Óziniń jańa jasyn Almatynyń bas merekesimen birge atap ótip jatqan Lúbov Korchenko – eki ǵasyrdyń tarıhı oqıǵalarynyń kýágeri. Keıýana alyp shaharǵa 13 jasynda qonys aýdarǵan. Myń jyldan astam tarıhy bar alyp shahar adam tanymastaı keńeıip, kemeldene túsken. On ǵasyr burynǵy Almalý men qazirgi Almatymyzdyń syrtqy kelbetinde jer men kókteı aıyrmashylyq bar ekeni anyq deıdi. 

Lúbov Korchenko – qaladaǵy qart analardyń biri. Keıýana alyp shahardyń týǵan kúninde óziniń 101 jasyn atap ótýde. Ol arý qala – Almatyda 13 jasynan beri turyp keledi. Ata-anasynan erte aıyrylǵan Lúbov ájeı eńbekke erte aralasqan. 40 jyldan astam ýaqyt qalanyń bas pochtasynda qyzmet etipti. Eń súıikti demalys orny – 28 gvardıashy-panfılovshylar saıabaǵy bolǵan. Súıikti jaryn da sol orynda kezdestiripti.

«Almatynyń tabıǵaty erekshe. Ol kezderi qalada turǵyndar az bolatyn. Kólik te biren-saran edi. Kóbinese jaıaý júretinbiz. Mádenı oshaqtar qurylysy qalaı júrgeni esimde. Abaı atyndaǵy opera jáne balet teatry jumys ornyma jaqyn ornalasqan edi. Odan bólek, Lermontov drama teatry jumys isteıtin», – deıdi Lúbov Korchenko.

Keıýana jumystan keıin áriptesterimen taýǵa jıi barǵan. Ol jerde jemis-jıdektiń túr-túri samsap turatyn dep eske alady. Al ýaqytyn otbasymen Medeý muz aıdynynda ótkizgendi unatqan.  

«Kónkımen syrǵanaǵandy jaqsy kóretin edik. Qys mezigilinde muz aıdynynan shyqpaıtynbyz. Kóbinese qalany jaıaý aralaıtynbyz. Ol ýaqytta záýlim ǵımarattar sırek kezdesetin. Al qazirgi qala kelbeti adam tanymastaı ózgergen. Bıik, ásem nysandar óte kóp», – deıdi Gennadıı Korchenko.

Bir ǵasyr ǵumyr keshken qart ana uzaq jasaýynyń syryn eńbekpen baılanystyrady. Seksenniń seńgirine jetken uly Gennadıı jas kezinen salaýatty ómir saltyn ustanǵan. Qazirgi tańda Almatyda ortasha ómir súrý jasy – 75,9 jas. Bul elimiz boıynsha jaqsy kórsetkishterdiń biri. Bıyl megapolıste «Belsendi uzaq ómir» jol kartasy jasalǵan. Onyń maqsaty – egde jastaǵy azamattardy belsendi ómirge tartý, olardyń áleýetin paıdalanyp, urpaqtar sabaqtastyǵyn qamtamasyz etý.

«Jobany júzege asyrý barysynda «Belsendi uzaq ómir» ortalyǵy quryldy. Odan bólek, Jol kartasy aıasynda dene shynyqtyrý jáne sport basqarmasymen birge áleýmettik joba jasaldy. Qarıalarǵa fıtnes-klýbtarǵa tegin joldama berildi. Sonymen qatar, Týrızm basqarmasymen zeınetkerlerge qalanyń kórikti jerlerin aralaýǵa múmkindik jasaldy», – dedi Almaty qalasy Jumyspen qamtý jáne áleýmettik baǵdarlamalar basqarmasy múgedektermen jáne ardagerlermen jumys bóliminiń basshysy Laýra Abjanova.

Qalada «Belsendi uzaq ómir» ortalyǵynan bólek, áleýmettik 55 klýb jumys isteıdi. Jol kartasy aıasynda 5 myń egde jastaǵy azamattardy qamtý kózdelgen. Qazirgi tańda oǵan qatysýshylar qatary 6 myńǵa jetken. Búginde alyp shaharda 223 myń zeınetker turady. Bul qala turǵyndarynyń 12,5 paıyzy.