Janna Kalına - eki birdeı erekshe kútimdi qajet etetin balalardyń anasy. 3 balasy bar otbasy páter jaldap tursa da, tapqan-taıanǵandaryn naýqas balalardyń emine jumsap, arnaıy kútim sharalarynyń barlyǵyn jasatýǵa tyrysady. Múgedek balalary bar otbasy retinde páter kezegine 8 jyl buryn turǵanymen, áli kúnge nátıje bolmapty.
Osy qıyndyqtardyń barlyǵy Jannany moıyta almady. Aýrý balasynyń janynan bir eli shyǵa almaıtyn ol osydan 2 jyl buryn úıde otyryp, tátti torttar ázirlep, satýmen aınalysa bastady. Birden tabys taýyp ketpegenimen, áleýmettik jeli arqyly turaqty satyp alýshylar tabýdyń sáti túsedi.
* Tort ázirleýdi úlken tabys ákeletin bıznes deı almaımyn, degenmen, balalardyń em-domyna jetedi. Tátti taǵam ázirleýdi jaqsy kóremin jáne bar ynta-shyntammen daıyndaımyn. Ony satyp alýshylar da sezetin bolý kerek, qaıta aınalyp kelip jatady. Endi osy kásibimdi ári qaraı damytyp, sheberlik sabaqtaryn ótkizip, múgedek jandarǵa arnalǵan kafe ashqym keledi,-deıdi qaısar ana.
Jaqynda ǵana ol ortalyqtaǵy «Álıa» bazarynan óz saýda ornyn ashty. Onda ol óz qolynan shyqqan túrli tátti-dámdilerdi satady. Onyń bul bastamasyna Aqtóbe oblysy «Atameken» kásipkerler palatasy janyndaǵy İsker áıelder qaýymdastyǵy muryndyq boldy. Keńes músheleri Jannaǵa jeke kásipker retinde tirkelip, bıznesti qalaı júrgizý kerektigi jóninde keńes berdi.
* Janna Kalına bizge bıyl kóktemde kómek surap kelgen bolatyn. Biz oǵan jeke kásipkerlikke arnalǵan baǵdarlamalar tetikterin paıdalaný týraly keńes berdik. Saýda ornyn ashýǵa kómek kórsettik. Sondaı-aq, sheberlik sabaqtaryn ótkizýge arnalǵan sertıfıkat alýǵa septigimizdi tıgizbekpiz. Jannanyń ınvakafe ashý úshin nesıe alýǵa kepilge qoıatyn múlki bolmaǵandyqtan, memleket bóletin qaıtarymsyz grant alýǵa qatysýyna súıemeldeý jasamaqpyz. Janna sekildi qolynan is keletin áıel azamatshalarǵa qoldaý kórsetý-bizdiń negizigi mindetimiz,-deıdi İsker áıelder keńesiniń tóraıymy Janar Eleýsizova.
Janna Kalınanyń qolynan shyqqan torttar tek tabıǵı ónimderden daıyndalatyndyǵymen erekshelenedi. Árdaıym sheberligin shyńdap otyratyn ol óz jumysyn adal atqarýǵa tyrysady. Kúndiz balalardyń em-domymen shapqylap, túnde til úıirer tort pisirip, kásipkerlikpen aınalysýǵa tyrysyp júrgen keıipkerimizdi búgingi kúnniń batyryna teńeýge bolady.
Qazirgi kezde týǵan kún, toı, merekelik keshterdi dámdi tortsyz elestetý múmkin emes.
