Qazaqstan týrızmin damytýǵa Almaty oblysy belsendi qatysady. Tumsa tabıǵaty talaıdyń kóz janaryn jaýraǵan aımaq pen taýly demalys oryndaryna ınvestısıa quıylyp, arqanjoldar tartylady. Májilistegi Úkimet saǵatynda ózge eldiń azamattaryn elimizge qalaı tartyp, qyzyqtyrý kerek ekeni sóz boldy. Depýtattar ol úshin áýe kemesine bılet qunyn arzandatyp, tarıhı oryndardy qalypqa keltirýdi usyndy.

Mádenıet jáne sport mınıstri Arystanbek Muhamedıuly aldaǵy 6 jylda el týrızmin myqtap qolǵa almaq. Búginde jalpy ishki óniminiń 1,3 paıyzyn quraıtyn týrızmniń úlesi 2023 jyly segiz paıyzǵa jetedi. Ol úshin mınıstr on joba atap ótti. Qujatqa Balqash, Alakól kólderi, Sharyn shatqaly, ejelgi Túrkistan aımaǵy, Mańǵystaýdaǵy Ashysor, kýrorttyq mekender – Imantaý-SHalqar men Baıanaýyl, Astana mańyndaǵy kóshpendiler ortalyǵy engen. Olardyń arasynda eń basty ekpin Almaty oblysynda salynatyn taý shańǵysy klasterine túsip otyr. Onyń aıasynda taýly kýrorttar – Aqbulaq pen Shymbulaqty, Qaskeleń men Túrgendi baılanystyratyn arqanjol tartylmaq. Bul bastama jylyna 13 mıllıon týrısi tartýǵa yqpal etpek.

«Almaty óńirin óte jaqsy bilesizder. Atalǵan aýmaq taý shańǵysy salasyn damytýdyń eń iri ortalyqtarynyń biri bola alady. Sebebi, qazirgi kezde bizde Shymbulaq, Tabaǵanda taý shańǵysy klasteri, sondaı-aq ózge de nysandar bar. Eger biz birinshi kezeńde olardy ózara arqanjolmen baılanystyrsaq, onda taý shańǵysy jelisiniń ınfraqurylymy paıda bolady. Sóıtip, qysqy demalys túrlerinen bólek, jazǵy kezde jaıaý júrý, atpen jáne velosıpedpen serýendeý baǵyttaryn da damyta alamyz», – dedi QR Mádenıet jáne sport mınıstri Arystanbek Muhamedıuly.

Al shet el azamattaryn Qazaqstanǵa tartý úshin jyl saıyn 800 mıllıard dollar ınvestısıa tartylady. Bul is bolashaqta da jalǵasyn tappaq. Aldaǵy ýaqytta kásipkerler týrızmge yńǵaıly 100 orynǵa aqsha quıady. Investısıalyq portfeli 4 mıllıard 900 mıllıon teńgeden asqan bıznes ókili korporatıvtik tabys salyǵynan – 10, jer salyǵynan 8 jylǵa bosatylmaq. Qujatty tyńdaǵan halyq qalaýylary mınıstrge óz ýájderin aıtty.

«Mysaly, Beket ata meshitin alaıyq. Adamdar barady, kóptep barady, ákim jol salyp berdi. Bár jaqsy. Biraq zıarat etýshiler kórpede otyryp, ózderimen ákelgendi as etedi. Ol jerde birde-bir kádesyı, týy bar dúńgirshekterdi tappaısyz. Qarapaıym ájethana da joq. Infraqurylym joq. Bul jerdi búkil álem biledi ǵoı», – degen másele kóterdi QR Parlamenti májilisiniń depýtaty Tursyn Syzdyqov.

«Bul oryndar IýNESKO-nyń mádenı qundylyǵyna jatpaıdy. Qazaqstanda ondaı tek úsh nysan bar. Olar – Qoja Ahmet Iassaýı kesenesi, Qamqorlyq jáne Uly Jibek Jolynyń úshinshi bóligi. Árıne, bul óte az. Biz mádenı nysandardy retke keltirý jumystaryn respýblıkalyq tizimge kiretinderine ǵana júrgize alamyz», – dedi Arystanbek Muhamedıuly.

Depýtat Irına Smırnova İshki ister mınıstrligine tótesinen suraq qoıdy. Saýalynda, tártip saqshylarynyń saıahatshylarmen sóılesý mádenıeti joq ekeni aıtylǵan. Vedomstvo ókilderi bul jekelegen jaǵdaıda ǵana oryn alady dep qysqa qaıyrdy. Osy rette jaýaptylar elimizge saıahattap kelgenderdiń qaýipsizdigin qamtamasyz etý úshin «Týrısik polısıa» qurmaq. Olardyń atqaratyn qyzmetteri qazir naqtylanyp jatyr. Mádenıet jáne sport mınıstrligimen birge qolǵa alǵan bul shara týrıserdiń elimizde júrip-turý qaǵıdalaryna da áser etýi múmkin.

«Biz Mádenıet jáne sport mınıstrligimen osy suraq boıynsha birge jumys istep jatyrmyz. Birneshe suraqty qamtydyq. Olardyń biri – Týrısik polısıa qyzmeti. Atalmysh qyzmet ókilderi belgili mindetterdi oryndaıtyn bolady. Qazir sheteldik tájirıbeni zerttep jatyrmyz», – dedi QR İİM Kóshi-qon qyzmeti komıtetiniń tóraǵasy Murat Qabdenov.

Jyl sońyna deıin Astana men Almaty arqyly ushatyn Úndistan, Qytaı, Iran syndy 128 eldiń azamattaryna 72 saǵatqa vızasyz rejım engiziledi. Týrıserdi tartýdyń taǵy bir tetigi – ushaq bıletteriniń baǵasyn arzandatý. Investısıalar jáne damý vıse-mınıstri Tımýr Toqtabaevtyń aıtýynsha, vedomstvo búginge deıin balalarǵa, zeınetkerlerge, múmkindigi shekteýli jandarǵa, jastarǵa arnalǵan jeńildikter engizgen. Bılet qunyn odan da tómendetý birneshe ındıkatorlarǵa baılanysty. Onyń biri – avıaotyn baǵasy.