Úkimettik emes uıymdar dinı ekstremızmniń aldyn alý jumystarynda memlekettik organdarmen birlesip jumys isteıdi.
QR Qoǵamdyq damý vıse-mınıstri Berik Aryn «Dinı ekstremızm men terorızmniń aldyn alý máselelerinde qoǵamdyq ınstıtýttardyń róli» taqyrybyndaǵy respýblıkalyq konferensıa barysynda dinı ekstremızm men terorızmniń aldyn alý jumystarynda dinı birlestikterge úlken úmit artylatynyn málimdedi.
Vıse-mınıstrdiń aıtýynsha, ekstremıstik ıdeıalardyń taralýyna sarapshy qaýymdastyqtyń, ǵylym jáne shyǵarmashylyq, buqaralyq aqparat quraldary ókilderiniń ıntellektýaldy túrde qarsy turýy mańyzdy. Gýmanıtarlyq saladaǵy ǵalymdardyń, dintanýshylardyń jáne resmı din qyzmetkerleriniń kúsh-jigeri arqasynda ekstremıster men terrorısterdiń teris ıdeologıasyn anyqtap, osyndaı ıdeıalardy, dinı ilimderdi taratýshylardyń zańǵa qaıshy áreketteri aıqyn kórsetilýi tıis.
«Biz atalǵan jumystardy júzege asyrýda eldegi resmı tirkelgen dinı birlestikterdi, eń aldymen bizdiń qoǵamymyzdyń rýhanı damýynyń problemalaryn sheshýde mańyzdy ról atqaryp kele jatqan dástúrli dinı birlestikterdi senimdi seriktester retinde sanap, olarǵa úlken úmit artamyz. Biz yntymaqtastyq aıasynda Qazaqstan Musylmandary Dinı basqarmasymen jáne Orys Pravoslav shirkeýimen memorandýmǵa qol qoıdyq», - dedi Berik Aryn.
Dinı ekstremızm men terorızmniń aldyn alý boıynsha jumystar úkimettik emes uıymdardyń qatysýymen iske asyrylýda. Aımaqtyq konsýltasıalyq ortalyqtar jelisi quryldy. Ortalyqtar din máseleleri týraly keńes beredi. Olardyń qyzmetkerleri destrýktıvti dinı aǵymdardyń kóshbasshylary jáne belsendilerimen jeke kezdesýler ótkizedi. Budan bólek, quqyq qorǵaý organdary men ákimdikterdiń qyzmetkerlerine arnalǵan dárister men semınarlar uıymdastyrylady.
«Terorızmge qarsy komıtet» Respýblıkalyq qoǵamdyq birlestigi, «Dintanýshylar kongresi» qoǵamdyq uıymy, «Din máselelerin zertteý ortalyqtarynyń qaýymdastyǵy» qoǵamdyq uıymy, «Ýaqyp» QQQ, «Aqnıet aqparattyq-túsindirý jáne beıimdeý ortalyǵy» qoǵamdyq qorymen jáne t.b úkimettik emes uıymdarmen belsendi yntymaqtastyq ornaǵan. Tutastaı alǵanda Mınıstrlik atalǵan baǵyt boıynsha 29 úkimettik emes uıymmen birlesip jumys isteıdi.
Aıta keteıik, konferensıaǵa múddeli memlekettik organdardyń, qoǵamdyq jáne dinı birlestikterdiń ókilderi, QR Parlamentiniń ókilderi, dintanýshylar men sarapshylar qatysyp, turǵyndar arasynda, sonyń ishinde jastar arasynda dinı ekstremızm men terorızmniń aldyn alýǵa baǵyttalǵan jumystardy jetildirý jóninde óz usynystaryn ortaǵa saldy.
