Aqtóbe qalasynda kásipkerlerdiń «Jańa trend retindegi áleýmettik kásipkerlik» taqyrybynda tegin semınar-keńes ótti. Sharany oblystyq kásipkerlik basqarmasy Qazaqstandaǵy AQSH elshiliginiń qoldaýymen uıymdastyrdy.
Oqý-semınardyń maqsaty — jeke tulǵalardyń óz áleýmettik jobasyn ázirleýdi, kásipkerlik daǵdylaryn damytýdy, sondaı-aq qoǵamdaǵy mańyzdy áleýmettik máselelerdi sheshýge arnalǵan ıdeıalardy qoldaýǵa nıet bildirgenderdi oqytý. Áleýmettik kásipker, tájirıbeli trener Emın Áskerovtiń aıtýynsha, búgingi kúnge deıin 500-den astam adamdy atalmysh salany ıgerý jolynda oqytqanyn aıtady. Al ózi ıgerip otyrǵan kásibinde 32 adamdy jumyspen qamtyp otyr. Qaramaǵyndaǵy jumysshylary túrli dıagnozdarǵa shaldyqqan kemistigi bar adamdar. Arasynda jazasyn ótep shyqqandary da bar. Oqý-semınarǵa kelgenderdiń deni óz kásibin bastaǵandar. Semınarǵa qatysýshylar «áleýmettik-baǵdarly jobany qalaı qurý kerek jáne qalaı tabysqa jetýge bolady?» degen sekildi suraqtarǵa jaýap aldy.
— Áleýmettik kásipkerlik — elimizde jańadan ıgerilip, qolǵa alynyp kele jatqan sala. Bul salany ári qaraı ıgerip, jumysyn bastap ketýge aqtóbelikterdiń múmkindigi zor. Óıtkeni oblys ákimdigi buny qoldaıdy. Bul bizdi qýantady, — deıdi Emın Áskerov.
Oqý-semınaryna kelgenderdiń biri — Serǵazy Qorǵanbekov. Búginde «Qulaman» sharýa qojalyǵyn basqaryp otyrǵan zeınetkerdiń negizgi mamandyǵy — dáriger. Semınarǵa kelýdegi basty maqsaty da medısına salasyna qatysty. Aıtýynsha, Aqtóbede ınovasıalyq oftalmo-pedıatrıalyq ortalyq ashqysy keledi.
— Meniń kópten beri oılap júrgen oıym — osy. Qalamyzda balalardyń kózderin qaratatyn arnaıy ınovasıalyq tehnologıalarmen jabdyqtalǵan ortalyq ashylǵanyn qalaımyn. Qyzym — dáriger, medısına ǵylymdarynyń doktory. Búginde Almaty qalasynda eńbek etip jatyr. Egerde osy jobany qolǵa alyp, isim júrip jatsa, ol óziniń týǵan qalasyna kelýge daıyn. Mende maman da, ǵımarat ta bar. Tek atalǵan ortalyqqa qural-jabdyqtar alý úshin qalaı grantqa qol jetkizýge bolady, jalpy bıznesti qalaı uıymdastyrý qajet degen sekildi suraqtarǵa jaýap alyp, bıznes ıdeologıasyn uǵyný úshin búgingi semınarǵa keldim. Búgingi semınar kez kelgen óz kásibin bastaımyn degender úshin taptyrmas múmkindik alańy boldy, — deıdi Serǵazy Qorǵanbaev.
