Konstıtýsıa kúnine oraı Aqtóbe oblysynyń Alǵa aýdanynda jańa mektep paıdalanýǵa berilip, 60 páterli jańa úıdiń kilti ıelerine saltanatty jaǵdaıda tabystaldy. Atalǵan sharaǵa oblys ákimi Berdibek Saparbaev, oblystyq máslıhat hatshysy Sánıa Qaldyǵulova qatysty.
Atalmysh úıler «Nurly jer» baǵdarlamasy aıasynda Alǵa qalasyndaǵy №5 shaǵyn aýdanynda salynǵan.
-Elimizde turǵyndardy turǵyn úımen qamtamasyz etý maqsatynda kóptegen memlekettik baǵdarlamalar qabyldandy. Atap aıtsaq, «Nurly jer», «7-20-25» baǵdarlamalary arqyly kezekte turǵan turǵyndardy baspanamen qamtamasyz etý kózdelip otyr. Byltyr oblysta 780 myń sharshy metr turǵyn úı qoldanysqa berilse, bıyl eń kem degende 870 myń sharshy metr turǵyn úı paıdalanýǵa beriledi. Bul kórsetkishti keńes úkimeti tusynda berilgen úılermen salystyratyn bolsaq, eki ese kóp. Ótken jyly osy aýdanda 60 páterli úı paıdalanýǵa berilse, búgin, taǵy 60 otbasy qonystoıyn toılap jatyr. Sońǵy 30-40 jylda bul aýdanda jol, úı, mektep salynbaǵan. Munyń barlyǵy memleketimizdiń, Elbasynyń halyqtyń ál-aýqatyn jaqsartýǵa baǵyttalǵan saıasatynyń arqasynda júzege asyp otyr. Oblys basshylyǵy atynan barlyq turǵyndardy búgingi qýanyshymen quttyqtaımyn. Baspanalaryńyz jaıly, qutty bolsyn! — dedi oblys ákimi Berdibek Saparbaev.
Sodan soń óńir basshysy 600 oryndyq Alǵa mektep-gımnazıasyna bardy.
-Memleket basshysynyń tapsyrmasyna sáıkes, búgingi kúni elimizde, onyń ishinde oblysta balalarǵa sapaly bilim berý maqsatynda jańa mektepter salynyp jatyr. Bıyl óńirimizde 26 mekteptiń qurylysy júrip jatyr, onyń 15-i bıylǵy jyly paıdalanýǵa beriledi. Onyń ishinde 9 mektep bıylǵy jańa oqý jylynda saltanatty túrde ashylady.
Zerttep qarasaq, sońǵy otyz jylda Alǵa aýdanynda jańa mektep salynbaǵan. Halyqtyń sanynyń, balalar sanynyń ósýine baılanysty búgin, mine, jańa bilim ordasy paıdalanýǵa berilip otyr. Bul mektep-gımnazıada jaqyn ornalasqan aýyl, eldi mekenderdiń balalary kelip bilim alady. Osy maqsatta bilim ordasynyń janynan 60 oryndyq ınternat salyndy. Oblys basshylyǵy atynan barlyq turǵyndardy búgingi jańa mekteptiń ashylýymen quttyqtaımyn! Balalarymyz oqýda ozat bolyp, elimizdiń abyroıyn asqaqtatsyn! — dedi oblys ákimi.
Jańa mektep-gımnazıada 35 oqý kabıneti, akt zaly, asqana, kitaphana, eki sport zaly, sport alańy men jattyǵý alańdary bar. Sondaı-aq mektep ınternet jelisimen jáne radıo júıesimen qamtylǵan.
Sondaı-aq oblys ákimi aýdan ortalyǵyndaǵy jýyrda asfált tóselip, jóndeý jumystary júrgizilgen Komsomol kóshesiniń turǵyndarymen kezdesti.
— Bıyl Alǵanyń bes kóshesine qarajat bólinip, qazirgi tańda úsh kóshege tolyǵymen asfált jabyndysy tóseldi. Merdiger uıym — «Asfált»
jaýapkershiligi shekteýli seriktestigi. Onyń ishinde Komsomol kóshesine 2,2 shaqyrym qashyqtyqta asfált jabyndysy tóselip, qazir sýaǵarlar ornatý úshin jumystar júrgizilýde. Kósheni jóndeýge 50 mıllıon teńge bólindi, jalpy kelisimsharttyń mólsheri — 380 mıllıon teńge, — dedi Alǵa qalasynyń ákimi Nurbol Surbaev.
Aıta ketsek, búginde Alǵada jalpy uzyndyǵy 61 shaqyrymdy quraıtyn 52 kóshe bar, onyń 19-yna asfált tóselgen. Bıyl 7,3 shaqyrymdy quraıtyn 5 kóshege, atap aıtsaq, Eset batyr, Komsomol, Aǵnıazov, Imanov, Vodoprovodnaıa kóshelerine asfált jabyndysyn tóseý úshin «Asfált» JSHS-men 488 mln teńgege kelisimshart jasalǵan. Sondaı-aq oblystyq búdjetten 60,2 mln teńge bólinip, birqatar kóshelerge ortasha jóndeý jumystary júrgizilýde.
