Bul týraly Aqtóbe qalasynyń óner ortalyǵynda uıymdastyrylǵan tamyz keńesinde aıtylǵan bolatyn. Bıylǵy tamyz keńesi QR Prezıdenti N.Nazarbaevtyń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri», Qazaqstan Respýblıkasynda bilim berýdi jáne ǵylymdy damytýdyń 2016-2019 jyldarǵa arnalǵan memlekettik baǵdarlamasyn júzege asyrý aıasynda ótkizildi.
Tamyz pedagogıkalyq keńesin ashqan oblys ákimi Berdibek Saparbaev eldiń, ulttyń bolashaǵynyń muǵalimderdiń kásipqoılyǵy men óz isine degen adaldyǵyna tikeleı baılanysty ekendigine toqtaldy.
— Sizder qoǵam úshin asa jaýapty, eldiń bolashaǵyn tárbıeleıtin mamandyq tańdadyńyzdar. Kásibı biligi joǵary, bilimi myqty, jańa zamanaýı ınovasıalyq oı-paıymy bar pedagogtar bolǵanda ǵana elimizdiń gúldenýine, kórkeıýine úles qosa alatyn myqty mamandar tárbıeleı alamyz. Sizderdiń eńbekterińiz zor qurmetke laıyq, jańa oqý jylynyń bastalýymen quttyqtaı otyryp, jaýapkershilik júgi aýyr jumystaryńyzǵa sáttilik tileımin, — dedi oblys ákimi B.Saparbaev.
Sodan soń oblystyq bilim basqarmasynyń basshysy Lázzat Orazbaeva sóz alyp, jańa oqý jylyna daıyndyq jóninde baıandady. Oblystyń bas pedagogy ótken oqý jylyn qorytyndylap, alǵa qoıǵan josparlardy pysyqtady. Onyń aıtýynsha, bıyl bilim salasyna 85 mıllıard teńge qarajat qaralyp otyr.
— Oblysta mektepke deıingi 545 uıymda 49 090 bala tárbıelenip jatyr.
Balabaqshamen qamtý úlesi — 96%, bul respýblıkalyq kórsetkishten áldeqaıda joǵary. Aýdandarda balabaqshalardaǵy oryn sany halyqtyń suranysyna saı keledi. Alaıda Aqtóbe qalasynda bul másele áli de ózekti kúıinde qalyp otyr. Sondyqtan qala ákimdigi balabaqshadaǵy oryn tapshylyǵyn joıýdyń tıimdi tásilderin qarastyryp, ońtaıly sheshim qabyldaýy qajet. Bıyl oblystaǵy 178 (51,1%) balabaqshaǵa kezekke turý men joldama berý elektrondy formatqa aýystyryldy. Qazirgi tańda Qobda selosynda, Alǵa, Hromtaý, Qandyaǵash, Embi, Jem, Temir qalalarynda avtomattandyrylǵan júıe 100% engizildi. Aqtóbe qalasy, Shalqar, Áıteke bı, Baıǵanın, Qarǵaly aýdandarynda elektrondy formatqa kóshý jumystary jyl sońyna deıin tolyq aıaqtalady. Osyǵan oraı, Aqtóbe qalasy jáne aýdan ákimdikteri balabaqshaǵa kezekke qoıý nemese joldama alý qyzmetin elektrondy formatta qoljetimdi etýdi jedeldetýi tıis, — dedi ol.
Aqtóbe oblysynda sońǵy úsh jylda jańa mektepter qurylysy qarqyn aldy. 2016-2018 jyldary 48 mektep salynypty. Al 2006-2016 jyldary, ıaǵnı on jyl ishinde 69 mektep salynǵan. Salystyryp kórińiz! Qazirdiń ózinde 27 mekteptiń qurylysy júrgizilip jatyr, olardyń 15-i jyl aıaǵyna deıin paıdalanýǵa beriledi. Bul oblystaǵy 2 apatty, 2 eski, 14 úsh aýysymdy mekteptiń máselesin sheshedi.
