Jýyrda Aqtóbe oblysynyń ákimi Berdibek Saparbaev óńirdegi boı kóterip jatyrǵan áleýmettik ǵımarattardyń, ındýstrıaldyq jáne ınfraqurylymdyq obektilerdiń qurylys barysymen tanysty.

Oblys basshysy aldymen múmkindigi shekteýli balalarǵa arnalyp Batys-2 shaǵyn aýdanynda salynyp jatqan ońaltý ortalyǵyna bardy. Qazirgi kezde munda árleý, qurylys aýmaǵyn abattandyrý jumystary júrip jatyr. Taıaý kúnderde múmkindigi shekteýli balalardy emdeýge arnalǵan medısınalyq jáne ózge de qural-jabdyqtar jetkizilmek. Arnaýly medısınalyq bul mekeme ashylǵan soń kútip otyrǵan kóptegen aqtóbelik otbasylarǵa tıisinshe járdem kórsetilmek.

Eske sala keteıik, atalǵan qurylys obektisi týraly kelisimge ótken jyly jeltoqsan aıynda oblys ákimi Berdibek Saparbaevtyń «Rýsskaıa mednaıa kompanıa» aksıonerlik qoǵamy dırektorlar keńesi tóraǵasy Igor Altýshkınmen kezdesý barysynda qol jetkizilgen.

Sondaı-aq Batys-2 shaǵyn aýdanynda 2500 oryndyq Muz saraıynyń qurylysy da aıaqtalyp keledi. Joba quny — 3,7 mıllıard teńge kóleminde, «H+H Technika» slovak kompanıasy memlekettik-jeke menshik áriptestik sheńberinde júzege asyrýda. Qazirgi zamanǵy sporttyq keshen bazasynda sporttyń hokeı, mánerlep syrǵanaý, short-trek jáne basqa da qysqy túrleri órkendeıtin bolady.

Munymen birge aımaq basshysy balalarǵa arnalǵan stomatologıalyq emhananyń qurylysynyń barysyn qarady.

Sodan soń oblys ákimi «Ásem» balalar lagerine bardy. Onyń bazasynda «Baqytty bala» jobasy aıasynda «Artek» lageri úlgisindegi jyl boıy jumys isteıtin demalys orny qurylmaq. Lagerdiń qazirdiń ózinde oqý jáne jatyn qorpýstarynyń qurylystary aıaqtalyp qalǵan. Sáýletshiniń oıy boıynsha, oqý ǵımaratynyń dızaıny ashyq kitap túrinde oryndalatyn bolady. Lagerde balalar oqý prosesinen qol úzbeı, turady jáne demalady.

Sondaı-aq osy kúni oblys ákimi Berdibek Saparbaev Aqtóbe feroqorytpa zaýyty aýdanyndaǵy jol ótpesiniń, «Kóktas» JSHS sılıkat buıymdary óndirisi zaýytynyń jáne «Aqtóbe» ındýstrıaldyq aımaǵyndaǵy birqatar jobalardyń qurylystarynyń barysyn qarady.