Qabir shamamen b.z. I-V ǵasyrlarynan qalǵan bolýy múmkin. Bul týraly Mańǵystaý tarıhı-mádenı qoryǵynyń arheologıa jáne arhıtektýra bóliminiń jetekshisi B. Tólegenuly feısbýk paraqshasynda jazdy.
Mańǵystaý aýdany Jyńǵyldy aýyly mańynda transheıa qazý kezinde qurylysshylar kezdeısoq adam qańqalaryn kezdestirgen. Dál sol aýmaqtaǵy qurylys ýaqytsha toqtatylyp, alǵashqy apattyq-qutqarý jumystary júrgiziledi. Alǵashqy apattyq-qutqarý jumystaryna ólkege belgili arheolog Andreı Astafev te qatysqan.
— Súıekterdi alyp, ornyn tazalap, alǵashqy aqparatty aldyq. Qazirgi anyqtalǵan jaǵdaı boıynsha bul – katakombalyq qabir. İshinen 6 adamnyń súıegi tabyldy, ýaqyty jobamen b.z. alǵashqy kezeńderi dep oılaımyz. Ýaqytty tabý úshin artefakt qajet. Súıektermen birge pyshaq, monshaq jáne urshyq shyqty. Biraq bul eki-úsh nársemen qorytyndy jasaı almaımyz. Adamdardyń basynyń shyǵysqa qarap jatýyn, birneshe adamdy birge jerleýin eskere otyryp, b.z. 1-5 ǵasyrlary bolýy múmkin dep ázirshe aıta alamyz, — deıdi Bekbolat Tólegenuly.
— Biz quzyrly organ retinde, aldymen, mamandarymyzdy jiberip, anyqtadyq. Ol zertteýdi qajet etetin nárse. Biz qazir súıek qana taýyp otyrmyz. Zertteýdiń qorytyndysy shyqqan soń QR Mádenıet jáne Sport mınıstrligine osyndaı jańalyq tabylǵanyn habarlaıtyn bolamyz. Ǵalymdar qarap, tarıhı qundylyǵy anyqtalsa, mindetti túrde zertteledi, — deıdi Mádenıet basqarmasynyń basshysy Panıa Sarmýrzına.
Ólketanýshynyń aıtýynsha, mundaı qabirler buǵan deıin Syrlytam, Shaǵataı, Qumyra jerlerinen de tabylǵan.
— Katakombany tabý qıyn, arnaıy izdeseń de tappaısyń. Osy sekildi aıaqasty kez bolyp qalady. Buryn tabylǵan katakombalar bir bólmeli bolsa, bul jerde birden 8 bólme shyǵyp tur. Bul – úlken olja, munyń ereksheligi sonda. Oljany qazbaı tastap ketý, shyny kerek, tarıh úshin, ǵylym úshin qıanat dep oılaımyn, — deıdi Bekbolat Tólegenuly.
Alǵashqy jumystar kezinde mamandar súıekterdi alyp, oryndardy kómip, alańshany qorshaýǵa alǵan. Endi ony ári qaraı tolyqqandy ǵylymı turǵyda zertteý jumystaryn júrgizýdi kútýde.
Aýmaqqa zertteý júrgizý máselesi qarasha aıynyń alǵashqy 10 kúndiginde sheshilmek.
