Shaǵyn jáne orta kásipkerlikti qoldaý men yntalandyrý búgingi kúni memleketimizdiń aldyndaǵy ózekti máselelerdiń biri. Bul turǵydaǵy negizgi maqsat – shaǵyn kásipkerliktiń áleýmettik ekonomıkalyq qyzmetin tıimdi atqarýyna múmkindikter jasap, ómir súrý merziminiń neǵurlym uzarýyna yqpal etý bolyp tabylady. Osy oraıda Aqtóbede shaǵyn jáne orta bıznesti qoldaý maqsatynda kóshe saýdasyn damytý boıynsha áleýmettik joba iske asyrylýda. Atalmysh joba aıasynda qalanyń ár bóliginen kásipkerlerge 250 jer telimi beriledi. Bul týraly óńirlik komýnıkasıalar qyzmetinde ótken baspasóz máslıhaty barysynda qala ákiminiń orynbasary Ushqyn Myńbaev málimdedi.
Aqtóbede kóshe saýdasyn damytý jobasy 2018-2020 jyldar aralyǵyn qamtıdy. Osy kezeńderde qalada 250 shaǵyn saýda pavılondaryn qurý josparlanǵan. Jobanyń ereksheligi, pavılondarda jergilikti óndirýshiler deldalsyz óz ónimderin tikeleı satýǵa múmkindik alady. Al qala turǵyndary aýyl sharýashylyq ónimderi men buıymdaryn arzan baǵada satyp ala alady. Bul jergilikti turǵyndar úshin de, kásibin jańa bastaǵan jas kásipkerler úshin de mol múmkindik.
— Búginge deıin 21 oryn tabystaldy. Qosymsha taǵy 32 oryn komısıada qaralyp berildi. Qazirgi tańda atalǵan ýchaskelerdiń qujattaryn rásimdeý jumystary júrgizilip jatyr. Jyl aıaǵyna deıin taǵy 50 jer ýchaskesin berý josparlanǵan. Obektige beriletin oryndar kásipkerlerdiń qajettiligin, olardyń suranystaryn eskere otyryp tańdalady. Sondyqtan jer ýchaskelerin bólý tek qalanyń ishinde ǵana emes, qalaǵa qarasty eldi mekenderde de qarastyrylǵan, — deıdi Ushqyn Myńbaev.
Pavılondardyń árqaısynyń aýmaǵy shamamen 15-20 sharshy metrdi quraıdy. Sondaı-aq olardyń syrtqy kórinisi de mańyzdy ról atqarady. Qala ákimi orynbasarynyń aıtýynsha, komersıalyq nysannyń konstrýksıasy qalanyń sáýlettik kórinisine sáıkes keletin zamanaýı talaptarǵa saı bolýy kerek.
Búgingi tańda jer telimderin alǵysy keletin kásipkerlerden ótinishter qabyldanyp jatyr.
— Saýda oryndaryna arnalǵan jer ýchaskeleri 7 jylǵa deıin jalǵa beriledi. Quny da qymbat emes. Kásipker sharshy metri úshin jylyna 13 myń men 17 myń teńgeniń aralyǵynda qarjy tóleıdi. Eger bir jer telimine úmitkerler sany 4 adamnan assa, onda atalǵan ýchaske aýksıon arqyly beriledi. Bul shaǵyn jáne orta bıznesti damytýǵa múmkindik beretin serpilis , — deıdi «Aqtóbe» áleýmettik kásipkerlik korporasıasynyń basqarma basshysy Azamat Medeýbaev.
