Azat Perýashev eldi mekenderdi jańadan salynǵan avtojoldar aınalyp ótetindikten óz bıznesin joǵaltyp jatqan jol boıyndaǵy servıs kásipkerlerine jaqtasyp, Investısıalar jáne damý mınıstrligine aýyl turǵyndary úshin tegin jol júrýdi saqtap qalýdy usyndy.

«Jol boıyndaǵy servısti damytý arqyly jergilikti kásipkerlerge basymdyq berilýi tıis» - avtomobıl joldaryn damytý jóninde ótken «úkimet saǵatynda «Aq jol» fraksıasynyń jetekshisi eldi mekenderdi aınalyp ótetin avtojoldardy aýystyrýdan zardap shekken shaǵyn bıznes týraly ashyp aıtty.

«Biz ondaǵan eldi mekenderdi aınalyp ótetin tas joldaryn salýdamyz. Iá, adamdardy zymyrap óte shyǵatyn kólikterden qorǵaımyz. Biraq dál mundaı eldi mekenderde osy joldardyń arqasynda kóptegen otbasylar ómir súrip kelgenin eskerý kerek. Olar STO (tehnıkalyq qyzmet kórsetý stansıasy), janarmaı quıý stansıalary, kafeler ashty, jemis-jıdekter satty. Endi, biz barlyq joldardy eldi mekenderdiń sheńberinen shyǵaryp, kóshirmekpiz. Barlyq osy shaǵyn bıznes nysandary óz kelýshilerin joǵaltady, qurdymǵa ketedi. Al, bul aýyldarda basqa eshqandaı jumys joq.

Iá, jańa tas joldarynyń boıynda soǵan uqsas ǵımarattarǵa arnalǵan jer telimderi bólinedi. Olar aýksıonda satylady. Alaıda, jergilikti kásipkerler aýksıonnyń baǵalaryn kótere almaıdy, sondyqtan da ony úlken qalalardaǵy iri kompanıalar utyp alady. Al jergilikti shaǵyn jáne orta bıznes bolsa ornyn sıpap qalady, keshegi jumys berýshilerdiń ózderi jumysynan aıyrylyp qalady.

Bálkim, mundaı aýqymdy baǵdarlamalardyń nátıjesi tek jańa joldardy salý emes, sonymen qatar jańa jumys oryndaryn ashý jáne óńirlerde halyqty jumysqa tartý bolýy tıis sıaqty. Olaı bolsa, endeshe, sol kásipkerlerdi saqtap qalaıyq, trassa jıeginen jer telimin bólgende jergilikti turǵyndarǵa, ásirese aýyl-aımaqtaǵy halyqqa basymdyqtar berilýi úshin qandaıda bir jeńildikter qarastyryp, zamanaýı talaptardy qoldanysqa engizýde olarǵa kómek kórseteıik», - dep usyndy Perýashev. Onyń pikirinshe, iri kompanıalar tarapynan jol boıyndaǵy ınfraqurylymdy monopolıalandyrý Prezıdenttiń buqaralyq kásipkerlikti damytý ıdeıasyna tikeleı qaıshy keledi. Sondaı-aq, Elbasynyń bes áleýmettik bastamasy boıynsha shaǵyn kásipkerlikke jeńildikpen nesıe berý jol boıyndaǵy servıs salasyna da baǵyttalsa bolar edi.

Budan basqa, «Aq jol» tóraǵasy basqa da túıtkildi máselege toqtaldy. Bul aqyly joldar aımaǵynda turatyn aýyl turǵyndaryn qorǵaý máselesi.

Qazir bizge barlyq jańadan salynǵan avtojoldar birtindep aqyly jol júrýge aýystyrylatyn bolady dep aıtyp otyr. Ras, olar osy joldardyń boıynda turatyn jergilikti turǵyndar myń (1000) teńgege abonement satyp alyp, onymen bir jyl boıy júre alady dep ýáde berýde.

Alaıda, búkil álemde halyq basqa jolmen qorǵalǵan – aqyly avtomobıl joldary men avtobandar álternatıvti, balamaly tas joldary bar bolǵan kezde ǵana engiziledi. Iaǵnı, turǵyndardyń tańdaý múmkindigi bolady: baıaý júrý, biraq tegin; nemese jyldam, biraq qymbat. Al, biz bolsaq balamaly trassalardy salmaımyz, azamattardy tańdaýsyz qaldyramyz jáne olardy tek qymbat jolda júrýge májbúrleımiz. Olardyń ne kinási bar? Áriden soń, bul joldar olardyń tólegen salyqtarynyń da esebinen salynyp jatyr», - degen Azat Perýashev mınıstr Jeńis Qasymbekke nazar aýdaryp, kelesideı mysaldardy keltirip ótti.

Bıylǵy jyly Astana – Pavlodar ýchaskesinde qozǵalys iske qosylady dep aıtyldy. Eger qatelespesem, bul tas joldy 8-shi jyl salýda. Buǵan qosa aldymen eski joldy qıratyp, onyń ústine jańadan sala bastady (ony salyp jatqanyna 8 jyl boldy). Al, osy jyldar ishinde turǵyndar múldem jolsyz qaldy, olarǵa aınalyp júrýge týra keldi.

Eski joldy óz ornynda qaldyrý qıyn ba edi, jaman-jaqsy bolsyn adamdar sol jolmen qatynaıtyn edi ǵoı. Basqasy basqa, bizde jazyq jer jetedi! Solǵa qaraı, nemese ońǵa qaraı jańadan jyldamdyqty trassa salmasqa bolmas pa, eski joldy qıratýdyń ne qajeti bar edi? Ony saqtap, tegin etip qaldyrý kerek edi.

Múmkin, men qazir sál ańǵal, ańǵyrt nárseni aıtyp jatqan bolarmyn, degenmen, bul másele meni osy eldiń azamaty retinde alańdatady. Bul aýyldyq jerlerde turatyn árbir azamatymyzǵa da qatysty, olar úshin árbir tıyn-teben esepte. Al, biz bul jerde otyryp alyp olar úshin bárin de sheship qoıdyq –júrgiń kele me – myń teńge tóle!

Men mınıstrlikten aqyly joldarda turatyn aýyl turǵyndarynyń múddelerin qorǵaý úshin tıimdirek sharalar qabyldaýyn suraımyn, sebebi olardy shyǵynǵa ushyratpaý úshin». – dedi Perýashev.