Endi álemdegi eń uzyn quraq kórpeniń otany – Almaty. Osylaısha, qazaqstandyq tiginshiler 2 jyl buryn Malaızıada tirkelgen rekordty jańartty.

Naýryz aıynan beri 300-den astam sheber tikken kórpe Qala kúninde tapsyryldy. Rekordty Gınness kitabyna tirkeıtin resmı ókil jańa nátıje týraly sertıfıkatty Almaty ákimi Baýyrjan Baıbekke saltanatty túrde tabystady. Al myń boıaýǵa malynǵan jer jahandaǵy eń uzyn quraq kórpe Tuńǵysh Prezıdent saıabaǵyna jaıylyp, almatylyqtar men qala qonaqtaryn tántti etti.  

Almatynyń 1002 jyldyq týǵan kúnine erekshe syılyq tartý etildi. Meıramdy keń kólemde toılamastan buryn, aldymen Anglıadan arnaıy kelgen Djoann Brent  qala ákimine sertıfıkat tabystady. Onda almatylyq ismerlerdiń shynymen de rekordqa kirgeni taıǵa tańba basqandaı jazylǵan. Gınness rekordtar kitabynyń ókilderi ózderimen birge geodezıashy mamandardy erte kelipti. Olar tigilip bitken, san túrli ári sándi kórpeniń naqty uzyndyǵyn lazerlik qurylǵymen ólshepti.

Almatylyq ismerler quraq kórpemen Gınnestiń rekordtar kitabyna endi. Álemdegi eń uzyn kórpe 10 kılometr 900 metr bolyp tirkeldi. Este bolsa, ulttyq dástúrdi pash etetin týyndyny sheberler Naýryz qarsańynda tigip bastaǵan. Oǵan qaladaǵy 25 kitaphana men turǵyndar at salysty.

«Sizderdi álemdegi eń uzyn quraq kórpe tigip, Gınnestiń rekordtar kitabyna kirýlerińizben quttyqtaımyn. Qazaqstandyq quraq kórpeni kórý úshin arnaıy keldik. Bul shynymen de erekshe týyndy eken. Boıaýy qanyq, pishimi de kóz tartady. Dál osyndaı týyndyny alǵash ret kórýim», – dedi «Gınness rekordtar kitaby» Bas keńsesiniń ókili Djoann Brent.

Al saıabaqty boılaı jaıylǵan quraq kórpeni kórgen almatylyqtar tańdanystaryn jasyra almady. Aıta keteıik, quraq kórpe tigýdi qalanyń ortalyqtandyrylǵan kitaphana júıesi bastaǵan. Ideıany Almaty ákimdigi men qala turǵyndary da qoldady. Mata qabyldaıtyn shtab qurylyp, onda kez kelgeni kelip kómektesýge múmkindik alǵan bolatyn.