Dına Súleımenova esimdi Almaty qalasynyń turǵyny sharasyzdyqtan buqaralyq aqparat quraldarynan qoldaý kútedi. Páter alamyn dep basy bálege qalǵan jalǵyzbasty ananyń janaıqaıy bizdi beıjaı qaldyra almady. Erkin oı-pikir alańy ekendigimizdi eskerte otyryp, ekinshi taraptyń da túsiniktemesin jarıalaýǵa daıynbyz degen aqpardy oqyrmanǵa jetkizgimiz keledi. Joǵarǵy sot qandaı sheshim shyǵaratynyn bilmeımiz, alaıda adamgershilik sotyna salsaq, jalǵyzbasty ananyń kóz jasyna qalý baryp turǵan qylmys ekendigin aıtpasaq syn bolar. Dına Súleımenova óz hatynda bylaı dep jazady:
"QR Joǵarǵy sotynyń tóraǵasy Jaqyp Asanovtan, QR Bas prokýrory Qaırat Qojamjarovtan jáne aqparat quraldarynan kómek suraımyn!
Páter alamyn dep rıeltorlardyń aldaýyna tústim. Almaty qalasy Medeý aýdandyq sotynyń sýdıasy S. Jolmanova da rıeltor jaǵyna shyqty. Qysqasha baıandaıyn.
2016 jyldyń qyrkúıek aıynan bastap Almaty qalasynan 2 bólmeli páter izdedim. Páterdi tek rıeltor arqyly ǵana kóre alasyń, úı ıesimen kezdesý múmkin emes. Keıbir rıeltorlar qaǵazǵa qol qoımaı, páterdi kórsetýden bas tartady, ol ne qaǵaz ekenin suraǵanymda, «páterdi kórsetkenim týraly esep» dedi. Kúnine qanshama páter kórip júrgen soń, keıde qaǵazdaryna úńilip, oqyp ta qaramaısyń, solardyń sózine senip, qol qoıa salasyń. Sóıtip júrip rıeltorlardyń biriniń quıtyrqy áreketine kez bolyp, áýre-sarsańǵa tústim.
2017 jyly naýryz aıynda «KRYSHA» saıtynan úı izdep júrip «Imperıa Nedvıjımostı» agenttigi arqyly Medeý aýdanynan qurqyltaıdyń uıasyndaı 2 bólmeli eski páter kórdim. Úı ıeleri Kókshetaý qalasynda turǵandyqtan olar osy agenttikke kiltin qaldyryp, satýǵa ruqsat bergen jáne burynǵy kórshilerine de kilt qaldyrǵan eken. Biraq páterdi qymbatsyndym. Rıeltor kompanıa páter ıesi Almatyǵa keletinin, kelisýge bolatynyn aıtty. Sóıtip sol agenttikpen Kelisim-shartqa otyrdym, olar úı ıeleri kelgen kezde habarlaıtynyn jáne ózim úı tapqan jaǵdaıda olarǵa eskertip, kelisimshartty buzý kerektigin eskertti. Biraz ýaqyt ótip, habarlaspaǵan soń, sol kezde dollardyń quldyraýyna baılanysty qaıtadan páter izdeýge kiristim.
«KRYSHA» saıtynan qarap júrip, Erbol degen rıeltorǵa kez boldym. Erbol páter kórsetpes buryn, eshteńe toltyrylmaǵan qaǵaz usyndy, qol qoımasam páterdi kórsetpeıtinin aıtty. Páterdi kórsetkeni jaıly esep beretin qaǵaz degen soń oqymastan qol qoıdym. Keıin sol qaǵaz basyma pále bolatynyn bilmedim. Kelisimshart ekenin aıtpaǵan edi. Kelisimshart bolsa 1 danasyn maǵan berýi kerek emes pe? Ony da bergen joq. Keshke jumystan shyǵyp, páterdi kórýge barǵanda sol baıaǵy kórgen páter ekenin bildim.
Erbol páter baǵasyn 13 mln 700 myń dedi, onyń ústine qyzmeti 1 myń dollar ekenin aıtty. Oǵan shama kelmegendikten Erboldyń rıeltorlyq qyzmetinen bas tarttym. Sonymen bári qaldy.
Sóıtip júrgende mamyr aıynda, aldynda ózim sóılesken «Imperıa Nedvıjımost rıeltor kompanıasynyń dırektory zvondap, úı ıeleriniń kelgenin jáne olardyń menimen kezdeskisi kelgenin aıtty. Sóıtip baǵasyn kelisip, kelisimshart jasap, qaryzdanyp, qaýǵalanyp páterdi satyp aldym.
Arada tórt aı ótkende sotqa shaqyrý keldi. Baıaǵy Erbol degen rıeltor jumys isteıtin «GIGANT» kompanıasy sotqa beripti. Erbol qol qoıdyrǵan qaǵaz «meniń sol kompanıamen otyrǵan kelisimshartym eken, men kelisimshartty oryndamaǵan ekenmin. Erbol kórsetken páterdi bul kompanıanyń qyzmetine aqsha tólemeı satyp alyp, bul kompanıaǵa 858 myń teńge shyǵyn keltirippin».
Bárinen tańǵalyp otyrǵanym, áli sot sheshimi shyqpasa da jeke sot oryndaýshysy habarlasyp, kóligim men páterimdi arestke qoıatyny týraly hat jiberipti. Telefon soǵyp, zirkildep eskertedi taǵy. Sonda, áli shyqpaǵan sot sheshimin sot oryndaýshysy qaıdan biledi?
Sot barysynda «GIGANT» rıeltor kompanıasy osy páterdiń satylymǵa qoıylǵanyn «KRYSHA» saıtynan kórip, kórshiden kiltti alyp, klıentterge páterdi kórsete bastaǵany belgili boldy. Keıin, olar men bas tartqan soń da osy páterdi birneshe adamǵa satpaqshy bolǵanyn qazirgi kórshilerden bildik.
«Gıgant» kompanıasynyń páter ıelerimen eshqandaı kelisimsharty bolmaǵan. Ony rastap, qazir Kókshetaýdaǵy páter ıeleri de hat jiberip otyr.
Men rıeltorlarǵa múlde tólemeımin dep otyrǵanym joq. Sol páterdi eń basynda taýyp bergen, páter ıesimen aramyzda deldaldyq etken «Imperıa Nedvıjımostı» agenttigine rıeltorlyq qyzmeti úshin kelisilgen somany tóledim. Búkil qujaty, chegi tur. Ol kompanıa da rastap otyr.
Olaı bolsa aıdaladaǵy «Gıgant» degen rıeltor kompanıaǵa ne úshin tóleýim kerek? Sot aıaqtalmaı turyp úıim men jeke kóligim nege arestte turýy qajet? Ras, olar da páterdi kórsetti, biraq baǵasyna kelistire almaǵan soń qosh aıtysyp kettik emes pe? Esep-qısap dep yldym-jyldym kórsetken qaǵazy kelisimshart bolsa, ony zańdy túrde toltyryp, adamsha kórsetpeı me, bir danasyn bermeı me?
Ózim Almatyda on jyldan astam jataqhanada turyp kele jatqan jalǵyzbasty anamyn. Mektep bitirýge jaqyndaǵan ulym ekeýmiz aqyry páter alǵanymyzǵa sheksiz qýanyp edik. Biraq mynadaı ozbyrlyqty kórip, kúızeldik. Ózimniń de densaýlyǵym joq (onkologıalyq ota jasatyp, ár 3 aı saıyn dárigerdiń qaraýyndamyn), maǵan jyǵylǵanǵa judyryq boldy.
Osyǵan deıin advokat qyzmetin atqarǵan zańgerimmen qosa, taıaýda kásibı advokat jaldaýǵa týra keldi. Men rıeltorlyq qyzmet týraly zańnyń búge-shigesin bilmeımin. Advokat olardiki zorlyq ekeni anyq dep otyr. Biraq ýaqyt ótken saıyn sotta ózimizdi aqtap alarymyzǵa senimim azaıyp barady. Ol az deseńiz «GIGANT» kompanıasynyń qyzmetkeri Erbol esimdi jigit, kórshime kelip, eger meni qazirgi kórshińizben, ıaǵnı menimen, eki ret kórgenińizdi sotta aıtsańyz, biz sotty jeńip turmyz,-dep senimdi túrde aıtyp ketken. Ol senimdiliktiń artynda ne tur?
Aqyry taıaýda «Gıgant» kompanıasynyń talap aryzyn qanaǵattandyrǵan sot sheshimi shyqty, sóıtip barlyǵy 803260 teńge tóleýge mindettedi, ol az bolsa sot oryndaýshynyń qyzmeti úshin 45380 teńge tóleýim qajet eken. Osy da ádilet pe?
Apelásıalyq shaǵym túsirdim. Sóıtip ol sol sot maǵan salynǵan aqsha shyǵyn eki esege azaıtyp berdi. Sottan sharshaǵandyqtan, tólep qutylaıyn dep kelistim jáne tóledim. Tólemdi alǵany jóninde qaǵaz berip, is osymen jabyldy degen. Endi Joǵarǵy sotqa shaǵym túsirip, munymen de toqtamaımyz dep otyr".
