Mańǵystaý oblysynda buzylǵan quqyqtardy qalpyna keltirýge baǵyttalǵan «Túngi sot» pılottyq jobasy iske qosyldy. Bul týraly Mańǵystaý oblystyq sotynyń baspasóz qyzmeti málimdedi, dep habarlaıdy Qamshy.kz aqparat agenttigi digitalkz.kz saıtyna silteme jasap.

Atalǵan jobanyń maqsaty – jábirlenýshilerdiń buzylǵan quqyqtaryn qalpyna keltirý, ýaqytty únemdeý, materıaldyq shyǵyndy azaıtý, isti tezirek sheshý. Munyń barlyǵy aýdıo-beınejazbalar arqyly elektrondyq formatta qaralady.

«Sıfrlyq tehnologıalar ákimshilik isterdi anyqtaýǵa járdemdesip jatyr. Iaǵnı, túngi ýaqytta oryn alatyn jol-kólik apattary týraly málimetter birden bazaǵa túsirilip, sol mezette qaralady. Bul óz kezeginde ýaqytty qysqartýǵa óz úlesin qosyp, ákimshilik ister taıaý ýaqytta óz sheshimin taýyp jatyr», - deıdi aqparattyq qamtamasyz etý bóliminiń basshysy Gaýhar Nurhanova.

Onyń aıtýynsha, sot prosedýralaryn sıfrlandyrý oń nátıjelerge jetkizedi. Atap aıtqanda, elektrondyq formatqa aýysý qaǵazbastylyqtan qutqaryp, ýaqytty únemdemek.

«Buryn sot qyzmetkerleri senbi, jeksenbi kúnderi qaǵaz toltyrý úshin jumysqa shyǵatyn. Al, qazir ondaı joq. Nege deseńiz bárin apparat jazady. Osylaısha, ýaqytty únemdeýge edáýir járdem jasaýda. Kún ótken saıyn túrli máseleler týyndap, azamattyq ister kóbeıýde. Osy rette jańa tehnologıalar jumysymyzdy ýaqytyly retteýge múmkin beredi» – dedi G. Nurhanova.

Sonymen qatar, ol sıfrlandyrýdyń tıimdilikterin basa aıtyp, aýyldaǵy aǵaıyn úshin mańyzdy ekenine toqtaldy.

«Sıfrlandyrý ekonomıkalyq turǵydan tıimdi. Buryn birneshe tonnalap qaǵaz kóterip júretin sot qyzmetkerleri úshin elektrondyq júıe aıtarlyqtaı tıimdi. Túrli jaǵdaılar boıynsha sot isine kele almaı qalatyn adamdar úshin elektrondyq júıe asa mańyzdy. Iaǵnı, qıyn jaǵdaıdaǵy adamdarǵa kóp jeńildik bolyp otyr. Sondaı-aq, aýyldy eldi mekennen kelýshiler úshin kóp kómegi bar. Osy rette, olar óz rızashylyqtaryn bildirýde», - dedi bólim basshysy.

Qazaqstandaǵy sot júıesin sıfrlandyrý prosesine keler bolsaq, sońǵy jyldary sot reformalarynyń nátıjesinde bul salaǵa aqparattyq tehnologıalar engizile bastady. Iaǵnı, sot zaldary qazirgi zamanǵa saı sapaly aýdıo-beınejazba júrgizýge arnalǵan quraldarmen jabdyqtalyp, barlyq is-qaǵazdar men qujat aınalymdary elektrondyq formatqa aýysty. Sonymen qatar, birqatar elektrondyq servıster jumys isteıdi. Atap aıtsaq, «Tórelik» aqparattyq júıesi, «Sot kabıneti», dybys pen beıne jazba qurylǵylary, beıne-konferens-baılanys júıesi, «Elektrondy qylmystyq is» jobasy, elektrondyq sıfrlyq qoltańba, «Vırtýaldy sot» jobasy, «quqyqtyq qyzmet ortalyǵy» men «tergeý soty» jobasy jumys isteıdi.