Aqtóbe qalasyndaǵy ataýsyz 67 kósheniń aty qazaqshalandy. Qazir jańa kóshe attary oblystyq ádilet departamentinde tirkelip, barlyq qujattary retteldi. Endi kóshe kórsetkileri ilinedi. Jańa ataýlardyń basym bóligi qalanyń ishindegi ataýsyz kóshelerge qoıylǵan. Máselen Ǵ.Jubanova kóshesiniń janyndaǵy ataýsyz kóshe Táýke han atalsa, birqatar kóshelerge Qabanbaı batyr, Júsip Balasaǵun, Aqan seri, Aqtan Kereıuly, Er Qosaı sekildi tulǵalardyń esimi berildi. Qozy-Kórpesh, Qalqaman-Mamyr, Naryn, Sáıgúlik, Oqjetpes sekildi ataýlar berilgen de kósheler bar. Jańa ataýlar negizinen qalanyń Aqjar, Aqjar-2, Zarechnyı, Kirpishti, Raýan, Iasnyı sekildi aýdandaryndaǵy ataýsyz kóshelerge berildi. Aqtóbe qalalyq mádenıet jáne tilderdi damytý bólimi mekemesiniń sektor meńgerýshisi Aısha Qulbatyrdyń aıtýynsha, el esinde saqtalǵan baıyrǵy ataýlar sońǵy jyldary qalpyna keltirilip, qazaq ómiri, qazaq tarıhyna esh qatysy joq ataýlar ózgertilip, ataýsyz kóshelerge ataý berý jumystary júıeli júrgizilip jatyr.
Aqtóbe qalasyndaǵy burynǵy Kolhoznyı kóshesi 2000 jyly qalalyq máslıhattyń sheshimimen Altaı batyr kóshesi ataldy. Altaı batyr kim? Jurtshylyq bul esimmen jaqsy tanys bolǵanymen batyr týraly derekterdi kópshilik tereńdep bile bermeıdi.
Altaı Ebeskiuly — elimiz ben jerimizdi jaýdan qorǵaǵan, halqymyzǵa kózin alartqan bógde oıly shapqynshylarǵa qylyshyn kese ustaǵan eren batyr, bedeldi bı, sózi dýaly dıplomat. Altaı batyr Qazaqstannyń batysyn, ásirese, Atyraý, Jem, Oıyl boılaryn qalmaqtardan qorǵaý soǵystaryna belsene qatysqan. Kishi júzdiń Kete rýynan. Sheshesi — Qarlyǵash. Qaraqypshaq Qobylandynyń erjúrek sarbazdarynyń biri — Ábilmámbet batyrdyń nemeresi. Altaı batyrdyń ákesi de batyr bolǵan. Kishi júzdiń Kete rýynan. Jońǵarlarǵa qarsy azattyq soǵystarǵa (Saýran mańyndaǵy ) jáne Atyraý, Jem, Oıyl boılaryn Edil qalmaqtarynan qorǵaýǵa belsene qatysqan. Altaı batyr 1738 jyly Qum ózeniniń jaǵasyn jaılaǵan qalmaq hany Dondıkqa qarsy Ábilqaıyr han bastaǵan joryqqy qatysqan. Bókenbaı batyr ekeýi 2000 kisilik qoldy, Jem ózeniniń bastaýyna bekingen qalmaqtardy Jaıyqtyń arǵy betine deıin qýǵan. 1749 jyly juttan maldy aman saqtaý úshin elin bastap Jaıyqtyń arǵy betine ótýge Reseı ákimshiliginen ruqsat alǵan. Qalanyń Máskeý aýdanynda ornalasqan Altaı batyr kóshesinde negizinen jer úıler ornalasqan. Shaǵyn dúkender men saýda oryndary bar. Osy kósheniń turǵyny Marat Musabaev kósheniń qazirgi ataýynyń óte oryndy ekenin aıtady.
— Zaman ózgerdi, kósheniń de ataýyn ózgertý óte oryndy is. Qazir Altaı batyr atyndaǵy kóshede turatynymyzdy maqtan tutamyz. Bul keıingi jastarǵa da úlgi, — deıdi qala turǵyny.
