2019-2021 jyldary L.N.Gýmılev atyndaǵy Eýrazıa ulttyq ýnıversıteti bazasynda 3 bloktan turatyn 2 467 oryndyq jataqhana salynady. Bul týraly keshe atalmysh ýnversıtettiń rektory, QR UǴA akademıgi Erlan Sydyqov dástúrli esep berý kezdesýinde málim etti.
Qazaqstan Respýblıkasynyń Prezıdenti, Ult kóshbasshysy N. Nazarbaev «Qazaqstan-2050» Strategıasy qalyptasqan memlekettiń jańa saıası baǵyty» atty Qazaqstan halqyna joldaýynda «Men jergilikti basqarýdy damytý tujyrymdamasyn bekittim. Ol aýyldyq, selolyq deńgeıde basqarý salasyn arttyrýǵa múmkindik jasaıdy jáne azamattardyń jergilikti mańyzy bar máselelerge qatysýyn keńeıtedi» dep atap kórsetken bolatyn. Eliniń erteńin oılaǵan Elbasynyń bul tujyrymdy sóziniń túp tórkinin tereń túsingen L.N. Gýmılev atyndaǵy Eýrazıa ulttyq ýnıversıtetiniń rektory, QR UǴA akademıgi Erlan Sydyqov bıyl da alǵashqy bolyp el aldynda esep berdi.
Eýrazıa ulttyq ýnıversıtetinde ótken esepti kezdesýde ǵylymı keńes músheleri, profesor-oqytýshylar, sala qyzmetkerleri jáne ata-analar men stýdent-jastar rektordyń 2017-2018 oqý jylynda atqarǵan jumystary men aldaǵy josparyn tyńdady.
Esepti baıandamada jyldyń bilim jáne ǵylym salasyndaǵy jetistikterine basa mán berildi. EUÝ memlekettik baǵdarlamalardy ustanady. Oǵan mysal Elbasymyzdyń 2020 jylǵa deıingi qoıylǵan maqsattardy iske asyrý úshin jasalyp jatqan jumystar.
Jıynda aıtylǵandaı, bıyl da Eýrazıa ulttyq ýnıversıtetinde QR Prezıdentiniń strategıalyq baǵdarlamalaryn oqý orny kóleminde iske asyrý, profesor-oqytýshylar men stýdentterdiń áleýmettik jaǵdaıyn qamtamsyz etý, turmys jaǵdaıynyń jaqsarýyna yqpal etýge júıeli jumystar júrgizile bermek. Olaı deıtinimiz, ótken jyly ýnıversıtet rektory Erlan Sydyqov Elbasy qabyldaýynda bolǵanda, Nursultan Ábishuly: «Memleket pen qoǵamnyń bereke-birligi, ál-aýqaty men damýy jetekshi ýnıversıtetterdiń sapasyna tikeleı qatysty» dep, qadaý-qadaý tapsyrma bergen bolatyn.
2017-2018 oqý jyly ýnıversıtet osy tapsyrma údesinen shyǵý úshin eńbektengeni kórinip tur. Ásirese Ult kóshbasshysynyń «Rýhanı jańǵyrý: bolashaqqa baǵdar» atty baǵdarlamalyq maqalasy aıasynda ótken jylda ýnıversıtet osy eldik-memleketshildik bastamanyń jýan ortasynda júrdi. Óıtkeni ýnıversıtet rektoryna memlekettik deńgeıde osy baǵdarlamanyń «Týǵan jer» baǵytyn basqarý júktelip, ýnıversıtet – «Rýhanı jańǵyrýdyń» tutastaı ǵylymı-ádistemelik alańyna aınaldy. Qazaqstannyń tórt óńirinde bolyp, jańǵyrý is-sharalaryn júıeleýdi úılestirdi. Tipti osy baǵdarlamanyń IýNESKO shtab-páterindegi (Parıj) tanystyrylymyna da qatysyp qaıtty.
Ýnıversıtet ǵalymdary «Álemdik 100 oqýlyqty aýdarý», «Sıfrly Qazaqstan», «Qazaqy latyn qarpi» jobalaryn oryndaýǵa da atsalysyp keledi.
Byltyr EKSPO halyqaralyq kórmesin uıymdastyrý men ótkizýdegi EUÝ-dyń keshendi qyzmeti Elbasy, Astana ákimi tarapynan joǵary baǵalanǵanyn bilemiz.
«Syrt kóz – synshy» degen, QS reıtıńi boıynsha EUÝ jas JOO ishinde álemdik kóshbasshy TOP-50-diń ishinde (46-oryn). Shyǵys Eýropa men Ortalyq Azıa elderiniń «QS: EECA» aımaqtyq reıtıńinde 24-orynǵa kóterilgen. QS World University Ranking 2018 reıtıńinde Top-400-dikte. QS-tiń «fızıka jáne astronomıa» baǵytyndaǵy pándik reıtıńinde Top-500-dik ishinde.
Ǵalymdarymyzdan silteme jasaý ındeksi boıynsha Webometrics «Transparent Ranking: Top Universities by Google Scholar Citations» reıtıńinde Qazaqstan oqý oryndary ishinde kósh bastady. Taıaýda ǵana «EUÝ asa bedeldi álemdik Times Higher Education reıtıńine endi» degen taǵy bir súıinshi habar aldy.
Sondaı-aq EUÝ óz elimizdegi basty ulttyq reıtıńte de top bastap, 1, 2, 3 júldeli orynda tur. Qalyptasqan abrevıatýramen aıtsaq, NKAOKO men NAAR, kásipkerlerdiń «Atameken» ulttyq palatasy osyndaı baǵa bergen.
Instıtýsıonaldyq jáne arnaıy akredıtteýden ótý – ómir talaby. 2017-2018 jyly oqý orny bakalavrıat, magıstratýra, doktorantýranyń 169 bilim baǵdarlamasyn akredıtteýden ótkizdi. Bul - 100 paıyz bilim baǵdarlamasynyń 97 paıyzy degen sóz.
30-ǵa jýyq bilim baǵdarlamasy Germanıanyń ACQUIN jáne ASIIN agenttikteriniń akredıtteýinen ótti. Óıtkeni bilimdegi sapa – ýnıversıtettiń alǵa qoıǵan basty mindeti. Osy baǵytta mınıstrlikpen jáne jetekshi JOO-larmen birigip «Akademıalyq adaldyq lıgasyn» qurǵan.
Eń bastysy, bıyl Eýrazıa ulttyq ýnıversıtetine 7 myńnan astam bilim alýshy tústi. Rekordtyq kórsetkish! Onyń 80 paıyzdan astamy – memlekettik grant ıegerleri. Bul – el senimi, jastar senimi.
Ýnıversıtettiń basty mindeti – bilim berý. Bilim bolǵanda da sapaly, jańa zamanǵa laıyq, básekege qabiletti bilim! Sondyqtanda bolar, ár ata-ana EUÝ-dy osy úshin de tańdady.
Ulttyq ýnıversıtettegi 13 fakúltet – áleýetti baǵyttardyń arnasy. 2 myń profesor-oqytýshy – jastar qýatyna dem berýshi tálimgerler. Olardyń arasynda dabysy álemge ketken akademıkter, memlekettik syılyqtyń jáne TMD syılyǵynyń ıegerleri, memleket jáne qoǵam qaıratkerleri bar. Birtýar tulǵalar osy ǵımarattarda dáris oqıdy. 20 myń bilim alýshynyń deni – «altyn belgi», «qyzyl dıplom» ıegerleri, olımpıada men sporttyq jarystardyń jeńimpazdary, óz aýyly men óńiriniń talanttary men talaptylary.
GPIIR dep qysqartylyp aıtylatyn memlekettik ındýstrıaldyq-ınnovasıalyq damý baǵdarlamasy mamandaryn da osy oqý orny daıarlaıdy. Talapty jastar bakalavrıattyń – 71, magıstratýranyń – 68, doktorantýranyń – 39 mamandyǵy boıynsha bilim alyp shyǵady. 22 birlesken bilim baǵdarlamasy júzege asyrylýda. Osynyń nátıjesinde jastar EUÝ men shetel ýnıversıtetiniń qos dıplomyn alyp shyǵady.
Bıyl ýnıversıtet bilim aıdynyna «IT-menedjment», «IT-aýdıt», «Ekologıalyq aýdıt», «Esepteý lıngvısıkasy», «Sıfrlyq krımınalısıka» sıaqty buryn-sońdy bolmaǵan jáne aıryqsha mamandyqtardy shyǵardy.
Ǵylymı deńgeıi 70 paıyz: bul sapta 259 ǵylym doktory, 665 ǵylym kandıdaty, 180 PhD dáris beredi. Prezıdenttiń «Bolashaq» baǵdarlamasynyń túlekteri – 200. Sonymen qatar bıyl shetelden bilikti 90 profesor shaqyrylsa, 327 profesor-oqytýshylary shet elde bilim-biligin kóterip qaıtty.
Bilim de ómirdiń ózi sekildi: jańaryp-jańǵyryp turady. Elbasy ınovasıa jáne rýhanı jańǵyrý mindetin alǵa qoıǵanda, kemel keleshekke batyl kóz jibergeni anyq.
Taıaýda Astana bolashaǵy týraly derekti fılmde Ult kóshbasshysy: «Biz Astanadaǵy jetekshi joǵary oqý oryndaryna zor úmit artamyz» dedi. Eýrazıa ulttyq ýnıversıteti sol úmitti aqtaý jolynda, ıaǵnı elge qajetti bilim men ǵylymdy jańǵyrtý ústinde.
EUÝ rektory Erlan Sydyqovtyń esepti baıandamasynda stýdentterdiń áleýmettik-azamattyq damý jaǵdaılary únemi nazarda ekeni basa aıtyldy. Elbasynyń «Áleýmettik 5 bastama» baǵdarlamasy zor serpin bergeni kórinip tur. Óz taraptarynan da qarap jatpaı ár jyly keminde bir áleýmettik nysandy iske qosyp kelgen. MGÝ fılıalynyń jataqhanasy, №7 Stýdentter úıi túrli ekonomıkalyq qıyndyqqa qaramaı ýaqytynda tapsyrylǵan.
«Ras, jataqhana boıynsha birshama problema bar. Ony Elbasyǵa deıingi el tulǵalary bilip otyr. Bári birte-birte sheshiledi», - deıdi rektor Erlan Báttashuly esepti baıandamasynda. Qazirgi 7 oqý-zerthanalyq ǵımaraty, 7 stýdentter úıi, jas ǵalymdar úıi, «Eýrazıa» sport kesheni, «Tumar» sport-saýyqtyrý bazasy, ǵylymı kitaphana, startap – bári de áleýmettik ıgilikteri.
Jańa № 7 stýdentter úıinde jastarǵa arnalǵan kovorkıng-ortalyq ashylyp, sport ortalyǵy josparlanyp otyr. Munda utqyrlyq baılanyspen kelgen sheteldik stýdentter de laıyqty ornalastyrylǵan. Buıyrsa, 2019-2021 jyldary 3 bloktan turatyn 2467 oryndyq jataqhana qurylysyn bastamaq. Bul – Elbasy tapsyrmasyn oryndaýdyń jolyndaǵy jaýapty is-shara.
Taǵy bir aıta ketetin jaıt, bilim alýshylardyń ǵylymı-zertteý jumysyn júrgizýine barlyq qolaıly jaǵdaı týǵyzyp otyr. Jańa formattaǵy Jas ǵalymdar keńesi, Stýdentterdiń ǵylymı qoǵamy belsendi qyzmet etýde. Tuńǵysh Prezıdent qorynyń baıqaýynda EUÝ-dyń Jas ǵalymdar keńesi respýblıkadaǵy «Eń úzdik keńes» ataǵyn jeńip alǵan.
Túrli ǵylym salasy boıynsha bakalavrıat, magıstratýra, doktorantýra bilim alýshylarynyń respýblıkalyq baıqaýynda 2017 jyly 48 ǵylymı jumys, 2018 jyly 39 ǵylymyı jumys jeńimpaz dep tabylǵan. 400 stýdent halyqaralyq jáne respýblıkalyq baıqaýda top jarsa, ótken oqý jyly qurylǵan Jastardyń bıznes-ınkýbatory 100 jobany kún tártibine shyǵaryp, 26-syn júzege asyryp úlgerdi. Sóıtip, 87 jas azamatqa jumys taýyp berdi. Olardyń jańa 10 bıznes-jobasy synaq merziminen ótken.
Eýrazıa ulttyq ýnıversıteti İT baǵytyna aıryqsha kóńil bóledi, óıtkeni «Sıfrlyq Qazaqstannyń» maqsat-máni de osynda. «Elektrondy ınjınırıń» zerthana kesheni, «Kıber qaýipsizdik» zerthanasy, SOTSBI-ge (telefon júıeleriniń – aqparat qorynyń sertıfıkasıalanǵan qurylǵysy) qatysty ınteraktıvti 2 zerthana izashar jumysyna kiristi. Sondaı-aq GPIIR negizinde jasaqtalǵan ǵylymı zerthana akredıtteýden ótken.
Ár ýnıversıtet úshin kitaphana – bilim men ǵylymnyń kilti. Jańa zamanda onyń formaty da, qyzmet aıasy da jańarǵan. EUÝ kitaphanasynyń qory 1.644.032 dana kitap. 2017 jyly qordyń jańarý koefısıenti 26,4% artsa, álemdik bedeldi ǵylymı aqparat, mýltıpándik ǵylymı derek qoryna enýdiń jańa tehnologıalyq negizderi júzege asyrylǵan.
Shyǵarmashylyqta shek joq. Rektordyń ıdeıasymen İT mamandyǵynyń bir top stýdenti toǵyzqumalaqtyń mobıldik qosymshasyn oılap taýyp, álemdik baıqaýlarǵa joldama aldy.
Qazaq «jaqsyda jattyq joq» deıdi.
EUÝ álemniń 52 eliniń joǵary oqý oryndarymen, ǵylymı uıymdarymen yntymaqtastyq jóninde 343 kelisim-shart jasasqan. Munyń negizgi máni – akademıalyq utqyrlyq, magıstrant, doktorant taǵylymdamasy, birikken ǵylymı zertteýler, profesorlar men top-menedjerler shaqyrý men almasý.
Mysaly, ótken jyly akademıalyq utqyrlyq aıasynda Eýropa, AQSH, Azıa jáne TMD elderiniń 19 joǵary oqý ornynan 68 bilim alýshyny (bakalavrıat – 57, magıstratýra – 11) qabyldady.
2017-2018 oqý jyly Shyǵys akademıalyq utqyrlyq baǵdarlamasy boıynsha EUÝ-dyń 338 bilim alýshysy AQSH, Eýropa, Azıa jáne TMD elderiniń 71 joǵary oqý ornyna bilim alýǵa attandy. Onyń ishinde QR BǴM qarjylandyratyn baǵdarlama boıynsha – 53, Erazmýs+ baǵdarlamasy boıynsha – 26, Mevlana – 2, UGRAD – 1, óz esebi boıynsha – 219, joǵary oqý ornynyń esebinen – 5, qos dıplom baǵdarlamasy boıynsha – 28, JASSO – 1, N.Kenjebekov atyndaǵy stıpendıalyq baǵdarlama boıynsha – 1, Koreı úkimetiniń stıpendıasy boıynsha – 1 bilim alýshy deńgeıin laıyqty kóterip qaıtty.
Osy oqý jyly Ózbekstan, Mońǵolıa, Qyrǵyzstan, Aýǵanstan, Tájikstan, Túrkıa, Iran, Lıvıa, Sırıa, Qytaı, Reseı jáne basqa elderden kelgen sheteldik stýdentterdiń jalpy sany 574 adamdy quraıdy.
Qazaqstanda bilim berý habyn qalyptastyrý – mańyzdy shara. Osy baǵdarlamany oryndaý aıasynda sheteldik stýdentterdiń sany jyldan-jylǵa artýy tıis. Bul rette shetel ýnıversıtetterinde fılıal, ókildik, mádenı ortalyq ashý ortaq iske serpin beredi. Eýrazıa ulttyq ýnıversıteti ótken jyly Qytaıda, Iranda, Túrkıada, Belorýssıada óz ortalyǵyn ashty.
2017-2018 oqý jyly EUÝ-da ashylǵan daıyndyq bólimi - bilim berý qyzmetiniń jańa baǵyty deýge bolady. Bıyl tyńdaýshylar sany 2 esege ósti. Bul da – júıeli eńbek pen sapaly bilimniń nátıjesi.
«Sheteldik stýdentterimiz áli-aq Qazaqstannyń, Astana men Eýrazıa ýnıversıtetiniń adal dosyna, mádenı elshisine aınalatynyna senimdimin», -deıdi Erlan Sydyqov.
Ǵylymı-zertteý – kez kelgen ýnıversıtet úshin aıryqsha basym baǵyt. Onyń ústine EUÝ zertteý ýnıversıteti mártebesin alý jolynda ekeni belgili. Ǵalymdardyń ǵylymı belsendiligi, ásirese joǵary reıtıńti jýrnaldarda maqala jarıalaýy – álemdik ortaq talap.
