Almatyda «Alataýym – altyn uıam» degen ataýmen Qala kúnine jáne Alataý aýdanynyń 10 jyldyǵyna oraı dúbirli aıtys ótti.

Jyr jármeńkesine 20 aqyn qatysty. Eń úzdik 12-i ǵana fınalǵa ótip, 6 jup bolyp aıtysty. Bas júldege tigilgen kólikti qaraǵandylyq aqyn Tólegen Jamanov mindi. Odan ózge, 1-shi orynǵa 1 mıllıon teńge, 2-shi orynǵa 500 myń teńge berilse, al 3-shi oryndy ıelengender 300 myń teńgeden qarjylaı syılyq aldy.

Dýmandy keshte aıtyskerler qoǵamdaǵy ózekti máselelerdi beı-jaı qaldyrǵan joq. Qazylar alqasy sóz súleıleri basylyp emes, ashylyp aıtty dep aıtysqa joǵary baǵa berdi.

«Arasynda aıtylǵan qazaqtyń bilim máselesi, densaýlyq máselesi ulttyń janyna batqan jan aıqaıynyń barlyǵy osy aqyndardyń tiliniń ushynan uıqas bolyp órildi. Oǵan bárińiz de kýá boldyńyzdar. Boıymyzǵa qýat beretin, júregimizge shýaq beretin, ultymyzdyń eńsesin tikteıtin jaqsy aıtystardyń kórermeni bolýǵa jazsyn!», – dedi qazylar alqasynyń múshesi, «Aıqyn» gazetiniń bas redaktory Nurtóre Júsip.

«Óz kóńilimnen shyqqan aıtys boldy. Ózimniń oıymdaǵy aıtsam degen dúnıelerdi aıttym, jetkizsem degen dúnıemdi jetkizdim. Kózderińiz kórdi. Qazirgi qazaq aıtysynyń deńgeıi keremet qaryshtap ketti. Búgingi kúndegi aıtysty keshegi 90-shy jyldardaǵy aıtyspen salystyra almaısyz», – dedi Tólegen Jamanov.