Almaty avtobýstarynda valıdatorlar ornatylmaıdy. Óıtkeni, qoǵamdyq kólikte júrgizýshimen esep aıyrysatyn jolaýshylar sany sırep keledi. Jolaýshylardyń tek 2 paıyzy jolaqysyn qolma-qol tólese, 97 paıyzy «Ońaı» kartasyn qoldanady. Sondyqtan, qoǵamdyq kólikterde qosymsha valıdator qoıýǵa qajettilik joq deıdi Almatynyń kólik holdıńindegiler.

Búgin birqatar BAQ qaladaǵy avtobýstarǵa 2019 jyly valıdatorlar qaıta ornatylady degen aqpar jarıalaǵan bolatyn. Tipti, qoǵamdyq kólikter ushyraıtyn jol apattarynyń 90 paıyzy júrgizýshiniń jolaýshydan tólem qabyldaýy kezinde bolatynyn jazǵan. Alaıda, Kólik holdıńi bul aqparattyń da jańsaq ekenin málimdep otyr.

«Qoǵamdyq kólikterge valıdatorlar qaıta ornatylady degen aqparat jalǵan. Kezinde, jolaqy tólemi «Ońaı» kartasy arqyly jáne aqshalaı jasalǵan ýaqytta, jolaýshylardyń 45 paıyzy aqyny júrgizýshige beretin. Keıin saralanǵan tarıf engizilip, qolma-qol tólem quny qymbattady. Osy tusta turǵyndar jappaı «Ońaı» kartasyna kóshti. Qazir bir qoǵamdyq kólikte kúnine 10-15 adam ǵana jol aqysyn júrgizýshige berse, 97 paıyzy kartamen eseptesedi. Sondyqtan bizge valıdator qoıýǵa qajettilik joq. Valıdator ornatý qosymsha shyǵyn ári avtobýs jelilerine qosymsha júkteme bolady», – dedi «Almaty qalasy Kólik holdıńi» JSHS dırektory Sadır Hamraev.

Holdıń esebi boıynsha, qoǵamdyq kólikterde tólem kartasy engizilgeli beri kóleńkeli aqsha aınalymy joıylǵan. Máselen, qolma-qol tólem kezinde tasymaldaýshy kompanıalar bir aılyq tabysyn 800 mıllıon teńgemen shektepti. Al elektrondy bılet júıesi engizilgeli tabys eselene túsip, olardyń aı saıynǵy tabysy 1,5 mıllırdqa jetetini belgili bolǵan. Qazir qoǵamdyq kólikterden aı saıyn 2 mlrd teńge túsedi. Sondyqtan «Ońaı» kartasyn qoldanýshylardyń sanyn budan ary kóbeıtý kózdelipti. Sondaı-aq, qolma-qol tólemdi túbegeıli toqtatyp,  júrgizýshiden júktemeni alý úshin tólem jasaýdyń jańa ádisin de iske asyrmaq.

«Biz jyl sońyna deıin jol aqysyn SMS arqyly tóleý júıesin engizemiz. Oǵan Qazaqstannyń barlyq uıaly baılanys operatorlary qatysady. Eger jolaýshy kartasyn umytyp ketse, jol aqysyn júrgizýshige tólemeı, SMS-pen ótese bolady. Ol úshin arnaıy biryńǵaı nómir qurylady. Ol nómirge «Ońaı» termınalynda jazylǵan qoǵamdyq kóliktiń kodyn jiberesiz. Birden jolaqysy tólenip, sizge habarlama keledi», – dedi Sadır Hamraev.