń oqý kabınetteri mýltımedıalyq úshtikti alýda. «Sıfrly Qazaqstan» memlekettik baǵdarlamasyn iske asyrý úshin aldaǵy oqý jylynda qalanyń 80 mektebinde arnaıy IT lıseıler men IT synyptar ashý josparlanǵan.

Almaty oqýshylary 13 jyl qatarynan respýblıkalyq olımpıadada komandalyq birinshi orynnan kórinýde.Respýblıkalyq ǵylymı saıystarda 16 ret jeńimpaz atansa,matematıka, fızıka, hımıa men bıologıadan 11 synyp oqýshylary arasynda ótken Prezıdent olımpıadasynda besinshi ret jeńis tuǵyryna kóterildi. 2018 jylǵy jaratylystaný - matematıkalyq baǵytta alǵash ret ótken respýblıkalyq jasóspirimder olımpıadasynda qala komandasy birinshi oryndy ıelendi.

Megapolıstiń ózindik «qorjynyna» halyqaralyq zıatkerlik olımpıadalar men ǵylymı jarystardan tek bıyldyń ózinde ǵana 45 altyn, 68 kúmis jáne 93 qola medaldar tústi.