Aqtóbede esepshiler men qarjy salasynyń mamandaryna arnalǵan aýqymdy shara ótti. Tájirıbeli mamandar áriptesterine býhgalterlik esep jáne salyq máseleleri jóninde túsinik berdi.
Kásipkerler palatasynda ótken jıynǵa 100-ge jýyq sala mamandary qatysty. Jıynda respýblıkaǵa belgili aýdıt jáne salyq keńesshileri baıandama jasady. Májilisti «Aqtóbedegi esepshiler men aýdıtorlar úıi» JSHS jáne Aqtóbe oblysy kásipkerler palatasynyń janyndaǵy Esepshiler klýby uıymdastyrdy. Quramyna 250 esepshi maman kiretin býhgalterler klýbynyń jumys jasaǵanyna 2 jyl boldy.
* Bul shara áriptester arasynda tájirıbe almasý ǵana emes, Aqtóbeniń qarjy jáne esepshi mamandarynyń biliktilikterin kóterýge jáne ózara iskerlik qarym-qatynas jasaýǵa múmkindik beredi dep esepteımin. Klýb músheleri palatada ótkiziletin barlyq semınarlar men talqylaýlarǵa belsendi qatysady. Jańa Salyq kodeksi bıznestiń pikirin esepke ala otyryp jasalǵandyqtan, qandaı da bir ózgertýlerge óz usynysymyzdy bildirip otyrýmyz –óte mańyzdy. Salyq kodeksindegi salyq organdarynyń tekserisine negiz bolatyn jaǵdaılardy 30 paıyzǵa deıin qysqartý Ulttyq kásipkerler palatasynyń bastamasymen júzege asyrylǵan bolatyn,-dep atap ótti «Atameken» ÓKP dırektory Nurlybek Muqanov.
Aqtóbe oblysynyń esepshilerine arnalǵan jıyn «QR aýdıtorlyq qyzmet týraly» zańynyń 20 jyldyǵyna oraı ótkizildi. Májilistiń taqyryby: «21 ǵasyrdaǵy aýdıttiń damý úderisi, býhgalterlik esep jáne salyq salý salasyndaǵy zańnamalardaǵy ózgerister» dep ataldy. Jıynnyń basty maqsaty salyq salýdaǵy ózekti máseleler jóninde túsinik berý boldy.
* Biz esepshiler men qarjy dırektorlaryna, bıznes basshylaryna arnalǵan osyndaı aýqymdy sharalardy tegin ótkizemiz. Joǵary bilikti mamandar áriptesterine jańa jylda zańnamalardaǵy ózgeristerge saı jumys isteýdi úıretýde-deıdi «Aqtóbedegi esepshiler men aýdıtorlar úıi» JSHS dırektory Álibek Shamarov.
Sondaı-aq, sharaǵa qatysýshylar qazirgi kezde kez-kelgen ujymda qoldanylýy tıis qarjylyq eseptiń jańa halyqaralyq standarttary, elektrondy shot-faktýralar, vırtýaldy qoıma, QQS baqylaýda onlaın kasalyq apparattardy qoldaný sekildi jańashyldyqtardan habardar boldy.
-Bul kásipkerler úshin óte yńǵaıly. Buryn fıskaldy organdar kameralyq baqylaýdy júrgizý úshin kasalyq apparattardy alyp kelýdi suratatyn nemese ózderi kelýge májbúr bolsa, onlaın kasalyq qurylǵylardy qoldaný arqyly saýda túsimi bizdiń serverge tikeleı joldanady. Salyq tóleýshiler esh qınalmaıdy. Olqylyqtar oryn alǵan jaǵdaıda bizder ony kórip otyramyz da salyq tóleýshige habar beremiz. Ol ony ornynda otyryp-aq túzete alady. Búgingi kúni kásipkerlik qyzmettiń 60-70% onlaın kasalyq apparattarmen jabdyqtalǵan. 2019 jyldyń 1 qańtarynan bastap, onlaın baqylaý kasalyq apparattary barlyq qala bazarlarynyń saýda qatarlaryna qoıylatyn bolady. Buryn olar qoldanbaıtyn. 2020 jyldan bastap, kasalyq apparattar barlyq patentshilerge mindetteledi,-dep málimdedi Aqtóbe oblysy boıynsha memlekettik kirister departamentiniń basqarma basshysy Gúlmıra Aryspaeva.
Sonymen qatar, konferensıaǵa qatysýshylarǵa bıznes ókilderine tegin qyzmet kórsetetin «Kásipkerlerdiń jeke kabıneti» elektrondy portaly tanystyryldy.
* Kásipkerdiń jeke kabınetin qoldaný ońaı ári qoljetimdi. Sabinet.atameken.kz saıtyna kirip, tirkeýden ótken árbir kásipkerdiń kúndelikti qajetti aqparattar men qyzmetterdi úzdiksiz alýyna tolyq múmkindik bar. Sonyń ishinde, jumys barysynda jıi qoldanylatyn qujattar úlgisi de usynylady. Qazirgi ýaqytta birneshe servıs
jumys istep tur,-deıdi «Atameken» ÓKP qarjylaı emes qoldaý bóliminiń basshysy Erjan Nurǵalıev.
Jıyn barysynda tyńdaýshylarǵa aqparattyq materıaldar taratylyp, esepshilerdiń qyzmetinde kezdesetin máselelerge baılanysty suraqtarǵa jaýap berildi. Sonymen qatar, qatysýshylarǵa biliktilikti arttyrý týraly sertıfıkattar berildi.
