Almaty ákimi Baýyrjan Baıbek Fransıa Ulttyq assambleıasynyń depýtaty, «Fransıa-Qazaqstan» parlamentaralyq dostyq tobynyń tóraǵasy Per Kabaremen kezdesti. Taraptar mádenı - gýmanıtarlyq baılanystardy, sonyń ishinde bilim berý jáne týrısik klasterdi damytý tájirıbesin almasý boıynsha yntymaqtastyqty nyǵaıtý máselelerin talqylady.

Qazaqstannyń táýelsizdik jyldary eki el arasynda barlyq baǵyttar spekterleri boıynsha seriktestik qatynastary ornyqty. Búgingi kúni Almatyda fransýz kapıtalymen saýda, tamaq ónerkásibi, kólik pen telekomýnıkasıa salalary boıynsha 60-tan astam kásiporyn jumys isteıdi. Almaty men Fransıa arasyndaǵy taýar aınalymy bıylǵy jyldyń birinshi toqsanynda 13%-ǵa ósip, oń dınamıka qalyptasty. Bulardan ózge, megapolıste Fransıa mádenıeti men ónerine qatysty túrli sharalar qala turǵyndary arasynda jıi ótip turady.

Kezdesý barysynda Per Kabare eki memleket pen eki el arasyndaǵy yntymaqtastyqtyń eń aldymen senim men dostyqqa negizdelgenin atap ótti.

«Bul meniń Almatyǵa alǵash kelýim, baıqaǵanym qala zamanaýı trendter men jańa tehnologıalar aksenti boıynsha damý ústinde eken. Taýlardyń tym jaqyn ornalasýy - Almatynyń týrısik tartymdylyǵynyń taptyrmas artyqshylyǵy. Osy baǵytty damytýda fransýz kompanıalarynyń tájrıbesi mol, al bul eki jaqty baılanysty odan ári nyǵaıtýdyń taǵy bir salasy», - dedi Ulttyq assambleıa depýtaty.

Aıta keterligi, qazirgi kezde Almatyda «Aláns Fransez» ókildigi bar. Abaı atyndaǵy ulttyq pedagogıkalyq ýnıversıtette Orta Azıadaǵy alǵashqy «Sorbonna-Qazaqstan» ınstıtýty jumys isteýde. 2016 jyly Fransıa astanasy Parıjde IýNESKO aıasynda Almatynyń 1000 jyldyǵy merekelendi. Almaty men Renn qalalary baýyrlastyǵynyń 25 jyldyǵy qurmetine fransýz qalasynda Abaıdyń bústi ashyldy. Almatyda kúzde «Sıfrly kúz» festıvalin ótkizý jsoparlanǵan, munda qala turǵyndary men qonaqtary sıfrly tehnologıalar arqyly fransýz mádenıetimen jáne ónerimen tanysatyn bolady.