Tuǵyry bıik táýelsizdigimizdiń bıyl 27 jyldyǵy atap ótilmekshi. Almatydaǵy Esentaı Mall jańa jyldy toılaýǵa daıyndyqty bastap ketse de, kókiregi oıaý qazaq Táýelsizdikti toılaýǵa kún sanap júrgeni anyq. 16 jeltoqsanǵa týra bir aı qalǵanyn eskere otyryp Qamshy redaksıasy feısbýkte orys tilinde jarıalanǵan qoǵam belsendisi Gúljan Erǵalıevanyń jazbasyn memlekettik tilge aýdaryp, talqyǵa usynady.
Gúljan Erǵalıevanyń feısbýginen:
Táýelsizdik merekesine de kelip jettik. Bul mereıli datany árkim ártúrli qabyldaýy múmkin. Degenmen ortaq bir dúnıe bar. Ol bizdiń memleket, halyq ekendigimiz! Dúnıejúzilik qaýymdastyqtyń sýbektisimiz!
Kúntizbede qyzylmen belgilengen merekeler ǵana muny eske salmaıdy. Minez-qulqymyz, ar-namysyz, tarıhymyz – barymyz da, narymyz. Osy qundylyqtar kózimizdi shel basyp, týra joldan adasýymyzǵa árqashan bóget bolady.
Qazaq halqy júz jylda nebir qaıǵy-qasiretti basynan keshti. Asharshylyq zulmaty, qýǵyn-súrgin, ult retinde kemsitýler... Dál mynandaı qorlyqtan keıin kez kelgen basqa halyq ult, memleket retinde joıylyp ta keter me edi. Biraq biz álsizderdiń qatarynan emespiz. Oǵan qazaq degen atymyzdyń, zatymyzdyń álemniń tarıhı jaýqazyndarynda atalýy kýá. Endeshe kimnen jáne neden qorqamyz?
Eger biz shyn mánisinde azat el, táýelsiz memleket bolsaq, qıyndyqty jeńýge mindettimiz! Búgingi áńgime Qytaıdaǵy qazaqtar haqynda. Qytaı aýmaǵynda turatyn qandastarymyzdyń, musylmandardyń basyndaǵy qaıǵy-muń oı-sanaǵa áser etpeı qoımaıdy. Qazaǵymyzdyń Qytaıǵa aýa kóshýiniń sebebi baıandalǵan tarıhı qujattar jeterlik. Babalarymyzdyń bul kóshýin «qaraly kósh» degenimiz durys shyǵar. Sebebi bas saýǵalap, Qytaıǵa bet alǵan olardyń 30%-y ǵana aman-esen dittegen jerine jetedi.
...Sol babalardyń búgingi urpaǵy tarıhı Otannyń ıesi, ıakı bizden kómek surap, «Bizdi, jaqyndarymyzdy qutqara kórińder!» dep kóz jastaryn kól qylýda. Ózge elde jaǵdaıy ýshyǵa túsken baýyrlarymyz bizden kómek suraıdy. Tipti bala-shaǵalaryna deıin Qazaqstan halqynan jylamsyrap, Qytaı lagerinde qaıta tárbıelenip jatqan áke-sheshesin aman alyp qalý úshin kómek qolyn kútedi.
BUU, jalpy álem Shyńjandaǵy musylmandardyń múshkil hal máselesin kóterip jatyr. Dúnıejúzilik BAQ shýlap jatyr! Aqorda aldynda balalar otyr, Nazarbaevqa jalynyp... Endigi kómekti kimnen jáne qalaı suraý qajet?!
Sondyqtan da barlyq saıası partıalarǵa jáne qazaqstandyq qoǵamǵa úndeý tastaımyn. Bıylǵy táýelsizdik merekesin «Qaıtarý kóshi» degen uranmen ótkizeıik! Qaıtalap óteıin, eger biz shyn mánisinde azat el bolsaq, qandastarymyzdyń qaýipsizdik máselesin respýblıkalyq mańyzdy másele deńgeıine kóterip, Qytaıdaǵy qazaqtardyń Atajurtqa aman-esen kóshýi úshin qazaq-qytaı kelisimin jasasý úshin basymyzdy báıgege salamyz. Óz qazaǵymyzdyń quqyǵy Qazaqstan Konstıtýsıasy boıynsha qorǵalýy úshin... Bul kelisimniń detaldary, normalary memlekettik organdardyń moınynda bolsyn. Bastysy, 2018 jyldyń 16 jeltoqsanynda barsha qaýymdy qandastarymyzdyń janaıqaıyna qulaq túrip, olarǵa qoldaý kórsetýdi nıet etip kómektesý maqsatynda neshe túrli halyqtyń is-sharalar ótkizýge shaqyramyn.
«Nur Otan – negizgi túbiriń Otan ǵoı, Onymen qoımaı, NURsyń! Endeshe sáýleńdi shash, aınalańdy nurlandyr! Búgin Qytaıdaǵy 1,5 mıllıon qazaǵymyzdyń elge oralýy erteń 50 mıllıon qysyq kózdiń bizge úrke qaraýyna sebep bola alady».
