Halyqaralyq deńgeıdegi óner báıgesi Respýblıka saraıynyń aldynda ótip jatyr. Onda dástúrli qyzyl kilem jaıylyp, otandyq jáne álemniń ár túkpirinen kelgen kınogerler jıyldy. Al saltanatty shara aıaqtalysymen áıgili Kann festıvalinde júlde alǵan «Aıka» fılminiń kórsetilimi bastaldy. 

Kınosúıer qaýym kópten kútken óner merekesi boldy. Qazir ALMATY FILM kınofestıvaline álemniń ár túkpirinen kelgen mártebeli qonaqtar dástúrli qyzyl kilem ústinen júrip ótti. Barlyǵy da sándi smokıng pen ádemi kóılek kıip, kelýshilerdiń kózin qýantty. Saltanantty sharaǵa otandyq tanymal kınogerlerdiń barlyǵy jıylǵan. Kınofestıvaldiń tuńǵysh ret uıymdastyrylyp otyrǵanyna qaramastan, shetelden kelgen ataqty kınogerler de óte kóp. Olardyń qatarynda tanymal nemis aktrısasy Nastasá Kınskı de bar.

«Almatyǵa buryn kelgenimde de qala óte unaǵan edi. Endi mine, festıváldiń arqasynda taǵy jol túsip tur. Óte qýanyshtymyn. Jalpy, Almaty men úshin erekshe ádemi, ystyq qala. Ásirese, munda túrli ulttyń aırandaı uıyp, tatý-tátti ómir súrip jatqanyna tań qalamyn», – dedi aktrısa (Germanıa) Nastasá Kınskı.

Sharanyń shymyldyǵyn kásibı mamandar emes, kishkentaı balalar ashty. Olar úshin áýeli arnaıy qyzyl kilem uıymdastyryldy. Birinen biri ótken kóılekterin kıip, erekshe sándengen kishkentaı búldirshinder qyzyl kilem ústinde ózderin naǵyz óner juldyzy sezindi. Odan keıin balalar úshin kınoteatrdyń qos zalynda «Kólikter» men «Arystan patshasy» múltfılmderiniń kórsetilimi ótti. Balalardyń bul qýanyshyna ortaqtasýǵa «Arystan patshasyn» túsirgen rejıser Robert Mınkofftyń ózi keldi.

Alǵy sózdi alǵan qala ákimi Baýyrjan Baıbek, kishkentaı kórermenderge mártebeli qonaqtardy tanystyrdy. Ákim kóptiń kóńilinen shyǵyp, kıno tarıhynda eń mol kasalyq tabys jınaǵan týyndy jasaǵan ańyz adamnyń Almatyǵa kelýi úlken qurmet ekenin tilge tıek etti.

«Men bul kınofestıvaldiń balalarǵa arnalǵan qyzyl kilemmen bastalǵanyna qýanyshtymyn. Óıtkeni, bizdiń erteńgi bolashaǵymyz jáne kınonyń bolashaǵy osy kishkentaı búldirshinderimizdiń qolynda. Bizdiń «Bolashaq» korporatıvtik qory «Ýolt Dısneı» stýdıasymen 2011 jyldan beri birlesip jumys isteýde. Osy ýaqyt aralyǵynda Dısneıdiń 27 múltfılmin qazaq tiline aýdardyq. Balalarymyz álemge tanymal bolǵan, tamasha anımasıalyq týyndylardy qazaq tilinde kóre alatyny qýantady. Festıvál aıasynda da kishkentaı kórermenderimiz úshin arnaıy kórsetilimder bolady», – dedi Almaty qalasynyń ákimi Baýyrjan Baıbek.

ALMATY FILM FESTIVAL kınofestıvali 19 qyrkúıekke deıin jalǵasty. Osy ýaqyt aralyǵynda kórermen nazaryna 30 kınotýyndy usynylady. Olardyń on shaqtysy kornkýrstyq baǵdarlamaǵa qatysty. Qazylardy tánti etip, úzdik shyqqan Gran-prı ıesine 3 mıllıon teńge berildi. Al «Úzdik rejıser» 2 mln teńgeni qanjyǵasyna baılady. «Úzdik akter men aktrısa» jáne «Qazylar alqasynyń arnaıy júldesi» nomınasıalaryna 1 mıllıon teńgeden qarastyryldy.

Aıta ketsek, festıválge qatysýshy fılmderdiń baǵasyn tanymal kınogerler berdi. Qazylarǵa reseılik tanymal rejıser Sergeı Bodrov tórelik etti.

«Festıváldiń paıdasy óte zor. Kórermender sapaly fılmderdi tegin kórýge múmkindik alady. Eń bastysy, munda kıno ónerindegi jańa esimder belgili bolady. Jalpy, óz basym osy óner báıgesinde qazylyq etkenime qýanyshtymyn. Bul kınofestıvaldiń bolashaǵy zor dep oılaımyn. Aldaǵy 4 kúnde óte qyzyqty fılmder kóremiz jáne olardy laıyqty baǵalap, jas talanttardyń jolyn ashamyz dep úmittenemin», – dedi qazylar alqasynyń jetekshisi, kınorejısser (Reseı) Sergeı Bodrov.

Kınofestıval sheńberinde ártúrli bıznes-forýmdar uıymdastyrylyp, tanymal kınogerler óz sheberlik sabaqtaryn ótkizdi. Kórsetilimder «Dostyq Plaza» keshenindegi «Sınemaks» jáne SÝM-daǵy «Lúmıera sınema» kınoteatrlarynda kórsetildi. Al festıváldiń shymyldyǵyn bıyl Kann kınofestıvalinen júlde alǵan, rejıser Sergeı Dvorsevoıdyń ataqty «Aıka» fılmi ashty. Týyndynyń qazaqstandyq kórermender úshin tusaýkeseri keshki 20:30-da osy Respýblıka saraıynda ótti.